នាយករដ្ឋមន្ត្រីថៃ លោក សេដ្ឋា ថាវីស៊ីន នៅថ្ងៃទី៣ ខែមករា បានលើកសេចក្តីព្រាងថវិកាជាតិចំនួន ៣,៤៨ ទ្រីលានបាត (១០១,៥២ ពាន់លានដុល្លារ) សម្រាប់ការពិភាក្សាដេញដោលរយៈពេលបីថ្ងៃនៅចំពោះមុខសមាជិកសភា។ សេចក្តីព្រាងថវិកានេះរំពឹងថានឹងអនុម័តរួចរាល់ នៅខែឧសភា ឆ្នាំ២០២៤។
លោក សេដ្ឋា ថាវីស៊ីន បានបង្ហាញសេចក្តីព្រាងថវិកាសម្រាប់ឆ្នាំ២០២៤ ដែលមានទំហំទឹកប្រាក់ ៣,៤៨ទ្រីលានបាត (១០១,៥២ពាន់លានដុល្លារ)ទៅកាន់រដ្ឋសភា។ ថវិកាសារពើពន្ធឆ្នាំ២០២៤នេះ មានទំហំច្រើនជាង ៩ភាគរយឬ ២៩៥ ពាន់លានបាត (៨,៦១ពាន់លានដុល្លារ) នៃថវិកាសារពើពន្ធប្រចាំឆ្នាំ២០២៣ ដែលមានចំនួនត្រឹម ៣,១៨៥ទ្រីលានបាត (៩២,៩៧ពាន់លានដុល្លារ)។
ក្នុងនាមជានាយករដ្ឋមន្រ្តី និងជារដ្ឋមន្រ្តីក្រសួងហិរញ្ញវត្ថុ លោក សេដ្ឋា បានអះអាងនៅចំពោះសមាជិកសភាថា ៖« ថវិកាពិតជាមានសារៈសំខាន់ក្នុងការជំរុញសេដ្ឋកិច្ចទៅមុខ»។
បើតាមកាសែត Bangkok Post ថវិកាប្រមាណ ៣,៤៨ទ្រីលានបាតនេះ គ្រោងបែងចែកចំនួន២៥៣០ ពាន់លានបាត (ជាង ៧២ពាន់លានដុល្លារ) ត្រូវប្រើប្រាស់សម្រាប់ការចំណាយទូទៅប្រចាំឆ្នាំរបស់រដ្ឋាភិបាល។ ក្រៅពីនេះ ទឹកប្រាក់ប្រហែល ១១៨,៣៦ពាន់លានបាត (៣,៣ពាន់លានដុល្លារ) នឹងត្រូវបានដាក់ចូលទៅក្នុងទុនបម្រុងរតនាគារជាតិ ខណៈដែល ៧១៥,៣៨ពាន់លានបាត (២០ពាន់លានដុល្លារ) នឹងត្រូវទុកជាមូលនិធិវិនិយោគ។
បន្ថែមពីលើនេះ ប្រមុខរដ្ឋាភិបាល បានកត់សម្គាល់ថា ចំណែកដែលនៅសល់នឹងត្រូវប្រើសម្រាប់សងកម្ចីរបស់រដ្ឋាភិបាល។ ប្រាក់កម្ចីដែលបានស្នើឡើងជាអតិបរមាមានប្រមាណ ៦៩៣ពាន់លានបាត (ជាង ១៩ពាន់លានដុល្លារ) ស្មើនឹង ៣,៦៣ភាគរយ នៃថវិកាសរុប។
សេចក្តីព្រាងថវិកាសម្រាប់ឆ្នាំ២០២៤ នឹងផ្តោតលើបញ្ហាសង្គម ការពង្រីកការអប់រំ និងពង្រឹងប្រព័ន្ធសុខាភិបាលនៅក្នុងប្រទេស។
គួរបញ្ជាក់ថា ក្រោយពីត្រូវបានអនុម័តដោយរដ្ឋសភា សេចក្តីព្រាងច្បាប់ថវិកានេះ នឹងត្រូវបញ្ជូនទៅគណៈកម្មាធិការមួយរបស់រដ្ឋសភាដើម្បីពិភាក្សាបន្ថែមទៀតនៅថ្ងៃទី ៣-៤ ខែមេសា។ សេចក្តីព្រាងច្បាប់នេះ នឹងត្រូវបញ្ជូនបន្តទៅព្រឹទ្ធសភា និងបោះឆ្នោតនៅថ្ងៃទី ៩-១០ ខែមេសា។ ប្រសិនបើព្រឹទ្ធសភាបានអនុម័តនោះ លេខាធិការដ្ឋានខុទ្ទកាល័យនឹងបញ្ជូនសេចក្តីព្រាងច្បាប់នេះទៅថ្វាយព្រះមហាក្សត្រនៅថ្ងៃទី១៧ ខែមេសា ឆ្នាំ២០២៤៕