លោក ង្វៀន ភូជុង ដែលមានវ័យ ៧៩ឆ្នាំ ជាប្រមុខបក្សកុម្មុយនីស្តវៀតណាម ចាប់តាំងពីឆ្នាំ២០១១ មក។ ជាមេដឹកនាំដ៏មានឥទ្ធិពលខ្លាំងនៅក្នុងបក្សកុម្មុយនីស្ត លោក​ ភូជុង តែងទទួលមេដឹកនាំបរទេស ដែលបានបំពេញទស្សនកិច្ចនៅវៀតណាម មិនថាជាលក្ខណៈផ្លូវការ ឬឯកជនឡើយ។

 

ផ្អែកតាមសេចក្តីព្រាងរបៀបវារៈរបស់ក្រសួងការបរទេសវៀតណាម និងការិយាល័យប្រធានាធិបតីឥណ្ឌូណេស៊ី ប្រមុខបក្សកុម្មុយនីស្តវៀតណាមរូបនេះ មិនជួបជាមួយប្រធានាធិបតីឥណ្ឌូណេស៊ី លោក ចូកូ វីដូដូឡើយ។ 

 

តាមការចុះផ្សាយរបស់ទីភ្នាក់ងារព័ត៌មាន Reuters ក្រសួងការបរទេសវៀតណាម ក៏ត្រូវបានសួរសំណួរពាក់ព័ន្ធនឹងអវត្តមានរបស់ប្រមុខបក្សកុម្មុយនីស្តផងដែរ ប៉ុន្តែក្រសួងការបរទេស មិនផ្តល់ចម្លើយនោះទេ។ 

 

ជុំវិញបញ្ហានេះ លោក ភូជូង អាចនឹងមានបញ្ហាសុខភាព ដែលមិនអាចជួបជាមួយមេដឹកនាំបរទេសបាន។ លោក ភូជូង ក៏អវត្តមានដែរ នៅក្នុងដំណើរទស្សនកិច្ចរបស់នាយករដ្ឋមន្រ្តីឡាវ លោក Sonexay Siphandone កាលពីសប្តាហ៍មុន។ 

 

ប្រមុខបក្សកុម្មុយនីស្តវៀតណាម បានបង្ហាញមុខជាសាធារណៈចុងក្រោយនៅថ្ងៃទី២៦ ខែធ្នូ ឆ្នាំ២០២៣ នៅពេលលោកជួបជាមួយប្រមុខបក្សកុម្មុយនីស្តជប៉ុន លោក Kazuo Shii នៅក្នុងទីក្រុងហាណូយ៕