ក្នុងការប្រកួតនេះ ក្រុមរហស្សនាមមេឃខៀវ បន្តរក្សាទម្រង់លេងដ៏ល្អ នៅក្នុងការគ្រប់គ្រងបាល់ ។ គ្រាប់ទីមួយបើកឆាកដំបូងរបស់ Man City រកបានដោយខ្សែបម្រើ Kevin De Bruyne ដែលទើបជាពីរបួស នៅនាទី១១ ក្រោយការបញ្ជូនបាល់យ៉ាងល្អពី Phil Foden។ 
 

ខ្សែប្រយុទ្ធ Jack Grealish ត្រូវបានប្តូរចេញត្រឹមនាទី២១ ព្រោះបញ្ហារបួស ហើយប្តូរចូលជំនួសដោយកីឡាករ Jeremy Doku នៅនាទី២១ ។ ក្រោយ Man City ផ្លាស់ប្តូរកីឡាករភ្លាមៗ ទម្រង់លេងហាក់មិនបានល្អឡើងវិញ រហូតដល់នាទី៣៤ កីឡាករ Magnus Mattsson រកបានមួយគ្រាប់វិញឱ្យក្លិប Copenhagen មកពីដាណឺម៉ាក។ ខ្សែប្រយុទ្ធ Bernardo Silva ស៊ុតបញ្ចូលទីនាំមុខជាថ្មី នាទី៤៥បូក១ ហើយគ្រាប់ទី៣ នៅវគ្គទីពីធ្វើបានខ្សែប្រយុទ្ធស្លាបវ័យក្មេង Phil Foden ស៊ុតនៅ នាទី៩០​បូក២។ 
  

ដោយឡែកការប្រកួតមួយគូទៀត Real Madrid ធ្វើដំណើរទៅកាន់ទឹកដីប្រទេសអាល្លឺម៉ង់ ទទួលបានជ័យជម្នះដោយមិនសមប្រកប ព្រោះតែ RB Leipzig បង្ហាញទម្រង់ដ៏គួរឱ្យភ្ញាក់ផ្អើល។
 

លទ្ធផល ១-០ កើតឡើងនៅវគ្គទីពីរ ដោយការស៊ុតរបស់កីឡាករ​វ័យក្មេង Brahim Diaz នៅនាទី៤៨ ដែលជំនួសតំណែងខ្សែបម្រើប្រយុទ្ធ Jude Bellingham ដែលរងរបួស។ 
  

លោក Carlo Ancelotti ទទួលស្គាល់ចំពោះលទ្ធផលឈ្នះទាំងលំបាក នៅជើងទីមួយនេះ ។ លោកបានចាត់ទុកថា​ លទ្ធផលនេះ ជាសញ្ញាគ្រោះថ្នាក់ដល់ក្រុម នៅការប្រកួតជើងទីពីរ។ 
 

«វាពិតជាលំបាកសម្រាប់យើង ដូចដែលបានឃើញនៅទីនេះហើយ។ ការចាប់ផ្តើមវគ្គទីមួយនិងវគ្គទីពីរ គឺសុទ្ធសឹងតែលំបាក ខណៈគូប្រកួតបានលេងការប្រកួតមួយដ៏អស្ចារ្យ។ យើងមានគ្រោះថ្នាក់ក្នុងស្ថានភាពបែបនេះ យើងគួរតែរកបានគ្រាប់ច្រើនជាងនេះ ប៉ុន្តែយើងក៏អាចត្រូវបានតាមស្មើ នេះត្រឹមតែអត្ថប្រយោជន៍ដ៏តិចតួចសម្រាប់យើងប៉ុណ្ណោះ។»។ លោក Ancelotti បាននិយាយបែបនេះក្រោយចប់ការប្រកួត៕