លោក William Lai ប្រធានបក្សកាន់អំណាចប្រជាធិបតេយ្យជឿនលឿន (DPP) បានឈ្នះក្នុងការបោះឆ្នោតប្រធានាធិបតីតៃវ៉ាន់ ទោះបីជាមានការអំពាវនាវពីចិនមិនឱ្យបោះឆ្នោតឱ្យលោក Lai ដែលជាអ្នកគាំទ្រការផ្ដាច់ខ្លួន និងឯករាជ្យភាពនៃកោះតៃវ៉ាន់ក៏ដោយ។
ក្នុងការបោះឆ្នោតមេដឹកនាំប្រទេស នៅថ្ងៃទី១៣ ខែមករា លោក William Lai បានប្រឈមមុខនឹង គូប្រជែងពីរធំៗសម្រាប់តំណែងប្រធានាធិបតីគឺ លោក Hou Yu-ih នៃគណបក្សប្រឆាំង ដ៏ធំបំផុតរបស់តៃវ៉ាន់គឺបក្ស Kuomintang (KMT) និងអតីតអភិបាលក្រុងតៃប៉ិលោក Ko Wen-je នៃគណបក្សប្រជាជនតៃវ៉ាន់តូច (TPP) ដែលទើបតែបង្កើតឡើងក្នុងឆ្នាំ ២០១៩ ។
ជាមួយនឹងការរាប់សន្លឹកឆ្លោតពីគ្រប់ការិយាល័យបោះឆ្នោតទាំងអស់ដែលបានរាប់ភ្លាមៗនៅ ល្ងាចថ្ងៃទី១៣ ខែមករា គណៈកម្មាធិការរៀបចំការបោះឆ្នោតកណ្តាលប្រកាសថា លោក Lai ទទួលបាន ៤០,១ ភាគរយ នាំមុខលោក Hou ដែលមាន ៣៣,៥ ភាគរយ ខណៈលោក Ko ទទួលបាន ២៦ ភាករយ។
លោក Hou បានទទួលបរាជ័យហើយបានអបអរសាទរ លោក Lai ចំពោះជ័យជម្នះ ហើយលោកក៏បានសុំ ទោសដល់អ្នកគាំទ្របក្ស KMT ដែលមិនយកឈ្នះបក្ស DPP។ លោក Ko ក៏បានទទួលស្គាល់ការចាញ់ឆ្នោតនេះផងដែរ។
«ខ្ញុំចង់អរគុណប្រជាជនតៃវ៉ាន់ដែលបានបង្កើតទំព័រថ្មីក្នុងលទ្ធិប្រជាធិបតេយ្យរបស់យើង»។ លោក Lai បានថ្លែងក្នុងសុន្ទរកថាក្រោយទទួលបានជ័យជម្នះក្នុងការបោះឆ្នោតបែបនេះ ហើយលោកក៏បានថ្លែងអំណរគុណដល់គូប្រជែងពីររូបរបស់លោកដែលបានទទួលស្គាល់ លទ្ធផលនេះផងដែរ។
លោក Lai បញ្ជាក់ផងដែរថា ជ័យជម្នះនេះបង្ហាញដល់សហគមន៍អន្តរជាតិថា រវាង លទ្ធិប្រជាធិបតេយ្យ និងអំណាចផ្តាច់ការ តៃវ៉ាន់នឹងតែឈរនៅខាងប្រជាធិបតេយ្យ។ បន្ថែមពីនេះ លោកសង្ឃឹមសម្រាប់ការវិលត្រឡប់ទៅកាន់ការផ្លាស់ប្តូរប្រកបដោយស្ថានភាពល្អ និងសណ្តាប់ធ្នាប់ជាមួយចិន ដោយលោកបានរំលឹកឡើងវិញអំពីបំណងប្រាថ្នារបស់លោក សម្រាប់កិច្ចពិភាក្សាដោយផ្អែកលើសេចក្តីថ្លៃថ្នូរ និងសមភាព។
ឆ្លើយតបទៅនឹងជ័យជម្នះរបស់ Lai អ្នកនាំពាក្យការិយាល័យកិច្ចការតៃវ៉ាន់របស់ទីក្រុងប៉េកាំង លោក Chen Binhua បាននិយាយនៅក្នុងសេចក្តីថ្លែងការណ៍មួយដែលធ្វើឡើងដោយ ទីភ្នាក់ងារសារព័ត៌មានរដ្ឋ Xinhua ថា តៃវ៉ាន់គឺជាតៃវ៉ាន់របស់ចិន។
«ជំហររបស់យើងក្នុងការដោះស្រាយសំណួរតៃវ៉ាន់ និងការធ្វើឱ្យប្រាកដថាការបង្រួបបង្រួម ជាតិគឺនៅតែជាប់លាប់ ហើយការប្តេជ្ញាចិត្តរបស់យើងគឺរ៉ឹងមាំដូចថ្ម»។ លោក Chen សង្កត់ធ្ងន់ បែបនេះ ដោយបង្ហាញថា ចិននឹងប្រកាន់ខ្ជាប់គោលការណ៍ចិនតែមួយ និងប្រឆាំងយ៉ាង ម៉ឺងម៉ាត់ចំពោះសកម្មភាពបំបែកខ្លួនដែលមានគោលបំណងសម្រេចបានឯករាជ្យភាពតៃវ៉ាន់ ក៏ដូចជា ការជ្រៀតជ្រែកពីបរទេស។
ឯក្នុងការបោះឆ្នោតសភាវិញ គ្មានគណបក្សណាមួយឈ្នះសំឡេងភាគច្រើននៅក្នុងសភា នីតិប្បញ្ញត្តិឡើយ ខណៈ បក្ស DPP ឈ្នះ ៥១ អាសនៈ គណបក្ស KMT ទទួលបាន ៥២ អាសនៈ និងគណបក្ស TPP ទទួលបានចំនួន ៨ អាសនៈ។ ទាក់ទងនឹងបញ្ហានេះ លោក Lai ប្រកាសថា លោកនឹងសហការជាមួយគូប្រជែងគឺលោក Hou និងលោក Ko ក្នុងការដោះ ស្រាយបញ្ហាដែលតៃវ៉ាន់ប្រឈមមុខ៕