RFI
អន្តរជាតិ
ហ្វីលីពីន និង វៀតណាម ចាប់ដៃសហការគ្នាទប់ទល់នឹង ចិន ក្នុងបញ្ហាសមុទ្រចិនខាងត្បូង ថ្នាក់ដឹកនាំហ្វីលីពីន លោកប្រធានាធិបតី ហ្វ៊ែរឌីណង់ ម៉ាកូស ជូញ៉រ ជួបថ្នាក់ដឹកនាំវៀតណាម នៅហាណូយ ថ្ងៃទី៣០ មករា ២០២៤។ AP - Hoang Thong Nhat
×
ដោយ៖ ហេង ឧត្តម/RFI
ប្រឈមនឹងស្ថានការណ៍កាន់តែតានតឹងខ្លាំងចំពោះមុខមហាយក្សចិន, វៀតណាម និង ហ្វីលីពីន បានចាប់ដៃសហការគ្នា ក្នុងសំណុំបញ្ហាជម្លោះសមុទ្រចិនខាងត្បូង។ រដ្ឋាភិបាលទីក្រុងហាណូយ និងម៉ានីល បានប្រកាសចុះអនុស្សារណៈយោគយល់គ្នាមួយ នៅថ្ងៃទី៣០មករា ដើម្បីដោះដូរព័ត៌មានបន្ទាន់ និងអនុញ្ញាតឲ្យឆ្មាំសមុទ្រធ្វើការរួមគ្នា សម្រាប់ឆ្លើយតបនឹងបញ្ហាចំពោះមុខ។ ការចុះកិច្ចព្រមព្រៀងនេះ ធ្វើឡើងនៅក្នុងដំណើរទស្សនកិច្ចផ្លូវការ ចំនួន២ថ្ងៃ របស់ប្រធានាធិបតីហ្វីលីពីន នៅប្រទេសវៀតណាម។
ក្នុងដំណើរទស្សនកិច្ចផ្លូវរដ្ឋនៅវៀតណាម ប្រធានាធិបតីហ្វីលីពីន ហ្វ៊ែរឌីណង់ ម៉ាកូស ជូញ៉រ មានប្រសាសន៍គូសបញ្ជាក់ថា កិច្ចព្រមព្រៀង ស្តីអំពី កិច្ចសហប្រតិបត្តិការផ្លូវសមុទ្រ រវាងវៀតណាមនិងហ្វីលីពីន ឈរនៅលើស្មារតីពង្រឹងការយោគយល់គ្នា ពង្រីកភាពជឿជាក់រួមទាំង២ភាគី ហើយបង្កើតទំនុកទុកចិត្តគ្នាឲ្យកាន់តែខ្លាំង។
ការចុះកិច្ចព្រមព្រៀងសហការគ្នានេះ បន្ទាប់ពី ហ្វីលីពីន បានជួបប្រឈមនឹងស្ថានការណ៍កាន់តែតានតឹងខ្លាំងចំពោះមុខមហាយក្សចិន។ ភាពតានតឹងខ្លាំង រវាង ហ្វីលីពីន និងចិន ឈានរហូតដល់ប៉ះទង្គិចគ្នានៅលើសមុទ្រទៀតផង នាប៉ុន្មានខែចុងក្រោយនេះ។ នេះក៏ព្រោះតែ ចិន ពឺតប្រឹងធ្វើសមយុទ្ធយោធាកាន់តែច្រើនឡើងៗ ហើយនាវាចិន និង ទូកនេសាទចិន ក៏បានឆ្លងចូលដែនសមុទ្រដែលហ្វីលីពីនអះអាងថាកម្មសិទ្ធិជារបស់ខ្លួន។ ពីចំណែកខ្លួន ហ្វីលីពីន ក៏បានធ្វើសមយុទ្ធយោធាជើងទឹក ជាមួយសហរដ្ឋអាមេរិក ក៏ច្រើនខ្លាំងដែរ ហើយពេលកន្លងទៅ ហ្វីលីពីន ក៏ថែមទាំងអនុញ្ញាតឲ្យយោធាអាមេរិក ដាក់មូលដ្ឋានទ័ពនៅលើទឹកដីរបស់ខ្លួនទៀតផង។
ហ្វីលីពីនប្រជាធិបតេយ្យ និង វៀតណាមកុម្មុយនិស្តសង្គមនិយម សុទ្ធតែជាសម្ព័ន្ធមិត្តរបស់សហរដ្ឋអាមេរិក។ ប្រទេសទាំងនេះមានសត្រូវរួមគ្នា។ ក្នុងសំណុំរឿងសមុទ្រចិនខាងត្បូង វៀតណាម មានជម្លោះជាមួយ ចិន ត្រង់ប្រជុំកោះប៉ារ៉ាសែលស៍ (Paracels)។ ចំណែក ហ្វីលីពីន ឈ្លោះគ្នាជាមួយនឹង ចិន ត្រង់ប្រជុំកោះ ស្ព្រាតឡេស៍ (Sprathleys)។ នៅតំបន់អាស៊ីអាគ្នេយ៍ ក្រៅពី វៀតណាម និង ហ្វីលីពីន គឺនៅមានប្រទេស ម៉ាឡេស៊ី ព្រុយណេ និងឥណ្ឌូណេស៊ី ក៏កំពុងតែមានជម្លោះទាស់ទែងដណ្តើម ដែនទឹក និង ដីកោះ ជាមួយមហាយក្ស ចិន។
គួរជ្រាបដែរថា ក្នុងដំណើរទស្សនកិច្ចផ្លូវការ ចំនួន២ថ្ងៃ របស់ប្រធានាធិបតីហ្វីលីពីន លោក ហ្វ៊ែរឌីណង់ ម៉ាកូស ជូញ៉រ នៅប្រទេសវៀតណាម ក្រៅតែពីចុះកិច្ចព្រមព្រៀងសហការរួមគ្នាក្នុងសំណុំរឿងសមុទ្រចិន ថ្នាក់ដឹកនាំទាំង២ប្រទេស ក៏បានចុះកិច្ចព្រមព្រៀងខាងពាណិជ្ជកម្មដែរ។ វៀតណាម ជាប្រទេសនាំចេញគ្រាប់ធញ្ញជាតិ លំដាប់ទី១ច្រើនជាងគេ ចូលទៅ ហ្វីលីពីន ហើយចាប់ពីពេលនេះដល់៥ឆ្នាំខាងមុខ វៀតណាម ទទួលកិច្ចសន្យាថានឹងនាំចេញ អង្ករ ចំនួន ២ លានតោន ទៅ ហ្វីលីពីន។ ហ្វីលីពីន ក៏សង្ឃឹមថានឹងចូលរួមរកស៊ីជាមួយវៀតណាម នៅក្នុងការផលិតអាគុយឡានអគ្គិសនី៕
© រក្សាសិទ្ធិដោយ thmeythmey.com