ជាតិ
កសិករ លូន សាវុធ កំពុងផ្គត់ផ្គង់ផ្ទី ៥០គីឡូក្រាម រៀងរាល់ថ្ងៃក្នុងទីផ្សារ ដំណាំផ្ទីដែលលោក លូន សាវុធ ដាំក្នុងផ្ទះរោងសំណាញ់។
× សៀមរាប៖ កសិករនៅសង្កាត់ក្របីរៀល ក្រុងសៀមរាប លោក លូន សាវុធ បានចាប់ផ្តើមដាំបន្លែផ្ទីជាងមួយឆ្នាំមកហើយ ដោយដំណាំនេះមានទីផ្សារល្អគួរសម និងងាយស្រួលដាំ ពិសេសក្នុងរោងសំណាញ់។
កសិករ លូន សាវុធ បានដូរមកដាំផ្ទីក្នុងរោងសំណាញ់ ដែលពីមុនលោកដាំបន្លែស្លឹកចម្រុះ ដូចជាសាឡាត់ ស្ពៃ និងខាត់ណាជាដើម។ ជាងមួយឆ្នាំមកហើយ ដែលកសិករវ័យជាង៦០ ឆ្នាំរូបនេះ ប្ដូរមកដាំបន្លែផ្ទី ដែលពលរដ្ឋខ្មែរយកចិត្តបរិភោគ ដោយគិតថាជាដំណាំងាយដាំ មិនពិបាកមើលថែច្រើន និងញាប់បានដកកាត់លក់។
ក្នុងបទសម្ភាសជាមួយសារព័ត៌មានឌីជីថលថ្មីៗនាថ្ងៃទី១ ខែកុម្ភៈ លោក លូន សាវុធ រំឭកថា ក្នុងខែវស្សា ផ្ទីអាចលក់បានថ្លៃចន្លោះពី៣ពាន់ ទៅ៤ពាន់រៀល ហើយក្នុងមួយថ្ងៃ លោកអាចកាត់ផ្ទីបោះលក់ឱ្យឈ្មួញកណ្ដាល ពី៥០គីឡូក្រាម ឬលើសពីនេះ។ លោកបន្តថា ស្រប ពេលតំបន់ភាគច្រើន ជន់លិចដោយសារទឹកភ្លៀងនារដូវវស្សា ជាឱកាសល្អជួយឱ្យរោងសំណាញ់ដែលលោករៀបចំក្បែរផ្ទះ អាចដាំដុះផ្ទីបានល្អ និងកាត់លក់បានរាល់ថ្ងៃ។ លោក បន្តថា៖«យើងដាំប្រើពេលតែ២០ថ្ងៃលើសតិចតួចអាចដកកាត់បណ្ដើរៗហើយ។ ដាំក្នុង រោងលូតលាស់ល្អ និងគ្មានសត្វល្អិតមករករឿងទេ បើដាក់ដាំខាងក្រៅ ស្លឹកវាអាចម៍រុយ ខ្មៅៗ អត់ល្អ»។
កសិករ លូន សាវុធ កំពុងបាញ់ទឹកស្រោចផ្ទីដែលលោកទុកធ្វើពូជ។
យ៉ាងណាមិញ នារដូវប្រាំងនេះ ដំណាំផ្ទីត្រូវបានឈ្មួញបន្ថោកតម្លៃត្រឹម២ពាន់រៀល ឬលើសនេះបន្ដិចបន្តួច ដោយសារកសិករដាំនៅទីវាលខាងក្រៅបានច្រើន។ យ៉ាងនេះក្ដី លោក សាវុធ និងភរិយា បន្តរៀបំរោងធ្វើដីព្រោះគាប់ផ្ទីបន្តទៀត តែក្នុងកម្រិតទាបជាង ពេលមុន ដោយមានលាយបន្លែស្ទឹកផ្សេងៗចម្រុះ។
កំឡុងពេលនេះ គ្រួសារលោក សាវុធ បានដកឃ្លាបន្ដិច ដោយមានពេលសម្រាកខ្លះ និង រៀបចំគ្រាប់ពូជផ្ទី ដែលកាត់ពីដើមចាស់ៗដែលលោកទុកធ្វើពូជ សម្រាប់ទុកដាំនៅរដូវ វស្សាខាងមុខ៕
Tag:
ទី
កសិកម្ម
លូន សាវុធ
© រក្សាសិទ្ធិដោយ thmeythmey.com