តារាបាល់ទាត់សញ្ជាតិប្រេស៊ីល ដែលផ្ទេរទៅកាន់ក្រុម Al Hilal កាលពីទីផ្សារដោះដូរដើមរដូវកាល ២០២៣​-២៤ រូបគេបានរងរបួសដាច់សរសៃ ACL និងជង្គង់ អំឡុងការបង្ហាញខ្លួនឱ្យក្រុមជម្រើសជាតិប្រេស៊ីល ក្នុងការប្រកួតជម្រុះ World Cup 2026 ទ្វីបអាម៉េរិកខាងត្បូង។ ការរងរបួសកើតឡើងក្រោយពេល Neymar បង្ហាញខ្លួនបានត្រឹម ៥លើក ជាមួយក្លិប Al Hilal។
 

កាលពីពេលថ្មីៗនេះ រូបភាពមួយត្រូវបានបង្ហោះនៅលើបណ្តាញសង្គមដោយបង្ហាញថា Neymar Jr ហាក់មានការឡើងទម្ងន់យ៉ាងខ្លាំងអំឡុងពេលសម្រាកព្យាបាលរបួស។

តែយ៉ាងណា កីឡាករវ័យ ៣១ឆ្នាំ បានឆ្លើយតបវិញ ដោយការបង្ហោះវីដេអូនៅលើបណ្តាញសង្គម Instagram បញ្ជាក់ពីរូបរាងគេផ្ទាល់។
  

 

​Neymar ក៏បានអះអាងក្នុងវីដេអូនោះដូច្នេះថា៖«មិនអីនោះទេ លើសទម្ងន់! ប៉ុន្តែពិតជាធាត់មែន? ខ្ញុំមិនគិតដូច្នេះទេ ហើយវីដេអូនេះសម្រាប់អ្នកស្អប់ខ្ញុំ អ្នកគួរតែបោះបង់ការគិតចោលនោះទៅ។»។
 

​កាលពីខែធ្នូ ឆ្នាំ ២០២៣ វិជ្ជបណ្ឌិតប្រចាំក្រុមជម្រើសជាតិប្រេស៊ីលលោក Rodrigo Lasmar បានបញ្ជាក់ថាកីឡាករដែលស៊ុតបាល់ឱ្យប្រេស៊ីលច្រើនជាងគេ កំពុងតែសម្រាកព្យាបាល ដោយមិនអាចបញ្ជាក់ពីពេលវេលាវិលត្រឡប់បានច្បាស់លាស់ឡើយ។
 

ជាលទ្ធផលបញ្ហារបួស បានរុញច្រានក្លិប Al Hilal សម្រេចចិត្តដកឈ្មោះអតីតកីឡាករក្រុម ​Paris Saint Germain ចេញពីបញ្ជីកីឡាកររបស់ក្រុម ហើយការវិលត្រឡប់របស់គេអាចនឹងនៅចុងបញ្ចប់រដូវកាលបន្ថែមទៀតផងដែរ។ Neymar មានកិច្ចសន្យាជាមួយនឹងក្រុម Al Hilal ដល់ឆ្នាំ ២០២៥៕