RFI
អន្តរជាតិ
រុស្ស៊ី៖ អគ្គិភ័យឆេះទីតាំងស្តុកឧស្ម័ន១កន្លែង បង្កចេញពី«កម្លាំងខាងក្រៅ» អគ្គិភ័យឆេះទីតាំងស្តុកឧស្ម័នរុស្ស៊ី១កន្លែង បង្កចេញពី«កម្លាំងខាងក្រៅ»។
×
ដោយ៖ហេង ឧត្តម/RFI
APគ្រោះអគ្គិភ័យ បានឆាបឆេះទីតាំងស្តុកឧស្ម័នរុស្ស៊ី ១ កន្លែង នៅយប់ថ្ងៃសៅរ៍ឈានចូលថ្ងៃអាទិត្យ។ ក្រុមហ៊ុនសារព័ត៌មានរុស្ស៊ី នូវាតេក រាយការណ៍ថា ហេតុការណ៍ឆេះនេះព្រោះតែបង្កឡើងពី«កម្លាំងខាងក្រៅ»។ ប្រភពដដែល បញ្ជាក់ថា ទីតាំងភ្លើងឆេះនោះ គឺមានចម្ងាយឋិតនៅ ១១០ គីឡូម៉ែត្រ ពីប៉ែកខាងលិច ទីក្រុង សាំង-ប៉េតែរស្បួក និងនៅជិតនឹងព្រំដែនរបស់ប្រទេស អេស្តូនី ហើយនិងនៅប្រហែល ១ ០០០ គីឡូម៉ែត្រពីព្រំដែនអ៊ុយក្រែន។
ក្នុងសីតុណ្ហភាពត្រជាក់ដក១០ក្រោមសូន្យអង្សា ក្រុមសង្គ្រោះនិងពន្លត់អគ្គិភ័យនាំគ្នាប្រឹងដុតដៃដុតជើង ជួយពន្លត់ភ្លើង។ អាជ្ញាធរមូលដ្ឋានម្នាក់ បានប្រាប់កាសែតរុស្ស៊ីថា ភ្លើងឆាបឆេះឡើងនៅម៉ោងប្រមាណ ២និង៤៥នាទី ប៉ុន្តែ ក្រសួងមានសមត្ថកិច្ចនិងក្រុមពន្លត់អគ្គិភ័យនៅមូលដ្ឋាន បានចាត់ចែងទប់ទល់ទាន់ពេលវេលា។ ទីបំផុត គ្រោះអគ្គិភ័យនោះ បានរលត់វិញហើយ ហើយចំណែកតុល្យការបឋម គឺគ្មានអ្នករងរបួស គ្មានអ្នកស្លាប់ ឬត្រូវខូចខាតសុខភាពបុគ្គលិកធ្វើការនៅទីនោះទេ។ នេះបើតាមសារព័ត៌មានក្នុងស្រុករុស្ស៊ី។ ទន្ទឹមនោះ អភិបាលក្រុងលេនីនក្រាត លោក អាឡិចសង់ ដ្រូសដែនស្កូ ក៏បានសរសេរបញ្ជាក់ក្នុងតេលេក្រាមរបស់គាត់ថា «គ្មានមនុស្សរបួសទេ។ គ្រប់គ្នាត្រូវជម្លៀសចេញពីគ្រោះថ្នាក់អស់ហើយ។»។
នៅពេលភ្លាមៗ ទាំងសារព័ត៌មានរុស្ស៊ី នូវាតេក និងទាំងអាជ្ញាធរមូលដ្ឋាន ពុំទាន់អាចបញ្ជាក់បាននៅឡើយទេអំពីដើមហេតុដែលបណ្តាលឲ្យភ្លើងឆេះ គឺពួកគេគ្រាន់តែលើកឡើងយ៉ាងខ្លី ថាអាចមកពី«កម្លាំងខាងក្រៅ»។
ទោះបីជា សារព័ត៌មានរុស្ស៊ី និងអាជ្ញាធរមូលដ្ឋានរុស្ស៊ី ពុំបានបញ្ជាក់ពីដើមចមមូលហេតុភ្លើងឆេះ និងអ្នកប្រព្រឹត្តក្តី ប៉ុន្តែគេបានដឹងថា កងកម្លាំងអ៊ុយក្រែន ធ្លាប់បានអះអាងទទួលស្គាល់ស្នាដៃរបស់ខ្លួន ចំពោះការវាយប្រហារបញ្ឆេះកន្លែងស្តុកប្រេងរុស្ស៊ី ចំនួន ២ កន្លែង រួចទៅហើយ កាលពីសប្តាហ៍កន្លងទៅ។
គួរជ្រាបថា កន្លែងស្តុកឧស្ម័នរុស្ស៊ីដែលត្រូវភ្លើងឆេះនេះ ជាកន្លែងបំប្លែងឧស្ម័នមួយដ៏សំខាន់ នៅទីក្រុង លូស្ត-លូហ្កា។ ទីនោះមិនត្រឹមតែស្តុកឧស្ម័នទេ ក៏មានស្តុកដែរ ប្រេងសម្រាប់យន្តហោះ និងប្រេងសម្រាប់នាវា។ កន្លែងឆេះឧស្ម័នលើកនេះ ក៏ជាសាខា១សម្រាប់បញ្ចូនឧស្ម័ន របស់ក្រុមហ៊ុន Nord Stream 2 ទៅកាន់ប្រទេសអាល្លឺម៉ង់។ Nord Stream 2 តាំងតែពីឆេះ នៅខែតុលា២០២២ មក គឺនៅមិនទាន់ដំណើរការឡើងវិញនៅឡើយទេ។
ជាការកត់សម្គាល់ តាំងតែពីផ្ទុះសង្គ្រាមឈ្លានពានអ៊ុយក្រែនមក រដ្ឋអំណាចរុស្ស៊ី តែងតែព្យាយាមធ្វើយ៉ាងណា ប្រឹងបញ្ជៀសគ្រោះថ្នាក់ដល់ជីវិតប្រចាំថ្ងៃរបស់ពលរដ្ឋរុស្ស៊ី។ ប៉ុន្តែ នៅពេលការបោះឆ្នោតរើសប្រធានាធិបតីរុស្ស៊ី នាខែមីនា កាន់តែកៀក អ៊ុយក្រែនកាន់តែពឺតវាយប្រហារបកទៅរុស្ស៊ីវិញ គ្រប់ច្រកល្ហក៕
© រក្សាសិទ្ធិដោយ thmeythmey.com