យោងតាមផែនការសក្ដានុពលទឹកសម្រាប់ស្រោចស្រពដីធ្វើស្រែប្រាំងឆ្នាំ២០២៣-២០២៤ របស់មន្ទីរធនធានទឹក និងឧតុនិយមខេត្តស្វាយរៀង បានបង្ហាញថា ប្រជាពលរដ្ឋអាចធ្វើស្រែប្រាំងបានត្រឹម២១,២០៦ហិកតាប៉ុណ្ណោះ ប៉ុន្តែផ្អែកតាមការពិនិត្យនិងវាយតម្លៃជាក់ស្ដែងរបស់មន្ទីរកសិកម្មខេត្តវិញ ឃើញថា ការបង្កបង្កើនផលរបស់ប្រជាពលរដ្ឋ បានកើនឡើងរហូតដល់២៧,២៥១ហិកតា ដែលលើសផែនការនៃការប្រើប្រាស់ទឹក រហូតដល់៦,០៤៥ហិកតា។ នេះបើតាមលោក ប៉េង ពោធិ៍សា ។
 

ដោយសារឃើញស្ថានភាពបែបនេះ ទើបលោកអភិបាលខេត្ត​ ប្រាប់ឱ្យពលរដ្ឋផ្អាកធ្វើស្រែប្រាំងលើកទី២ ក្រោយពីប្រមូលផលហើយ ចាប់ពីអំឡុងខែមករា ដល់ឧសភាខាងមុខ។ តាមរយៈសេចក្ដីណែនាំស្ដីពីការផ្អាកការបង្កបង្កើនផលស្រូវនៅរដូវប្រាំងលើកទី២ នៅថ្ងៃទី៨ មករា អភិបាលខេត្តស្វាយរៀង បានបកស្រាយថា៖«ករណីប្រជាពលរដ្ឋយើង នៅតែបង្កបង្កើនផលស្រូវរដូវប្រាំងលើកទី២ទៀតនោះ បងប្អូននឹងអាចជួបប្រទះនូវការខ្វះខាតទឹកប្រើប្រាស់ប្រចាំថ្ងៃ ខ្វះខាតទឹកសម្រាប់សត្វពាហនៈ ជាពិសេសខ្វះខាតទឹកសម្រាប់ស្រោចស្រព ដែលអាចបណ្ដាលឱ្យខូចខាតផលស្រូវ និងខាតបង់ថវិការបស់បងប្អូនប្រជាកសិករថែមទៀត»។
 

ជាមួយគ្នានេះ អភិបាលខេត្តស្វាយរៀង បានជំរុញឱ្យប្រជាពលរដ្ឋ ត្រូវត្រៀមលក្ខណៈស្ដុកទឹកក្នុងស្រះ អណ្ដូង ប្រឡាយ ដែលអាចស្ដុកទឹកបាន សម្រាប់ប្រើប្រាស់ប្រចាំថ្ងៃ និងសត្វពាហនៈជាដើម។
 

រដ្ឋបាលខេត្តស្វាយរៀង បានពិនិត្យឃើញថា ប្រឡាយ បឹង និងព្រែកធម្មជាតិមួយចំនួន មានសភាពរាក់ មិនអាចធ្វើជាអាងស្ដុកទឹកប្រើប្រាស់ ក្នុងរដូវប្រាំង និងរដូវវស្សា ដែលជាមូលហេតុនាំឱ្យប្រជាពលរដ្ឋ ខ្វះខាតទឹកប្រើប្រាស់ ក្នុងការបង្កបង្កើនផលកសិកម្ម។

 

មើលឃើញពីភាពចាំបាច់បែបនេះ រដ្ឋបាលខេត្តស្វាយរៀង នឹងចាត់ក្រុមការងារចុះពិនិត្យទីតាំង ហើយជីកស្ដារប្រឡាយ បឹង និងព្រែកធម្មជាតិ ឱ្យបានជ្រៅជាងមុន តាមលក្ខណៈបច្ចេកទេស ដើម្បីធ្វើជាអាងស្តុកទឹកទុកប្រើប្រាស់ក្នុងវិស័យកសិកម្ម និងជីវភាពប្រចាំថ្ងៃ របស់ប្រជាពលរដ្ឋ។