កីឡាអន្តរជាតិ
អន្តរជាតិ
Mbappe ថាកាលវិភាគបាល់ទាត់មមាញឹកបង្កហានិភ័យ ដូចប្រកួត NBA
× Kylian Mbappe និយាយថាការបង្កើនកាលវិភាគដ៏មមាញឹកសម្រាប់បាល់ទាត់អឺរ៉ុប កំពុងតែឆ្លុះបញ្ចាំងពីភាពស្រដៀងទៅនឹងការប្រកួតលីគបាល់បោះ NBA។ កីឡាករវ័យ ២៥ឆ្នាំ ព្រមានពីការប្រកួតញឹកញាប់ នឹងផ្តល់ប៉ះពាល់ដល់កីឡាករ ការគ្រប់គ្រង និងបន្ទុកបែបកីឡាបាល់បោះ មកលើវិស័យបាល់ទាត់។
នៅក្នុងកិច្ចសម្ភាសជាមួយកម្មវិធី British GQ កីឡាករសញ្ជាតិបារាំង បានបញ្ជាក់ថាកាលវិភាគដ៏មមាញឹក នឹងបង្កឱ្យមានជម្លោះរវាងកីឡាករ ក្រុម និងអ្នកគាំទ្រ។ កាលពីរដូវកាល ២០២២-២៣ Mbappe បង្ហាញខ្លួនលេងចំនួន ៦៣ប្រកួត សម្រាប់ក្លិប Paris Saint Germain មិននៅក្រុមជម្រើសជាតិបារាំង ដែលជាចំនួនការប្រកួតដ៏ច្រើន។
Mbappe បកស្រាយទៅលើបញ្ហាកាលវិភាគប្រកួតដូច្នេះ៖ «យើងកំពុងតែខិតជិតទៅនឹងរបៀបស្រដៀងនឹងការប្រកួត NBA ជាមួយការប្រកួត ១រដូវកាល មាន ៧០លើក។ សម្រាប់ខ្ញុំ ខ្ញុំមិនពេញចិត្តចំពោះការលេងច្រើនប្រកួតឡើយ តែយើងក៏មិនអាចធ្វើបានល្អរហូត ដូចដែលអ្នកគាំទ្របានរំពឹងនោះទេ។ ក្នុង NBA កីឡាករ គឺមិនបានលេងល្អគ្រប់ការប្រកួតឡើយ ព្រមទាំងមានសិទ្ធិទៅគ្រប់គ្រងទៅអនុវត្តការងារដទៃ ដែលពួកគេកំពុងមានបន្ទុក។ ប៉ុន្តែបើខ្ញុំវិញនិយាយថា ហត់នឿយ ខ្ញុំមិនលេងនៅសប្តាហ៍នេះ! វានឹងក្លាយជារឿងមិនល្អ ព្រោះអ្នកទស្សនាដែលទិញសំបុត្រ គឺដើម្បីឃើញយើងប្រកួត។[…]»។
មិនតែប៉ុណ្ណោះ ប្រធានក្រុម PSG បានលើកឡើងពីបញ្ហាវេលាការប្រកួត ដើម្បីស្នើដល់ស្ថាប័នគ្រប់គ្រងបាល់ទាត់ក្នុងតំបន់ និងពិភពលោក ស្វែងរកដំណោះស្រាយដែលល្អសម្រាប់កីឡាករ។
កាលពីសប្តាហ៍មុន Mbappe ត្រូវបានគេប្រទះឃើញទៅទស្សនាការប្រកួតកីឡាបាល់បោះ NBA ដែលធ្វើឡើងនៅក្នុងទីក្រុងប៉ារីស ប្រទេសបារាំង ហើយជាការប្រកួតរវាងក្រុម Cleveland Cavaliers បានបំបាក់ក្រុម Brooklyn Nets។ នៅពេលត្រូវសួរនាំពីការផ្លាស់ប្តូរនៅក្នុងវិស័យបាល់ទាត់ តារាឆ្នើម PSG បានរំឮកពីការចាកចេញរបស់អតីតមិត្តរួមក្រុមដូចជា Lionel Messi និង Neymar ទៅតាមលីគបាល់ទាត់រៀងៗខ្លួន ដូចជាអាម៉េរិក និងអារ៉ាប៊ីសាអូឌីត ដោយចាត់ទុកថាជាការផ្លាស់ប្តូរនៃប្រវត្តិសាស្ត្របាល់ទាត់ ពីមួយជំនាន់ទៅមួយជំនាន់។
«កីឡាករអស្ចារ្យជាច្រើន ដែលធ្លាប់បានបង្កើតប្រវត្តិសាស្ត្រដ៏អស្ចារ្យនៃបាល់ទាត់ បានចាកចេញពីអឺរ៉ុប ហើយពេលនេះ យើងកំពុងឈានជើងចូលទៅក្នុងយុគសម័យថ្មី។ រឿងនេះបានក្លាយជាផ្នែកមួយនៃវដ្ដរបស់កីឡា ហើយនៅពេលណាមួយ វានឹងក្លាយជាវេនរបស់ខ្ញុំដែលត្រូវចាកចេញ។ ខ្ញុំមិនព្រួយទេ ពីការផ្លាស់ប្តូរ តែខ្ញុំគ្រាន់តែគិតពីការបន្តអាជីព តាមក្តីស្រមៃរបស់ខ្ញុំ។»។ Mbappe បានលើកឡើងបែបនេះ។
Mbappe ត្រូវបានគេដឹងថា បានយល់ព្រមលើសំណើ ផ្ទេរទៅកាន់ Real Madrid នៅរដូវកាល ២០២៤-២៥។ នេះបើតាមប្រភពស្និទ្ធនឹងកិច្ចព្រមព្រៀង បានប្រាប់ទៅកាន់ទូរទស្សន៍ ESPN កាលពីពេលថ្មីៗនេះ។ ទោះជាយ៉ាងណា កីឡាករវ័យ ២៥ឆ្នាំរូបនេះ អះអាងថា គេទើបជាអ្នកមានសិទ្ធិសម្រេចថានៅបន្ត ឬចាកចេញពីក្លិប នៅប្រទេសបារាំង៕
Tag:
Kylian Mbappe
Paris Saint Germain
© រក្សាសិទ្ធិដោយ thmeythmey.com