អន្តរជាតិ
អុីស្រាអែលជំទាស់បទឈប់បាញ់របស់ក្រុមហាម៉ាស តែអាម៉េរិកនៅតែឃើញផ្លូវសម្រាប់ចរចា នាយករដ្ឋមន្រ្តីអុីស្រាអែល លោក បេនចាមីន ណេតាន់យ៉ាហ៊ូ (ស្តាំ) និងយោធាអុីស្រាអែល។ រូបភាព AFP
× ក្រោយក្រុមហាម៉ាសស្នើឱ្យមានបទឈប់បាញ់រយៈពេល ១៣៥ថ្ងៃ នាយករដ្ឋមន្រ្តីអុីស្រាអែល លោក បេនចាមីន ណេតាន់យ៉ាហ៊ូ នៅថ្ងៃទី៧ ខែកុម្ភៈ បានប្រកាសយ៉ាងច្បាស់ៗថា គ្មានឡើយបទឈប់បាញ់ជាមួយ ក្រុមសកម្មប្រយុទ្ធហាម៉ាស។ ជុំវិញបញ្ហានេះ មេដឹកនាំអុីស្រាអែល នៅតែប្រកាន់យកជ័យជម្នះទាំងស្រុងលើតំបន់កាហ្សា ជាដំណោះស្រាយតែមួយគត់។
តាមការចុះផ្សាយរបស់ទីភ្នាក់ងារព័ត៌មាន Reuters ក្រុមហាម៉ាស បានស្នើផែនការបទឈប់បាញ់ជាមួយអុីស្រាអែលរយៈពេល ១៣៥ថ្ងៃ ដោយបែងចែកជាបីដំណាក់កាល។ ក្នុងផែនការនេះ ក្រុមហាម៉ាស បានបញ្ជាក់ពីការដោះដូរចំណាប់ខ្មាំង និងអ្នកទោសទាំងអស់ និងការឈានទៅដល់ការបញ្ចប់សង្រ្គាម។
ក្រោយសំណើរបស់ក្រុមហាម៉ាស អុីស្រាអែល បានច្រានចោលជាថ្មី ហើយបន្តប្រកាន់យកការកម្ទេចក្រុមហាម៉ាសឱ្យអស់ពីដែនដីកាហ្សាជាចម្បង។
«ការបន្តដាក់សម្ពាធផ្នែកយោធា នៅតែជាលក្ខខណ្ឌចាំបាច់សម្រាប់ដោះលែងចំណាប់ខ្មាំង»។ នាយករដ្ឋមន្រ្តីអុីស្រាអែល លោក បេនចាមីន ណេតាន់យ៉ាហ៊ូ បានព្រមានបែបនេះ នៅថ្ងៃទី៧ ខែកុម្ភៈ ដោយបន្តសង្កត់ធ្ងន់ថា អុីស្រាអែល ជ្រើសយកដំណោះស្រាយឈ្នះក្រុមហាម៉ាសលើតំបន់កាហ្សាតែមួយគត់ ពោលគឺគ្មានបទឈប់បាញ់ឡើយ។
បើទោះអុីស្រាអែល បានបដិសេធបទឈប់បាញ់ជាថ្មីក៏ដោយ តែអាម៉េរិកនៅតែឃើញផ្លូវសម្រាប់កិច្ចចរចា។ ក្នុងសន្និសីទសារព័ត៌មាននៅក្រុង Tel Aviv ក្នុងថ្ងៃទី៧ ខែកុម្ភៈ លោកអាន់តូនី ប្លីងខិន រដ្ឋមន្រ្តីការបរទេសអាម៉េរិក បានចាត់ទុកសំណើរបស់ក្រុមហាម៉ាស មានលក្ខណៈចុះចាញ់សង្រ្គាម ប៉ុន្តែមន្រ្តីអាម៉េរិករូបនេះ បានបន្លុយថា នៅតែឃើញឱកាសសម្រាប់កិច្ចចរចា។
ប្រមុខការទូតអាម៉េរិករូបនេះ ក៏បានបញ្ជាក់ផងដែរថា វានៅតែមានកិច្ចការជាច្រើន ដើម្បីធ្វើឱ្យបានសម្រេច មុននឹងឈានដល់បទឈប់បាញ់។ ក្នុងកិច្ចសម្ភាសន៍ជាមួយសារព័ត៌មាន Al Jazeera លោកប្លីងខិន បានលើកឡើងថា ក្រុមហាម៉ាស នឹងមិនអាចមានវត្តមានក្នុងរដ្ឋាភិបាលណាមួយនៅតំបន់កាហ្សានាពេលអនាគតឡើយ។
មកទល់ពេលនេះ សង្រ្គាមបានអូសបន្លាយជាង ៤ខែហើយ ដោយមនុស្សជាច្រើនម៉ឺននាក់ បានស្លាប់បាត់បង់ជីវិត ហើយមនុស្សជាច្រើនលាននាក់ផ្សេងទៀតភៀសខ្លួន នៅក្នុងតំបន់កាហ្សា៕
Tag:
អុីស្រាអែល
អាម៉េរិក
ហាម៉ាស
© រក្សាសិទ្ធិដោយ thmeythmey.com