ទាក់ទិននឹងដំណើរទស្សនកិច្ចរបស់ថ្នាក់ដឹកនាំកម្ពុជានៅបារាំង លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃកម្ពុជា បានកត់សម្គាល់ថា ជាការបង្ហាញពីការអភិវឌ្ឍទំនាក់ទំនងដ៏ល្អមួយ និងជាច្រកការទូតរបស់កម្ពុជា ក្នុងការធ្វើពិពិធកម្ម។ 

 

«ការផ្លាស់ប្តូរទំនាក់ទំនងផ្លូវរដ្ឋ និងផ្លូវការញឹកញាប់បែបនេះ គឺសបញ្ជាក់ឱ្យឃើញពីភាពរីកចម្រើននៃទំនាក់ទំនងប្រទេសយើងទាំងពីរ ហើយក៏ជាក្តីសង្ឃឹមមួយ ជាសញ្ញាវិជ្ជមានដ៏សំខាន់មួយ ស្របពេលទំនាក់ទំនងប្រទេសទាំងពីរកាន់តែឈានឡើងក្នុងកម្រិតខ្ពស់មួយទៀត»។ ប្រធានវិទ្យាស្ថានទំនាក់ទំនងអន្តរជាតិនៃកម្ពុជា បានសង្កត់ធ្ងន់បែបនេះ នៅក្នុងកិច្ចសម្ភាសតាមប្រព័ន្ធទូរសព្ទ នៅថ្ងៃទី១៦ ខែមករា។ 

 

ទន្ទឹមនេះ លោក គិន ភា បានយល់ឃើញផងដែរថា បារាំង បានដើរតួនាទីដ៏សំខាន់ក្នុងការអភិវឌ្ឍ និងជាច្រកការទូតសេដ្ឋកិច្ចសម្រាប់កម្ពុជា។ ត្រង់ចំណុចនេះ ប្រធានវិទ្យាស្ថានទំនាក់ទំនងអន្តរជាតិនៃកម្ពុជា បានពន្យល់ថា ប្រសិនបើកម្ពុជា អាចអូសទាញការវិនិយោគមកកម្ពុជាពីបារាំងបានបន្ថែមទៀត វាអាចជាសារវិជ្ជមានមួយ សម្រាប់បណ្តាប្រទេសផ្សេងៗទៀតនៅសហភាពអឺរ៉ុប និងប្រទេសលោកខាងលិច ដោយសារបារាំងជាឆ្អងខ្នងដ៏សំខាន់មួយរបស់សហភាពអឺរ៉ុប។ 

 

បន្ថែមពីនេះ លោកបណ្ឌិត បានបន្តថា បើកម្ពុជាអាចពង្រឹងទំនាក់ទំនងការទូតក្នុងកម្រិតខ្ពស់មួយទៀតជាមួយបារាំង ការធ្វើពិពិធកម្មការទូតរបស់កម្ពុជា នឹងកាន់តែមានប្រសិទ្ធភាព និងទទួលបានលទ្ធផលខ្ពស់ ដែលអាចលាងសម្អាតកេរ្តិ៍ឈ្មោះកម្ពុជាពីការលំអៀងទៅរកចិន។ 

 

មិនតែប៉ុណ្ណោះ លោក គិន ភា បានលើកឡើងពីតួនាទីដ៏សំខាន់របស់បារាំង ក្នុងវិស័យសុខាភិបាលនៅកម្ពុជាផងដែរ ដោយលោកជំរុញឱ្យមានការវិនិយោគបន្ថែមពីក្រុមហ៊ុនបារាំង។ បើតាម ប្រធានវិទ្យាស្ថានទំនាក់ទំនងអន្តរជាតិនៃកម្ពុជា ការបើកមន្ទីរពេទ្យបារាំងដ៏ធំនៅកម្ពុជា មិនត្រឹមជួយប្រជាជនប៉ុណ្ណោះទេ ប៉ុន្តែអាចទាក់ទាញភ្ញៀវទេសចរ តាមរយៈទេសចរណ៍វេជ្ជសាស្រ្ត។

 

សូមបញ្ជាក់ថា ទំហំពាណិជ្ជកម្មរវាងកម្ពុជា និងបារាំងមានទំហំប្រមាណ ៥៤២លានដុល្លារ នៅក្នុងឆ្នាំ២០២២ ដោយកម្ពុជានាំចេញទៅបារាំងមានទំហំ ៤២៣លានដុល្លារ ខណៈនាំចូលមានទំហំ ១១៩លានដុល្លារ។ ទំនិញកម្ពុជានាំទៅបារាំងមានដូចជា ស្បែកជើង សំលៀកបំពាក់ និងថ្នាំពេទ្យជាដើម៕