សេដ្ឋកិច្ចអន្តរជាតិ
អន្តរជាតិ
ថៃកំពុងជំរុញការនាំចេញអង្ករឲ្យបាន ៨,៥លានតោននៅឆ្នាំ២០២៤ រូបភាព ៖ Bangkok Post
× ថៃដាក់គោលដៅនាំចេញអង្ករឲ្យបាន ៨,៥លានតោននៅឆ្នាំ២០២៤ ។ ថ្មីៗនេះរដ្ឋាភិបាលថៃបានបានចុះកិច្ចព្រមព្រៀងជាមួយឥណ្ឌូណេស៊ីក្នុងការនាំចេញអង្ករ ១លានតោន។ ទន្ទឹមនេះ ថៃក៏កំពុងចរចារពង្រីកទីផ្សារអង្ករជាមួយអាម៉េរិក អ៊ីរ៉ង់ អារ៉ាប៊ីសាអូឌីត និងប្រទេសអាហ្វ្រិកមួយចំនួនផងដែរ។
ថៃកំពុងជំរុញយ៉ាងសកម្មនូវការនាំចេញអង្ករទៅកាន់ទីផ្សានានាជុំវិញពិភពលោក។ ជាពិសេសនៅឆ្នាំ២០២៤ រដ្ឋាភិបាលថៃបានចុះកិច្ចព្រមព្រៀងជាមួយរដ្ឋាភិបាលឥណ្ឌូណេស៊ីក្នុងការនាំចេញអង្ករឲ្យបាន ១លានតោន ក៏ដូចជា ១លានតោនផ្សេងទៀតជាមួយវិស័យឯកជន។
គោលដៅនេះ គឺដើម្បីឈានទៅដល់ការនាំចេញអង្ករសរុបឲ្យបានជាង ៨,៥លានតោននៅដំណាច់ឆ្នាំ២០២៤។ នេះបើតាមសារព័ត៌មាន The Nation ដកស្រង់សម្តីរដ្ឋមន្រ្តីក្រសួងពាណិជ្ជកម្មថៃលោក Phumtham Wechayachai នៅថ្ងៃទី១៧ ខែមករា។ បច្ចុប្បន្នថៃជាប្រទេសនាំចេញអង្ករធំទីពីររបស់ពិភពលោកបន្ទាប់ពីឥណ្ឌា។
ចាប់ពីថ្ងៃទី ១៧-២២ ខែមករា លោក Phumtham Wechayachai កំពុងធ្វើទស្សនកិច្ចនៅអាម៉េរិក ដើម្បីចរចាពង្រីកទីផ្សារអង្ករ និងជំរុញទំនាក់ទំនងពាណិជ្ជកម្ម និងវិនិយោគ ជាពិសេសស្វែងរកអ្នកនាំចូលអង្ករថ្មីនៅក្នុងទីផ្សាអាម៉េរិក។
ក្រៅពីអាម៉េរិក លោក Phumtham Wechayachai បានអះអាងថា ថៃកំពុងពិភាក្សាជាមួយដៃគូនាំចូលអង្ករផ្សេងទៀតដូចជា អ៊ីរ៉ង់ អារ៉ាប៊ីសាអូឌីត និងប្រទេសអាហ្វ្រិកមួយចំនួន។
គួរបញ្ជាក់ថា រយៈពេល ១១ខែនៃឆ្នាំ២០២៣ ថៃបាននាំចេញអង្ករចំនួន ៧,៩៤លានតោន កើនឡើង ១៤,៧ភាគរយបើធៀបនឹងរយៈពេលដូចគ្នាកាលពីឆ្នាំ២០២២។ តម្លៃនាំចេញអង្ករក្នុងអំឡុងពេលនេះសម្រេចបាន ៤,៦១ពាន់លានដុល្លារ កើនឡើង២៨,៩ភាគរយ។
ទីផ្សារនាំចេញអង្ករកំពូលៗរបស់ថៃ មានឥណ្ឌូណេស៊ីចំនួន ១,២៧លានតោន បន្ទាប់មកមានអាហ្វ្រិកចំនួន ៨៧៦១៨៤តោន អ៊ីរ៉ាក់ចំនួន ៨១៤៨០៥តោន អាម៉េរិកចំនួន ៦៤៨៩៤៦តោន និងចិនចំនួន ៣៦៧២០៤តោន។ នេះបើតាមសារព័ត៌មានថៃ The Nation ដកស្រង់ទិន្នន័យពីក្រសួងពាណិជ្ជកម្មថៃ៕
© រក្សាសិទ្ធិដោយ thmeythmey.com