សត្វព្រាបមួយក្បាលត្រូវបានចាប់កាលពីដើមខែឧសភា ឆ្នាំ២០២៣ នៅជិតកំពង់ផែមួយក្នុងទីក្រុងមុមបៃ បន្ទាប់ពីគេប្រទះឃើញជើងទាំងគូរបស់វាពាក់ខ្សែស្ពាន់ និងមានសន្លឹកអាលុយមីញ៉ូមចំនួន២ ដែលឆ្លាក់ស្រដៀងអក្សរចិន។

 

ប៉ូលិសឥណ្ឌាបានសង្ស័យថា នេះជាឧបករណ៍ចារកម្មរបស់ចិន ដូច្នេះពួកគេបានសម្រេចចិត្តបង្ខាំងសត្វព្រាបនៅក្នុងមន្ទីរពេទ្យបសុពេទ្យ Bai Sakarbai Dinshaw Petit ក្នុងទីក្រុងមុមបៃ ហើយបើកការស៊ើបអង្កេត។

 

ក្រោយពីការស៊ើបអង្កេតរយៈពេល ៨ខែ ប៉ូលិសមុមបៃបានរកឃើញថា នេះជាសត្វព្រាបប្រណាំងនៅតៃវ៉ាន់ ដែលបានរត់គេចខ្លួន និងវង្វេងទៅកាន់ឥណ្ឌា។ ក្រុមមន្ត្រីបានយល់ព្រមផ្ទេរបក្សីនេះ ទៅឱ្យសមាគមការពារសត្វនៅទីក្រុងមុមបៃ ដើម្បីដោះលែងនៅថ្ងៃទី៣០ ខែមករា។

 

នេះមិនមែនជាលើកទីមួយទេ ដែលសត្វព្រាបត្រូវបានប៉ូលិសសង្ស័យថាបានចូលរួមក្នុងសកម្មភាពចារកម្មនៅឥណ្ឌា។ នៅឆ្នាំ២០២០ ប៉ូលីសនៅតំបន់កាស្មៀរបានចាប់សត្វព្រាប១ក្បាលដែលហើរកាត់ព្រំដែនយោធារវាងប៉ាគីស្ថាន និងឥណ្ឌា។ យ៉ាងណាមិញ ប៉ូលិសបានដោះលែងសត្វស្លាបនេះវិញ ក្រោយរកមិនឃើញឧបករណ៍ចារកម្ម ហើយវាជាសត្វចិញ្ចឹមរបស់អ្នកនេសាទប៉ាគីស្ថាន។

 

នៅឆ្នាំ២០១៦ សត្វព្រាប១ក្បាលក៏ត្រូវបានបូលិសឥណ្ឌាចាប់ដែរ ក្រោយពេលគេឃើញមានក្រដាសមួយសន្លឹកនៅជាប់សត្វព្រាបដែលមានសារគំរាមកំហែងដល់នាយករដ្ឋមន្ត្រីនារិន្ទ្រា ម៉ូឌី៕