ក្នុងជំនួបលីគកំពូលអង់គ្លេសសប្តាហ៍ទី២១ នៅរាត្រីថ្ងៃទី១៣ ខែមករា Bernardo Silva ជាអ្នករកបានគ្រាប់បើកឆាកឱ្យក្រុមការពារតំណែងជើងឯក Man City នៅ២៦នាទីដំបូងនៃវគ្គទី១ មុនពេល Alexander Isak និង Anthony Gordon សម្រេចទីម្នាក់មួយគ្រាប់ជាបន្តបន្ទាប់នៅនាទី៣៥ និង៣៧ ដើម្បីជួយ Newcastle នាំមុខ ២-១ វិញ។
 

ចូលដល់វគ្គទី២ ក្រុមទាំងពីរបន្តវាយសម្រុកគ្នាទៅវិញទៅមកប៉ុន្តែមិនមានគ្រាប់បាល់កើឡើងឡើយ រហូតដល់នាទី៧៤ ខ្សែបម្រើឆ្នើម Kevin De Bruyne ដែលទើបបង្ហាញខ្លួនសារជាថ្មីក្រោយជាពីរបួស ស៊ុតបញ្ចូលទីបានយ៉ាងល្អឱ្យក្រុមលោក Guardiola តាមស្មើ ២-២ ក្រោយប្តូរជំនួស Bernardo Silva ត្រឹម៥នាទី។
 

មិនត្រឹមតែរកបានគ្រាប់តាមស្មើ ឡើយកីឡាករអន្តរជាតិបែលហ្ស៊ិក ថែមទាំងជាអ្នកបញ្ជូនបាល់យ៉ាងល្អឱ្យមិត្តរួមក្រុម Oscar Bobb សម្រេចទីគ្រាប់ជ័យជម្នះថែមទៀតនៅនាទី៩០+១។ ឈ្នះសារិកាព្រៃ ៣-២ De Bruyne ទទួលបានការអបអរពីអ្នកគាំទ្រ សមាជិកក្រុម និងអ្នកចាត់ការលោក Guardiola។
 

លោក Guardiola បានហៅ De Bruyne បែបលេងសើចថាជាកីឡាករមានមន្តអាគម។ អ្នកចាត់ការអេស្ប៉ាញរៀបរាបថា៖«នៅពេល De Bruyne មានបាល់នៅនឹងជើង ខ្ញុំមានការជឿជាក់ ហើយអ្វីៗពិតជាកើតឡើងមែននៅពេលខ្សែបម្រើដ៏អស្ចារ្យរូបនេះ បញ្ជូនបាល់យ៉ាងល្អ Bobb ដែលមានល្បឿនដូចជាអ្នករត់ប្រណាំងសម្រេចទីគ្រាប់ជ័យជម្នះ។ ខ្ញុំពិតជារីករាយណាស់»។
 

តាមរយៈជ័យជម្នះនេះ បានជួយក្រុមការពារជើងឯកលីគកំពូលអង់គ្លេស ឡើងទៅឈរលេខ២ វិញដោយមាន៤៣ពិន្ទុ តាមពីក្រោយក្រុមកំពូលតារាង Liverpool ២ពិន្ទុ ក្រោយប្រកួត២០លើកដូចគ្នា។
 

Newcastle ធ្លាក់ទៅលេខ១០ ដោយរក្សា២៩ពិន្ទុដដែល ក្រោយប្រកួត២១លើក ស្របពេល Chelsea ឡើងទៅលេខ៨បណ្តោះអាសន្ន មាន៣១ពិន្ទុ ក្រោយឈ្នះ Fulham ១-០ តាមរយៈការស៊ុតបញ្ចូលរបស់ Cole Palmer ដោយបាល់ប៉េណាល់ទី៕