ជាតិ
ស្តាតចាស់ ឬកីឡដ្ឋានឡង់ប៊ែ និងសំណល់ពីវិញ្ញាសាប្រណាំងជិះកង់លើរង្វង់
× ភ្នំពេញ៖ កីឡដ្ឋានដែលចាស់ជាងគេនៅប្រទេសកម្ពុជា ត្រូវបានគេហៅថាស្តាតចាស់តែម្ដង។ ស្តាតចាស់ ឬកីឡដ្ឋាន ឡង់ប៊ែ (Lambert Stadium) ត្រូវបានសាងសង់នៅក្នុងឆ្នាំ១៩២០។ នៅសម័យនោះនៅស្តាតចាស់ មានការប្រកួតកីឡាទោចក្រយាន វិញ្ញាសាប្រណាំងជិះកង់លើរង្វង់។ ប៉ុន្តែកីឡានេះ មិនមានវត្តមានទៀតឡើយនៅប្រទេសកម្ពុជា។ នេះជាមូលហេតុដែលកន្លែងមានកៅអីជុំវិញទីលានបាល់ទាត់ ពេលមុន គឺជាផ្លូវជិះកង់។ រង្វង់ប្រណាំងជិះកង់មានផ្លូវបត់២ ដែលត្រេត ដើម្បីកីឡាករជិះបានល្បឿនលឿនដដែល មិនត្រូវការបន្ថយល្បឿន។
ដើម្បីជ្រាបច្បាស់សូមអញ្ជើញលោកអ្នកនាងទស្សនាវីដេអូខាងក្រោមនេះ៖
សញ្ញាចំណាំនៃស្តាតចាស់ គឺជាបង្គោលខ្ពស់ៗទាំងពីរ ដែលអាចឃើញបានពីចម្ងាយ ជាពិសេសកាលពីសម័យមុន ពីព្រោះពេលនោះ គេមិនទាន់បានកសាងផ្ទះជុំវិញទេ។ ខាងលើមានដូចជាកងច្រើនបញ្ចូលគ្នា។ វាមិនមែនតំណាងឱ្យកីឡាទោចក្រយានទេ។ វាស្រដៀងនិមិត្តរូបកីឡាអូឡាំពិក។ និមិត្តរូបកីឡាអូឡាំពិក ត្រូវបានគូរនៅឆ្នាំ១៩១៣ ដោយលោក COUBERTIN Pierre ដែលបានបង្កើតកីឡាអូឡាំពិកឆ្នាំ១៨៩៦។ កងទាំង៥ ពណ៌ខុសៗគ្នាទាំងអស់នោះ តំណាងឱ្យប្រទេសទាំងអស់ ពីព្រោះទង់ជាតិទាំងអស់ ក៏មានយ៉ាងហោចពណ៌មួយ ក្នុងចំណោមពណ៌ទាំង៥នោះ : ខៀវ ខ្មៅ ក្រហម លឿង បៃតង។
កីឡាទោចក្រយានមានវិញ្ញាសា ៥ : ជិះកង់លើផ្លូវគោក ជិះកង់ឡើងភ្នំ ជិះកង់ស៊ីក្លូក្រុស ជិះកង់ BMX និងជិះកង់លើរង្វង់។ ដោយឡែកនៅប្រទេសកម្ពុជា មានតែជិះកង់លើផ្លូវគោក និងជិះកង់ឡើងភ្នំ ប៉ុណ្ណោះ។
ពាក្យថា ស្តាត ជាពាក្យកម្ចីពីភាសាបារាំង។ ពាក្យបារាំង stade មានន័យថា កីឡដ្ឋាន។
ស្តាតចាស់ ឬហៅជាផ្លូវការថាមជ្ឈមណ្ឌលកីឡាកងយោធពលខេមរភូមិន្ទ បើកទ្វាររៀងរាល់ថ្ងៃ។ វាមានទីតាំងស្ថិតនៅវិថីឧកញ៉ា ឃ្លាំង មឿង (ផ្លូវ៧០) ក្នុងខណ្ឌឫស្សីកែវ រាជធានីភ្នំពេញ៕
© រក្សាសិទ្ធិដោយ thmeythmey.com