សេដ្ឋកិច្ចអន្តរជាតិ
អន្តរជាតិ
ក្រុមហ៊ុនជប៉ុន មានទុទិដ្ឋិនិយមចំពោះសេដ្ឋកិច្ចចិនឆ្នាំ២០២៤ បុគ្គលិកធ្វើការក្នុងរោងចក្រមួយនៅខេត្ត Shaanxi ប្រទេសចិន ។ រូបភាព ៖ Xinhua
× ក្រុមហ៊ុនជប៉ុនចំនួន១៧០០ ដែលកំពុងធ្វើអាជីវកម្មនៅចិនយល់ថា សេដ្ឋកិច្ចចិននៅឆ្នាំនេះអាចនឹងមិនមានភាពប្រសើរឡើង ឬកាន់តែអាក្រក់ជាងនេះ ដោយសារតម្រូវការខ្សោយ ការព្រួយបារម្ភលើច្បាប់សន្តិសុខជាតិ និងវិបត្តិអចលនទ្រព្យដែលអូសទម្លាក់កំណើនសេដ្ឋកិច្ចចិន។
ការស្ទង់មតិមួយនៅថ្ងៃទី១៥ ខែមករាដោយសភាពាណិជ្ជកម្ម និងឧស្សាហកម្មជប៉ុននៅ ចិនបានបង្ហាញថា ក្រុមហ៊ុនជប៉ុននៅចិនបានព្យាករសម្រាប់ទស្សនវិស័យសម្រាប់សេដ្ឋកិច្ចធំទីពីររបស់ពិភពលោកឆ្នាំ២០២៤ នៅតែភាពអាប់អួរ ដោយប្រហែល៧៥ភាគរយនៃអាជីវកម្មចំនួន ១៧០០ដែលត្រូវបានស្ទង់មតិយល់ថា សេដ្ឋកិច្ចចិននឹងនៅតែបន្តលូតលាស់តិចតួច ឬកាន់តែអាក្រក់ជាងនេះ។
បច្ចុប្បន្ន ចិនជាដៃគូពាណិជ្ជកម្មដ៏ធំបំផុតរបស់ជប៉ុន ហើយក៏ជាគោលដៅវិនិយោគកំពូលសម្រាប់អាជីវកម្មជប៉ុនផងដែរ។ ក្រុមហ៊ុនជប៉ុនមួយចំនួនអះអាងថា ដោយសារទស្សនវិស័យសេដ្ឋកិច្ចមិនស្ថិតស្ថេរ និងតម្រូវការខ្សោយទើបសេដ្ឋកិច្ចអាចនឹងមានភាពអាប់អួរ។ ទន្ទឹមនេះ ក្រុមហ៊ុនមួយចំនួនមានការព្រួយបារម្ភផងដែរអំពីបទប្បញ្ញត្តិរបស់ចិនស្តីពីសន្តិសុខជាតិ និងទិន្នន័យឆ្លងដែនជាដើម។
យ៉ាងណា ពាក់កណ្តាលនៃក្រុមហ៊ុនដែលចូលរួមក្នុងការស្ទង់មតិនៅតែជឿជាក់ថា ចិនស្ថិតនៅក្នុងទីផ្សារដ៏សំខាន់បំផុតទាំង៣ នៅទូទាំងពិភពលោកក្នុងឆ្នាំនេះ។ ក្រុមហ៊ុនជប៉ុនភាគច្រើនរំពឹងថាបរិយាកាសធុរកិច្ចនៅចិននឹងប្រសើរឡើងដូចជាកាត់បន្ថយបទប្បញ្ញត្តិទិដ្ឋាការ និងកាត់បន្ថយថ្លៃពលកម្ម។
គួរបញ្ជាក់ថា ចិននៅសប្តាហ៍នេះរំពឹងថានឹងប្រកាសពីតួលេខផលិតផលក្នុងស្រុកសរុបសម្រាប់ត្រីមាសទី៤ នៃឆ្នាំ២០២៣ ។ ការស្ទង់មតិរបស់ទីភ្នាក់ងារព័ត៌មាន AFP បង្ហាញថាចិនមានកំណើនត្រឹមតែ ៥,២ភាគរយដែលជាកម្រិតទាបបំផុតចាប់តាំងពីឆ្នាំ ១៩៩០ ប្រសិនបើមិនរាប់បញ្ចូលអំឡុងពេលកូវីដ-១៩។ យ៉ាងណា តួលេខនេះនៅតែបំពេញតាមគោលដៅកំណើនដែលចិនបានកំណត់កាលពីដើមឆ្នាំ ២០២៣ ប្រមាណ ៥ភាគរយ។
សេដ្ឋកិច្ចរបស់ចិននៅតែប្រឈមមុខនឹងបញ្ហាជាច្រើននៅពេលបើកឡើងវិញ ក្រោយពីជំងឺកូវីដ-១៩។ ការនាំចេញរបស់ចិនកាលពីឆ្នាំ២០២៣ បានធ្លាក់ចុះជាលើកដំបូងក្នុងរយៈពេល៧ឆ្នាំ ដោយសារតែតម្រូវការខាងក្រៅខ្សោយ។ ទន្ទឹមនេះ តម្រូវការក្នុងស្រុកដែលធ្លាក់ចុះបានធ្វើឲ្យសេដ្ឋកិច្ចធ្លាក់ចុះក្នុងបរិត្តផរណារយៈពេល ៣ខែជាប់គ្នា។ វិបត្តិអចលនទ្រព្យក៏មិនបង្ហាញសញ្ញានៃការប្រសើរឡើងច្រើនដែរ។
សម្រាប់ឆ្នាំ២០២៤ ធនាគារពិភពលោក (WB) បានព្យាករថា កំណើនសេដ្ឋកិច្ចរបស់ចិននឹងថយចុះមកត្រឹម ៤,៥ភាគរយ ។ ចំណែកអ្នកសេដ្ឋកិច្ចរបស់ AFP បានដាក់តួលេខនេះនៅត្រឹម ៤,៧ភាគរយ៕
Tag:
ជប៉ុន
ចិន
សេដ្ឋកិច្ច
© រក្សាសិទ្ធិដោយ thmeythmey.com