ជាតិ
ចូលឆ្នាំចិន៖ អាជីវករលក់គ្រឿងរណ្តាប់សែន ដាច់ជាងឆ្នាំមុន
× ភ្នំពេញ៖ នៅពីមុខតូបដែលពពេញដោយពណ៌ក្រហម រួមមានគោម អាំងប៉ាវ ក្រដាសសែន អាជីវករនៅផ្សារទូលទំពូង អ្នកស្រី សុខ យី ថា សម្ភារៈលម្អ និងគ្រឿងរណ្ដាប់សែន ក្នុងពិធីបុណ្យប្រពៃណីចិន លក់ដាច់ជាងឆ្នាំមុន។ បើតាមអ្នកស្រី សុខ យី ដ្បិតសម្ភារៈទាំងនេះ លក់ដាច់ជាងឆ្នាំមុនៗ តែតម្លៃមិនឡើងថ្លៃនោះទេ។
សូមអញ្ជើញទស្សនាវីដេអូដូចតទៅ៖
ក្រដាសសែនចិន ដែលអ្នកស្រី សុខ យី នាំចូលមក គឺចេញម៉ូតថ្មីៗគ្រប់រដូវកាល ដើម្បីឱ្យអតិថិជនឃើញថ្មីប្លែក និងជាការទាក់ទាញផងដែរ។ ជាមួយគ្នានេះ គោម ឡានក្រដាស លុយសែន និងផ្ទះក្រដាស លក់ដាច់ខ្លាំង។ ក្រៅពីក្រដាសសែន សម្ភារៈលម្អនិងគ្រឿងសែនផ្សេងៗ គឺអ្នកស្រី សុខ យី លក់ដាច់គ្រប់មុខដែរ។
អ្នកលក់គ្រឿងរណ្ដាប់សែន និងអីវ៉ាន់តុបតែងផ្ទះ ប្រមាណ១០ឆ្នាំរូបនេះ បន្តថា តម្លៃរណ្ដាប់សែនចូលឆ្នាំចិននៅឆ្នាំនេះ មិនឡើងថ្លៃទេ។ អ្នកស្រី យី បានរៀបរាប់ថា ចង្កៀងគោមចងជាប់គ្នា ៥ជាន់ លក់ ១គូតម្លៃ ១៥ដុល្លារប៉ុណ្ណោះ និងគោមធំ ១តម្លៃចន្លោះពី ១៨ដុល្លារ ។ សម្រាប់ទៀនធូប និងសម្ភារៈផ្សេងទៀត តម្លៃចន្លោះពី ២០០០រៀល ទៅ៨០០០រៀល តាមមុខទំនិញតូចធំ។
អតិថិជនទិញគ្រឿងរណ្តាប់សែន
សម្រាប់រដូវចូលឆ្នាំចិនម្ដងៗ អាជីវកររូបនេះ បានចំណាយដើមទុនចាប់ពី ១០០០ដុល្លារឡើង ដើម្បីទិញគ្រឿងរណ្ដាប់ទាំងនោះ មកលក់ ហើយមិនដែលខាតដើមនោះទេ។ អ្នកស្រី សុខ យី បញ្ជាក់ថា៖ «ខ្ញុំយករណ្តាប់សែន និងសម្ភារៈផ្សេងៗ តពីអាជីវករនៅផ្សារអូរឬស្សីនោះទេ មិនបានយកពីប្រទេសក្រៅនោះទេ ព្រោះខ្ញុំមិនសូវមានដើមទុន»។
មិនខុសពីឆ្នាំមុនៗឡើយ ពលរដ្ឋចិន-វៀតណាម និងខ្មែរជាប់សែស្រឡាយចិន កំពុងមមាញឹកក្នុងការរៀបចំរណ្ដាប់សែនចូលឆ្នាំចិន ដូចជា ផ្កាអង្គាសីល ផ្កាស្បៃរឿង ដើមក្រូច គ្រឿងរណ្ដាប់សែន និងអីវ៉ាន់តុបតែងផ្ទះផ្សេងទៀត។ ប៉ុន្តែទំនិញរណ្ដាប់សែនទាំងនេះ មានអតិផរណាជាងឆ្នាំមុន៕
លុយសែន
គោមធំ
គោម
Tag:
ចូលឆ្នាំចិន
គ្រឿងរណ្តាប់
© រក្សាសិទ្ធិដោយ thmeythmey.com