នៅក្នុងរបាយការណ៍បច្ចុប្បន្នភាពសេដ្ឋកិច្ចសកលដែលបានចេញផ្សាយនៅថ្ងៃទី៣០ ខែមករា IMF ការព្យាករកំណើនសេដ្ឋកិច្ចពិភពលោកអាចកើនឡើង ៣,១ភាគរយក្នុងឆ្នាំ២០២៤ ដែលបន្ថែម ០,២ភាគរយបើធៀបនឹងការព្យាករដែលបានធ្វើឡើងក្នុងខែតុលា ឆ្នាំ២០២៣។ 

 

ការព្យាករសម្រាប់ឆ្នាំ២០២៥ មិនផ្លាស់ប្តូរទេគឺនៅអត្រា ៣,២ភាគរយ។ យ៉ាងណា កំណើននេះនៅតែទាបជាងកំណើនមធ្យមចន្លោះឆ្នាំ ២០០០-២០១៩ ដែលមានអត្រា ៣,៨ភាគរយ។

 

ទន្ទឹមនេះ ទំហំពាណិជ្ជកម្មសកលត្រូវបានព្យាករថានឹងកើនឡើង ៣,៣ភាគរយនៅឆ្នាំនេះ និង ៣,៦ភាគរយក្នុងឆ្នាំ ២០២៥។ កម្រិតទាំងពីរនេះគឺទាបជាងកម្រិតមធ្យម ៤,៩ភាគរយ ដោយសារវាសម្ពាធពីរបាំងពាណិជ្ជកម្មថ្មីដែលដាក់នៅទូទាំងពិភពលោក។

 

របាយការណ៍ IMF ដដែលបានលើកឡើងថា ទស្សនវិស័យពិភពលោកមានភាពប្រសើរឡើង ដោយសារការកើនឡើងនៃការចំណាយសាធារណៈ ឯកជន និងអត្រាចូលរួមកម្លាំងពលកម្មកើនឡើង។ ចំណែកខ្សែច្រវាក់ផ្គត់ផ្គង់បានងើបឡើងវិញជាបណ្តើរៗ ហើយតម្លៃថាមពល និងទំនិញក៏កើនឡើងផងដែរ។

 

យ៉ាងមិញ IMF ក៏បានព្រមានថា ហានិភ័យនៃការធ្លាក់ចុះសេដ្ឋកិច្ចនៅតែមាន។ ភាពតានតឹងភូមិសាស្ត្រនយោបាយនៅមជ្ឈិមបូព៌ា និងការវាយប្រហារនៅសមុទ្រក្រហមអាចរំខានដល់តម្លៃទំនិញ និងខ្សែច្រវាក់​ផ្គត់ផ្គង់។ លើសពីនេះ ប្រទេសដែលពន្យារពេលការប្រកាសគោលនយោបាយបង្រួបបង្រួមសារពើពន្ធ ក្នុងបរិបទនៃការបោះឆ្នោតសំខាន់ៗជាច្រើននៅឆ្នាំនេះ អាចជំរុញសកម្មភាពសេដ្ឋកិច្ច ប៉ុន្តែក៏អាចបង្កើនអតិផរណាផងដែរ។

 

IMF រក្សាការព្យាករអតិផរណាពិភពលោកនៅឆ្នាំនេះត្រឹមកម្រិត ៥,៨ភាគរយ ហើយកាត់បន្ថយវាមកត្រឹម ៤,៤ភាគរយនៅឆ្នាំ ២០២៥។ ជារួមអតិផរណានៅជុំវិញពិភពលោកនឹងធ្លាក់ចុះ លើកលែងតែអាហ្សង់ទីន។

 

អាម៉េរិក និងចិន ដែលជាប្រទេសមានសេដ្ឋកិច្ចធំជាងគេទាំងពីររបស់ពិភពលោក បានបង្កើនការព្យាករកំណើនរបស់ពួកគេនៅឆ្នាំនេះ។ កំណើន GDP របស់អាម៉េរិកត្រូវបានរំពឹងថានឹងកើនឡើង ២,១ភាគរយនៅឆ្នាំ ២០២៤ ដោយសារការគាំទ្រពីការប្រើប្រាស់ និងគោលនយោបាយសារពើពន្ធ។ ចំណែក GDP របស់ចិនអាចកើនឡើង ៤,៦ភាគរយនៅឆ្នាំ២០២៤ ។ នេះឆ្លុះបញ្ចាំងពីការគាំទ្រសារពើពន្ធពីរដ្ឋាភិបាលចិន និងផលប៉ះពាល់តិចតួចជាងការរំពឹងទុកនៃវិបត្តិអចលនទ្រព្យលើកំណើនសេដ្ឋកិច្ច៕