ម្ចាស់ផ្ទះកាតាធ្លាប់ជាក្រុមគ្រងតំណែងជើងឯក អំឡុងឆ្នាំ ២០១៩ កាលនោះបានយកឈ្នះលើក្រុមម្ចាស់ពាន ៤សម័យជប៉ុន លទ្ធផល ៣-១ ក្នុងវគ្គផ្តាច់ព្រ័ត្រ។ ក្នុងនាមជាម្ចាស់ផ្ទះផ្ទាល់សម្រាប់ព្រឹត្តិការណ៍លើកនេះ កាតា បានដាក់គោលដៅគ្រងតំណែងជើងឯកជាថ្មី។
 

កាលពីឆ្នាំ ២០១៩ ដដែល​ កាតា ធ្លាប់ជួបជាមួយនឹងក្រុមលីបង់ ថែមទាំងយកឈ្នះលទ្ធផល ២-០ នៅក្នុងការប្រកួតវគ្គចែកពូល អំឡុងការប្រកួតនៅប្រទេសអេម៊ីរ៉ាត់អារ៉ាប់រួម។ ប្រវតិ្តជួបគ្នាចំនួន ១៣លើក របស់ក្រុមទាំងពីរនេះ គឺលីបង់មិនមានប្រវត្តិឈ្នះកាតាម្តងណាឡើយ ដោយក្នុងចំណោមនោះ ១០លើក ចាញ់ និងស្មើ ៣លើក។

បើតាមសម្តីលោក Marquez Lopez គ្រូបង្វឹកក្រុមកាតា មុនការប្រកួតបើកឆាកមកដល់ កូនក្រុមមានការហ្វឹកហាត់ខ្លាំង និងត្រៀមលក្ខណៈបានយ៉ាងល្អ ដើម្បីការពារតំណែងរបស់ខ្លួន ដែលធ្លាប់គ្រងកាលពីឆ្នាំ ២០១៩។ 
 

«យើងបានឆ្លងកាត់ការរៀបចំយ៉ាងទូលំទូលាយ ហើយប្រាកដណាស់​វាមិនមែនជាកិច្ចការងាយស្រួលនោះទេ ជាពិសេសជាមួយនឹងពេលវេលាកំណត់។​ ខ្ញុំបានបញ្ជារឱ្យហ្វឹកហាត់រាល់សប្តាហ៍នៅក្នុងខែធ្នូ កន្លងទៅ បើទោះជាមានពេលវេលាខ្លីបែបណាក៏ដោយ […] ការដឹកនាំក្រុមកាលពីឆ្នាំ ២០១៩ គឺជារឿងដែលខ្ញុំមានកិត្តិយសខ្លាំងបំផុត ហើយមកដល់ពេលនេះយើងមានគោលដៅគឺទៅកាន់វគ្គផ្តាច់ព្រ័ត្រជាថ្មី។»។ លោក Lopez បាននិយាយមុនការប្រកួតបែបនេះ។
 

ជាការប្រកួតរយៈពេល ៤ឆ្នាំម្តង ដូចទៅនឹងពានរង្វាន់លំដាប់ពិភពលោក Asian Cup បង្ហាញខ្លួនលើទឹកដីប្រទេសកាតា បន្ទាប់ពីប្រទេសនេះ រៀបចំការប្រកួត World Cup 2022 រួច។
 

កីឡដ្ឋាន Lusail ផ្ទុកមនុស្សបាន ៨៨,០០០នាក់ ត្រៀមរៀបចំការប្រកួតបើកឆាក រវាងម្ចាស់ផ្ទះកាត និងលីបង់ ក៏ធ្លាប់ជាទីកន្លែងដែលបំពេញក្តីស្រម៉ៃរបស់ក្រុមអាហ្សង់ទីន សម្រាប់ការឈ្នះពានរង្វាន់ពិភពលោក World Cup ក្រោយតាមប្រម៉ាញ់រយៈពេល ៣៦ឆ្នាំ៕