ខ្សែប្រយុទ្ធវ័យ ៣៦ឆ្នាំ ជួយក្រុមអាហ្សង់ទីនឈ្នះពានរង្វាន់ World Cup ក្នុងឆ្នាំ ២០២២ នៅក្នុងប្រទេសកាតា តែមិនត្រូវបានក្លិប PSG រៀបចំកម្មវិធីអបអរ ឬក៏ការដង្ហែរពាននៅក្នុងប្រទេសបារាំង ជាពិសេសនៅក្នុងកីឡដ្ឋាន Parc des Princes បន្ទាប់ពីរូបគេបានវិលត្រឡប់ដល់ទឹកដីបារាំង។ មិត្តរួមក្រុមរបស់ Messi នៅតាមបណ្តាក្លិបដទៃត្រូវបានទទួលស្វាគមន៍ និងអបអរយ៉ាងកក់ក្តៅសម្រាប់ការឈ្នះពាន World Cup។
 

អាហ្សង់ទីនយកឈ្នះលើបារាំងដោយបាល់កាត់ក្តី ១១ម៉ែត្រ លទ្ធផល ៤-២ ក្រោយលទ្ធផលស្មើ ៣-៣ រយៈពេល ១២០នាទី។
 

មូលហេតុដែលលោក Al Khelaifi បានបង្ហើបនោះគឺ មានភាពភ័យខ្លាចចំពោះកំហឹងរបស់អ្នកគាំទ្របារាំង ព្រោះតែ​ Messi បានបំបាក់មិត្តរួមក្រុម Kylian Mbappe ដែលការប្រកួតនៅវគ្គផ្តាច់ព្រ័ត្រ World Cup 2022។ 
  

«សម្រាប់ខ្ញុំ ដូចដែលខ្ញុំបាននិយាយ ប្រសិនបើគ្រប់គ្នាចង់ដឹងពីមូលហេតុដែលយើងមិនអនុញ្ញាតឱ្យអបអរសម្រាប់គេបានគ្រប់គ្រាន់ បន្ទាប់ពីគេបានឈ្នះ World Cup ព្រោះថាយើងនៅក្នុងប្រទេសបារាំង ហើយគេឈ្នះទល់នឹង Mbappe។ យើងជាក្លិបបារាំង ខ្ញុំមិនចង់ឱ្យអ្នកគាំទ្រក្នុងកីឡដ្ឋានទាំងមូលមានកំហឹងចំពោះរូបគេដូចគ្នា ខ្ញុំគិតថាយើងគួរតែគោរពទៅលើរឿងនេះ។»។ លោក Khelaifi បាននិយាយប្រាប់ទូរទស្សន៍ RMC TV បែបនេះ។
 

មុនពេលផ្លាស់ទៅកាន់ក្រុម Inter Miami កីឡាករវ័យ ៣៦ឆ្នាំ ត្រូវបានគេឃើញថាទទួលបានការរិះគន់ខ្លាំងពីសំណាក់អ្នកគាំទ្ររបស់ក្លិប PSG។ អំឡុងពេលស្ថិតនៅក្លិប Inter Miami ខ្សែប្រយុទ្ធប្រធានក្រុមក៏ធ្លាប់បាននិយាយនៅក្នុងកិច្ចសម្ភាសមួយជាមួយនឹងទូរទស្សន៍ ESPN ថា គេមិនសប្បាយចិត្តជាមួយក្លិប PSG ដែលមិនអបអរដល់ការឈ្នះ World Cup ដូចទៅនឹងមិត្តរួមក្រុមរបស់គេនៅក្លិបដទៃ៕