បើតាមការផ្សាយរបស់កាសែត BBC នៅថ្ងៃទី២ ខែកុម្ភៈ កំពូលអ្នកប្រណាំងរថយន្ត F1 វ័យ៣៩ឆ្នាំ បានផ្តាច់កិច្ចសន្យាជាមួយ Mercedes ដែលសល់សុពលភាព១ឆ្នាំទៀត ដោយទៅចុះកិច្ចសន្យាជាមួយ Ferrari រយៈពេលមួយរដូវកាលនៅឆ្នាំ២០២៥។ 
 

កាលពីឆ្នាំ២០២៣ Hamilton ធ្លាប់បានយល់ព្រមបន្តកិច្ចសន្យានឹង Mercedes រយៈពេល២ឆ្នាំ។ ប៉ុន្តែទោះបីជាយ៉ាងណា នៅក្នុងលក្ខខណ្ឌកិច្ចសន្យានោះ អ្នកប្រណាំងសញ្ជាតិអង់គ្លេស អាចមានជម្រើសបញ្ចប់មុននៅឆ្នាំចុងក្រោយ។
 

ក្រោយប្រកាសចាកចេញ Hamilton បានបង្ហាញមោទនភាពរបស់ខ្លួនចំពោះក្រុម Mercedes ដែលខ្លួនបានរួមរស់​ និងទទួលបានជោគជ័យ​​ក្នុង​រយៈពេល ១១ ឆ្នាំ​ជាមួយ។ «Mercedes ជាផ្នែកមួយនៃជីវិតរបស់ខ្ញុំចាប់តាំងពីខ្ញុំមានអាយុ ១៣ឆ្នាំម្លេះ។ នេះជាកន្លែងដែលខ្ញុំធំឡើង ដូច្នេះការសម្រេចចិត្តចាកចេញ ជាការសម្រេចចិត្តដ៏លំបាកបំផុតមួយដែលខ្ញុំធ្លាប់ធ្វើ»។ ម្ចាស់ជើងឯក F1 ៧សម័យបន្ថែម។
 

ទោះយ៉ាងនេះក្តី Hamilton គិតថានេះជាពេលវេលាដ៏ត្រឹមត្រូវក្នុងការចាកចេញ ស្របពេលរូបគេចាត់ទុកថានេះជាជំហានបន្ទាប់ ដើម្បីទទួលយកការប្រកួតប្រជែងថ្មីក្នុងវិស័យកីឡាលំដាប់ពិភពលោកមួយនេះ។ Hamilton ឈ្នះជើងឯក F1 ជាមួយ Mercedes ៦លើក ចាប់តាំងពីចាកចេញពី McLaren នៅឆ្នាំ២០១៣។
 

ទៅកាន់ក្រុមថ្មី Ferrari ដែលជាក្រុមគូប្រជែងដ៏ខ្លាំងក្លារបស់ Mercedes ក្នុងរយៈពេលជិត១០ឆ្នាំមកនេះ Hamilton នឹងត្រូវជំនួសកីឡាករអេស្ប៉ាញ Carlos Sainz ដោយចាប់ដៃគូជាមួយ Charles Leclerc នៅឆ្នាំ២០២៥៕