ជាតិ
ក្រសួងព័ត៌មានគ្រោងរៀបចំពានរង្វាន់មហោស្រព តន្ត្រី និងចម្រៀងកុមារ
× រដ្ឋមន្ត្រីក្រសួងព័ត៌មាន លោក នេត្រ ភក្ត្រា កាលពីថ្ងៃទី២៥ ខែធ្នូ បានដឹកនាំកិច្ចប្រជុំគណៈកម្មការរៀបចំមហោស្រព តន្ត្រី និងចម្រៀងកុមារ ពានរង្វាន់ក្រសួងព័ត៌មាន។ បើតាមអ្នកនាំពាក្យក្រសួង មហោស្រពនេះ នឹងជាផ្នែកមួយនៃការអបអរទិវាកុមារអន្តរជាតិឆ្នាំ២០២៤។
ក្នុងកិច្ចប្រជុំ លោក នេត្រ ភក្ត្រា ដែលជាប្រធានគណៈកម្មការរៀបចំមហោស្រព ផងដែរនោះ បានជំរុញឱ្យមានការផ្សព្វផ្សាយទូលំទូលាយ ដើម្បីទាក់ទាញការចូលរួមពីសាធារណជន បណ្តាអង្គការជាតិ អន្តរជាតិ និងដៃគូឧបត្ថម្ភ ព្រោះវាជាការលើកទឹកចិត្តកុមារកម្ពុជាក្នុងការបង្ហាញសមត្ថភាពពិតរបស់ខ្លួន ដូចជាភាពអង់អាចក្លាហាន ទេពកោសល្យ និងស្នាដៃ សម្រាប់ផ្តល់ជាគំរូល្អដល់កុមារដទៃទៀត។
អ្នកនាំពាក្យក្រសួងព័ត៌មាន បានបញ្ជាក់ថា រាល់ការបញ្ចេញសមត្ថភាពច្រៀង និងសម្តែងសម្រាប់ការប្រកួតយកជ័យលាភី ត្រូវភ្ជាប់ភ្ជាប់ជាមួយអត្ថន័យ និងគោលបំណងអប់រំ ការបណ្តុះគំនិតនិងសីលធម៌ល្អសម្រាប់កុមារ ជាពិសេសការលើកកម្ពស់សិទ្ធិរបស់កុមារ ការលុបបំបាត់អំពើកេងប្រវ័ញ្ចលើកុមារ ការលុបបំបាត់ការសេពគ្រឿងញៀន ការយល់ដឹងអំពីសុវត្ថិភាពចរាចរណ៍ តម្លៃនៃចំណេះវិជ្ជា សុជីវធម៌និងការរស់នៅក្នុងសង្គម ។
ការប្រឡងតន្ត្រី និងចម្រៀងកុមារបានប្រារព្ធ ធ្វើឡើងចាប់ពីពាក់កណ្តាលទសវត្សឆ្នាំ១៩៨០ ដោយទូរទស្សន៍ជាតិកម្ពុជា ហើយក្រោយមក មហោស្រពតន្ត្រីនិងចម្រៀង កុមារ ត្រូវបានរៀបចំដោយក្រសួងព័ត៌មាន ដោយរួមសហការជាមួយ ក្រសួងពាក់ព័ន្ធ អង្គការមិនមែនរដ្ឋាភិបាល និងវិស័យឯកជននានា ។
គណៈកម្មការរៀបចំមហោស្រព នឹងរៀបចំកិច្ចប្រជុំបន្តទៀតដើម្បីពិភាក្សា និងកសាងផែនការលម្អិត មុនឈានដល់ការកំណត់កាលបរិច្ឆេទ ក៏ដូចជាទីតាំងប្រកួតប្រជែង៕
© រក្សាសិទ្ធិដោយ thmeythmey.com