ខណៈរងទណ្ឌកម្មដ៏ច្រើនពីសំណាក់ប្រទេសលោកខាងលិច ដោយសារតែសង្រ្គាមនៅអ៊ុយក្រែន ទំហំពាណិជ្ជកម្មរបស់រុស្ស៊ី ជាមួយចិន បានកើនឡើងយ៉ាងខ្លាំង។ កន្លងមក ក្រុងមូស្គូ បានបង្កើនការទិញទំនិញពីចិន ដូចជាទូរសព្ទដៃ រថយន្ត និងសម្ភារផ្សេងទៀត។ ចំណែកចិន បានទិញប្រេងឆៅពីរុស្ស៊ី ជាច្រើន ក្នុងតម្លៃថោកៗ។ 

 

តាមទិន្នន័យរបស់រដ្ឋបាលគយចិនត្រូវបានបញ្ចេញនៅក្នុងថ្ងៃទី១២ ខែមករា ទំហំពាណិជ្ជកម្មរុស្ស៊ី-ចិន បានកើនដល់ ២៤០,១ពាន់លានដុល្លារ នៅក្នុងឆ្នាំ២០២៣ ដោយកើនឡើងប្រមាណ ២៦,៣ភាគរយ បើធៀបនឹងឆ្នាំ២០២២។ 

 

ក្នុងឆ្នាំ២០២៣ ការនាំចេញរបស់ចិនទៅរុស្ស៊ី បានកើនឡើង ៤៦,៩ភាគរយ​ បើធៀបនឹងឆ្នាំ២០២២ ហើយកើនឡើងរហូតដល់ ៦៤,២ភាគរយ បើធៀបនឹងឆ្នាំ២០២១។ ចំណែកការនាំចូលរបស់ចិនពីរុស្ស៊ីកើនដល់ ១៣ភាគរយ នៅក្នុងឆ្នាំ២០២៣។ 

 

តាមការបញ្ជាក់របស់ឧបនាយករដ្ឋមន្រ្តីរុស្ស៊ី លោក Alexander Novak នៅចុងខែធ្នូ​កន្លងទៅ ការនាំចេញប្រេងរបស់រុស្ស៊ីពាក់កណ្តាល គឺទៅចិន។ ជាការពិត ចាប់តាំងពីសង្រ្គាមនៅអ៊ុយក្រែនផ្ទុះឡើង ចិន និងឥណ្ឌា បានបង្កើនការទិញប្រេងពីរុស្ស៊ីយ៉ាងខ្លាំង ដោយសារតែវាមានតម្លៃទាប។ យ៉ាងណាមិញ រដ្ឋបាលគយចិន មិនបានបញ្ចេញទិន្នន័យការនាំចូលប្រេងពីរុស្ស៊ី នៅក្នុងខែធ្នូឡើយ។ 

 

លោក Zhang Hanhui អគ្គរដ្ឋទូតចិនប្រចាំនៅរុស្ស៊ី ក្នុងកិច្ចសម្ភាសន៍ជាមួយសារព័ត៌មាន RIA នៅថ្ងៃទី១៩ ខែធ្នូ រដ្ឋាភិបាលក្រុងប៉េកាំង មានបំណងពង្រីកកិច្ចសហប្រតិបត្តិការលើវិស័យថាមពលជាមួយក្រុងមូស្គូ៕