ថ្លែងកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោកប្រចាំឆ្នាំ២០២៣ និងលើកទិសដៅការងារឆ្នាំ២០២៤ នៅទីស្តីការក្រសួងសាធារណការ និងដឹកជញ្ជូន នាព្រឹកថ្ងៃទី៧ កុម្ភៈ លោក ស សុខា បានសង្កេតឃើញថា រថយន្តដែលប្រើប្រាស់សម្ភារៈខុសបច្ចេកទេសទាំងនេះ កំពុងបង្កការរំខាន និងជាផ្នែកមួយនៃគ្រោះថ្នាក់ចរាចរណ៍លើដងផ្លូវផងដែរ។
 

ត្រង់ចំណុចនេះ លោក ស សុខា បានពន្យល់ថា នៅពេលរថយន្តមួយ បិទពាក្យស្លោក ឬស្ទីកគ័រ នោះ វាធ្វើឱ្យម្ចាស់យានយន្តដទៃទៀត ដែលធ្វើដំណើរលើដងផ្លូវ ចំណាយពេលក្រឡេកមើលទៅរថយន្ត ហើយវាធ្វើឱ្យពួកគេបាត់បង់ម្ចាស់ការ ក្នុងអំឡុងពេលបើកបរ ត្រឹម២ ទៅ៣វិនាទីនេះ ក៏អាចបង្កជាហានិភ័យ ឬគ្រោះថ្នាក់ចរាចរណ៍បានដែរ។
 

ចំណែកស៊ីផ្លេ ឮសំឡេងខ្លាំង, ភ្លើងហ្វា ដែលមានពន្លឺខ្លាំង , តុក្កតា និងវាំងនង បិតបាំងខុសបច្ចេកទេស ក៏មិនត្រូវអនុញ្ញាតឱ្យមានដែរ។ លោកឧបនាយករដ្ហមន្ត្រី បានបញ្ជាឱ្យសមត្ថភាពរឹតបន្តឹងការអនុវត្តច្បាប់នេះ យ៉ាងយូរបំផុតត្រឹមខែមិថុនា ឆ្នាំ២០២៤។ 
 

«ខ្ញុំឃើញ(សមត្ថកិច្ច)បានធ្វើច្រើន មិនមែនអត់ធ្វើទេ។ ប៉ុន្តែពេលខ្លះ ខ្ញុំមានអារម្មណ៍ថា ធ្វើនៅពេលដែលថ្នាក់ដឹកនាំស្រែកបន្តិចទៅ បានធ្វើ។ ប៉ុន្តែការធ្វើដូចជាភ្លៀងរលឹម។ ដូច្នេះហើយ សូមឱ្យយ៉ាងយូរមិនឱ្យលើសពីពាក់កណ្ដាលឆ្នាំនេះទេ ធ្វើយ៉ាងម៉េចកុំឱ្យមានការបិតស្ទីកគ័រ ពាក្យស្លោកនេះ»។ នេះជាការលើកឡើងរបស់រដ្ឋមន្រ្តីមហាផ្ទៃ៕