ក្នុងដំណើរទស្សនកិច្ចនៅចិន លោក Shavkat Mirziyoyev ប្រធានាធិបតីអ៊ូសបេគីស្ថាន បានជួបពិភាក្សាការងារជាមួយសមភាគីចិន លោក ស៊ី ជិនភីង ​នៅថ្ងៃទី២៤ ខែមករា។ 

 

ក្នុងជំនួបដ៏សំខាន់នេះ លោកស៊ី បានថ្លែងថា រដ្ឋាភិបាលក្រុងប៉េកាំងបានត្រៀមខ្លួនរួចជាស្រេចក្នុងការ ពង្រីកកិច្ចសហប្រតិបត្តិការជាមួយអ៊ូសបេគីស្ថាននៅទូទាំងខ្សែច្រវាក់ផលិតកម្ម ឧស្សាហកម្មរថយន្ត ថាមពលថ្មី ក៏ដូចជានៅក្នុងគម្រោងធំៗដូចជា ថាមពលសូឡា ថាមពលខ្យល់ និងវារីអគ្គិសនី។

 

ទន្ទឹមនេះ មេដឹកនាំចិន បានអំពាវនាវឱ្យការងារលើការសាងសង់គម្រោងផ្លូវដែកចិន-កៀហ្ស៊ីស៊ីស្ថាន -អ៊ូសបេគីស្ថាន ចាប់ផ្តើមបានឆាប់តាមដែលអាចធ្វើទៅបានផងដែរ។

 

គម្រោងផ្លូវដែកនេះ គឺសំខាន់ណាស់សម្រាប់ចិន ដើម្បីដឹកទំនិញជាច្រើនមុខទៅអឺរ៉ុបតាមផ្លូវដី ដោយមិនឆ្លងកាត់រុស្ស៊ី ដែលកំពុងតែស្ថិតក្រោមទណ្ឌកម្មរបស់លោកខាងលិច។ មិនតែប៉ុណ្ណោះ ផ្លូវដែកនេះ នឹងជួយចិន ក្នុងការកាត់បន្ថយការចំណាយលើការដឹកជញ្ជូន និងរយៈពេលដឹកទំនិញទៅកាន់អឺរ៉ុបផងដែរ។ 

 

គម្រោងផ្លូវដែកនេះ បានចាប់ផ្តើមចរចាតាំងពីទសវត្សរ៍ឆ្នាំ១៩៩០ មកម្លេះ ប៉ុន្តែនៅតែមិនទាន់លេចជារូបរាងឡើងឡើយ។ រហូតដល់រុស្ស៊ីឈ្លានពានអ៊ុយក្រែន ចិនបានខិតខំយ៉ាងខ្លាំងដើម្បីធ្វើឱ្យផ្លូវដែកនោះ ត្រូវបានសាងសង់ឡើង ដើម្បីជួយដីទំនិញខ្លួន ជំរុញឱ្យរុស្ស៊ី។

 

សូមបញ្ជាក់ថា ចិន និងអ៊ូសបេគីស្ថាន បានអភិវឌ្ឍទំនាក់ទំនងទៅជា «ភាពជាដៃគូគ្រប់កាលៈទេសៈ» ដើម្បីអាចផ្តោតកិច្ចសហប្រតិបត្តិការទាំងនៅក្នុងស្រុក និងអន្តរជាតិ។ ចិន ក៏មានភាពជាដៃគូគ្រប់កាលៈទេសៈ ស្រដៀងគ្នានេះជាមួយបេឡារុសផងដែរ៕