ប្រាប់សាជីវកម្មផ្សព្វផ្សាយអូស្ត្រាលី ABC លោក Don Farrell បញ្ជាក់ថា លោកនឹងពិភាក្សា ជាមួយរដ្ឋមន្ត្រីពាណិជ្ជកម្មចិន Wang Wentao អំពីការបន្ធូរបន្ថយពន្ធលើការនាំចូលស្រា បង្កង និងសាច់របស់អូស្ត្រាលី និងព្រមទាំងការព្យួរទោសប្រហារជីវិតលើអ្នកនិពន្ធជនជាតិអូស្ត្រាលីលោក Yang Hengjun ។

 

បើតាមលោក Farrell រដ្ឋាភិបាលអូស្ត្រាលីរន្ធត់ចិត្តចំពោះការចោទប្រកាន់ និងការកាត់ទោសជុំវិញបទចារកម្មសម្រាប់លោក Yang ប៉ុន្តែលោកសម្គាល់ថា កត្តានេះ មិនគួរធ្វើឱ្យ ខូចដល់ទំនាក់ទំនងរវាងប្រទេសទាំងពីរឡើយ។

 

«រដ្ឋាភិបាលអូស្ត្រាលីនៅតែបន្តដាក់សម្ពាធឱ្យដកចេញនូវរាល់ឧបសគ្គពាណិជ្ជកម្មដែលនៅសេសសល់ដែលប៉ះពាល់ដល់ការនាំចេញរបស់អូស្ត្រាលីទៅកាន់ចិន»។ លោក Farrell បាននិយាយនៅក្នុងសេចក្តីថ្លែងការណ៍មួយបែបនេះរួចបន្តថា លោកទន្ទឹងរង់ចាំការបន្តកិច្ច សន្ទនាក្នុងន័យស្ថាបនាជាមួយសមភាគីចិនក្នុងខែនេះ។

 

កន្លងមក ទីក្រុងប៉េកាំងបានដកចេញរបាំងពាណិជ្ជកម្មភាគច្រើនដែលខ្លួនដាក់លើទំនិញអូស្ត្រាលី បន្ទាប់ពីទីក្រុងកង់បេរ៉ាបានអំពាវនាវឱ្យមានការស៊ើបអង្កេតលើប្រភពដើមនៃជំងឺកូវីដ-១៩។ ការរឹតត្បិតនៅមានតែលើស្រា បង្កង និងសាច់សត្វមួយចំ​នួនប៉ុណ្ណោះ។

 

លោក Farrell បានប្រាប់ ABC ថា ប្រសិនបើចិនមិនដកពន្ធរបស់ខ្លួនលើស្រាអូស្ត្រាលីត្រឹម ថ្ងៃទី ៣១ ខែមីនានៅពេលដែលការពិនិត្យឡើងវិញលើការនាំចូលដោយទីក្រុងប៉េកាំងនឹង ត្រូវបញ្ចប់នោះ ទីក្រុងកង់បេរ៉ានឹងបន្តនីតិវិធីនៅ WTO។

 

កិច្ចប្រជុំ WTO នៅទីក្រុងអាប៊ុយដាប៊ី ប្រទេសអេមីរ៉ាតអារ៉ាប់រួមប្រព្រឹត្តទៅចាប់ពីថ្ងៃទី២៦-២៩ ខែកុម្ភៈ៕