«ទំនាក់ទំនង និងកិច្ចសហប្រតិប​ត្តិការរវាងប្រទេសទាំងពីរ គឺកាន់តែមានភាពជិតស្និទ្ធ និងរឹងមាំទ្វេដង»។ លោក គិន ភា បានបញ្ជាក់បែបនេះ ដោយផ្អែកលើដំណើរទស្សនកិច្ចនៃនាយករដ្ឋមន្រ្តីប្រទេសជិតខាងទាំងពីរទៅវិញទៅមក។ លោកសេដ្ឋា ថាវីស៊ីន នាយករដ្ឋមន្រ្តីថៃ នៅក្នុងខែកញ្ញា បានសម្រេចជ្រើសកម្ពុជា​ ក្នុងការបំពេញដំណើរទស្សនកិច្ចលើកដំបូង បន្ទាប់ពីកាន់តំណែង។ 

 

បន្ថែមពីនេះ ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភា បានចាត់ទុកការដំឡើងកម្រិតទំនាក់ទំនង ទៅភាពជាដៃគូយុទ្ធសាស្រ្ត គឺមានសារៈសំខាន់ ដោយសារប្រទេសទាំងពីរអាចទាញបានពីប្រយោជន៍នយោបាយ ពាណិជ្ជកម្ម ទេសចរណ៍ និងការវិនិយោគ។ 

 

តបនឹងសំណួរពាក់ព័ន្ធនឹងការកែប្រែព្រំដែនឱ្យក្លាយជាព្រំដែនសន្តិភាព និងវិបុលភាព លោក គិន ភា បានឆ្លើយថា នឹងអាចទាញបានប្រយោជន៍ជាច្រើនដូចជា ការអភិវឌ្ឍតាមបណ្តោព្រំដែន ការជំរុញពាណិជ្ជកម្ម និងការវិនិយោគ រួមទាំងការប្រយុទ្ធប្រឆាំងនឹងឧក្រិដ្ឋកម្មឆ្លងព្រំដែនជាដើម។ 

 

សូមបញ្ជាក់ថា ក្នុងដំណើរទស្សនកិច្ចនៅថៃ សម្តេច ហ៊ុន ម៉ាណែត និងលោកសេដ្ឋា ថាវីស៊ីន បាន ផ្លាស់ប្ដូរយោបល់លើការពង្រីកកិច្ចសហប្រតិបត្តិការលើវិស័យជាច្រើន រួមមាននយោបាយ សេដ្ឋកិច្ច ការពារជាតិ សន្ដិសុខ ពាណិជ្ជកម្ម វិនិយោគ ទេសចរណ៍ ការងារ និងវិស័យថាមពល។ ទន្ទឹមនេះ ភាគីទាំងពីរ ក៏បានឯកភាពសម្រាប់កិច្ចពិភាក្សាក្នុងការរុករកធនធានធម្មជាតិនៅក្នុងតំបន់ត្រួតស៊ីគ្នាផងដែរ៕