កីឡាអន្តរជាតិ
អន្តរជាតិ
កីឡាការិនី Sam Kerr ដែលលេចធ្លោនៅ World Cup របួសសរសៃ ACL អំឡុងហ្វឹកហាត់នៅម៉ារ៉ុក
× កីឡាការិនី Sam Kerr ប្រធានក្រុមនារី Chelsea រងរបួសសរសៃ ACL អំឡុងពេលហ្វឹកហាត់ជាមួយនឹងក្រុមក្នុងជំរំហ្វឹកហាត់នៅប្រទេសម៉ារ៉ុក។ នេះបើតាមការប្រកាសរបស់ក្លិប Chelsea នាថ្ងៃទី៧ ខែធ្នូ។
បើតាមការប្រកាសរបស់ក្លិបតោខៀវ ៖«កីឡាការិនី Sam នឹងត្រូវវាយតម្លៃដោយអ្នកឯកទេសក្នុងប៉ុន្មានថ្ងៃខាងមុខនេះ បន្ទាប់មកចាប់ផ្តើមការស្តារនីតិសម្បទាជាមួយនឹងក្រុមគ្រូពេទ្យរបស់ក្លិប។«។
សមាគមកីឡាបាល់ទាត់អូស្ត្រាលី ក៏បាននិយាយបន្ថែមលើបញ្ហានេះថា មិនទាន់ដឹងពីពេលគ្រប់គ្រាន់សម្រាប់ការវិលត្រឡប់របស់កីឡាការិនី Sam Kerr ឡើយ ខណៈការខកខានសម្រាប់ការប្រកួតលីគកំពូលនារីរបស់អង់គ្លេស Women Super League រដូវកាល ២០២៣-២៤ ត្រូវបានរំពឹងទុក។
Kerr ជាកីឡាការិនីដ៏ល្បីល្បាញមួយរូប លើវិស័យបាល់ទាត់ និងជាកីឡាការិនីដំបូងគេដែលបានបង្ហាញសមត្ថភាពដ៏អស្ចារ្យទាំងការប្រកួតក្នុងព្រឹត្តិការណ៍ World Cup នារីឆ្នាំ ២០២៣។ Kerr ក៏ជាកីឡាការិនីដំបូងបង្អស់ដែលបានតាំងបង្ហាញលើផ្ទាំងគម្របវីដេអូហ្គេមរបស់ FIFA កាលពីឆ្នាំ ២០២២ ផងដែរ។
កីឡាការិនីវ័យ ៣០ឆ្នាំ ចូលរួមជាមួយនឹងក្រុមនារី Chelsea តាំងពីឆ្នាំ ២០១៩ ដោយនាងរកបានគ្រាប់បាល់ចំនួន ៩៩គ្រាប់ នៅក្នុងការប្រកួតចំនួន ១២៨ប្រកួត និងជួយដល់ក្រុមអង់គ្លេសមួយនេះឈ្នះពានរង្វាន់ជាច្រើន ព្រមទាំងពានរង្វាន់លីគកំពូលនារីចំនួន ៤លើក។
ប្រធានក្រុមជម្រើសជាតិអូស្ត្រាលី ក៏បានឈ្នះពានរង្វាន់ឯកត្តជនស្បែកជើងមាស ចំនួន ២លើក ជាមួយនឹងក្រុម Chelsea និងកាលពីឆ្នាំមុខជាកីឡាការិនីឈរនៅលំដាប់ថ្នាក់លេខ ២ សម្រាប់ពានរង្វាន់ Ballon d’Or បន្ទាប់ពីកីឡាការិនី Aitana Bonmati ដែលឈ្នះ។
ការរងរបួសសរសៃ ACL នេះមិនមែនត្រឹមតែមានកីឡាការិនី Sam Kerr មួយរូបឡើយ ដោយកីឡាការិនីជាច្រើនដូចជា Catarina Macario របស់ក្រុមអាម៉េរិក, Vivianne Miedema របស់ហូឡង់, Beth Mead និង Leah Williamson របស់អង់គ្លេស ដែលលេងឱ្យ Chelsea សុទ្ធឹងតែជួបបញ្ហារបួសនេះដូចគ្នា។ ការរងរបួសនេះបង្កឡើងដោយសារតែកីឡាការិនីទាំងនេះ បានឆ្លងកាត់ការប្រកួតញឹកញប់ ក្រោយជួយដល់ក្រុមជម្រើសជាតិក្នុងការប្រកួតពានរង្វាន់ Women World Cup 2023 រួចមក៕
© រក្សាសិទ្ធិដោយ thmeythmey.com