ក្នុងលិខិតអបអរការសម្ពោធជាផ្លូវការពិធីបើកឆ្នាំនៃការផ្លាស់ប្តូរប្រជាជន និងប្រជាជនរវាងចិន-កម្ពុជា ២០២៤ លោក លី ឈាំង នាយករដ្ឋមន្រ្តីចិន លើកឡើងថា កម្ពុជា-ចិន មានអរិយធម៌តាំងពីបុរាណមកជាមួយវប្បធម៌ដ៏ល្អ។ ត្រង់ចំណុចនេះ ប្រមុខរដ្ឋាភិបាល បានអះអាងថា ប្រទេសទាំងពីរមានប្រវត្តិសាស្រ្តជាមួយគ្នាជាយូរមកហើយ។ 

 

«នាវិក Zheng He មកពីរាជវង្សចិន បានឈប់ចតនៅកម្ពុជា ក្នុងពេលបេសកកម្មផ្លូវសមុទ្រ»។ លោក លី បានបញ្ជាក់បែបនេះ ដោយបន្ថែមថា ចម្លាក់នៅតែបន្តមានលើប្រាសាទបាយ័ន ដែលបង្ហាញពីទំនាក់ទំនងរវាងប្រជាជន និងប្រជាជនរវាងប្រទេសទាំងពីរ កាល ១ពាន់ឆ្នាំមុន។ 

 

រាជវង្សម៉េង ចាប់ផ្តើមដឹកនាំចិនពីឆ្នាំ ១៣៦៨ ដល់ឆ្នាំ១៦៤៤។ លោក Zheng He ជាឧត្តមនាវីឯកចិន ដែលធ្វើដំណើរពីចិន ទៅមហាសមុទ្រឥណ្ឌា។ 

 

ពីមុនមក លោក ជីវ​ តាក្វាន់ បេសកទូតចិន ក៏បានទៅដល់អង្គរនៅឆ្នាំ១២៩៦ ផងដែរ ហើយលោកបានសរសេរកំណត់ត្រាពី «ប្រពៃណីអ្នកស្រុកចេនឡា»។ 

 

បន្ថែមពីនេះ ប្រមុខរដ្ឋាភិបាលចិន បានកត់សម្គាល់ថា ទំនាក់ទំនងប្រជាជន និងប្រជាជន ជាសសរស្តម្ភមួយនៃ ក្របខណ្ឌកិច្ចសហប្រតិបត្តិការត្បូងពេជ្រ ហើយលោកសង្ឃឹមថា ពិធីបើកឆ្នាំនៃការផ្លាស់ប្តូរប្រជាជន និងប្រជាជនរវាងចិន-កម្ពុជា ២០២៤ ជាឱកាសសម្រាប់លើកតម្កើងទំនាក់ទំនងប្រជាជន និងប្រជាជន និងរួមគ្នាអនុវត្តគំនិតផ្តួតផ្តើមអរិយធម៌សកល។ 

 

បន្ថែមពីនេះ លោកនាយករដ្ឋមន្រ្តី ក៏បានអំពាវនាវឱ្យពង្រឹងកិច្ចសហប្រតិបត្តិការក្នុងការការពារបេតិកភណ្ឌវប្បធម៌ សិល្បៈ ការអប់រំ វេជ្ជសាស្រ្ត ការថែរក្សាសុខាភិបាល និងកិច្ចសហការនៅថ្នាក់តំបន់ផងដែរ។ ក្នុងលិខិតអបអរដដែលនោះ លោក លី បានជំរុញរួមគ្នាផ្សព្វផ្សាយវិស័យទេសចរណ៍រវាងប្រទេសទាំងពីរ, បង្កើនការផ្លាស់ប្តូររវាងប្រជាជន និងប្រជាជន និងវប្បធម៌ជាដើម។

 

សូមបញ្ជាក់ថា ពិធីបើកឆ្នាំនៃការផ្លាស់ប្តូរប្រជាជន និងប្រជាជនរវាងចិន-កម្ពុជា ២០២៤ ត្រូវបានធ្វើឡើងនៅបរិវេណ ព្រះលានជល់ដំរី ខេត្តសៀមរាប ដោយមានវត្តមានសម្តេច ទៀ បាញ់ នៅថ្ងៃទី១៣ ខែមករា៕