ជាតិ
វីដេអូ
អគ្គនាយកARDB លោក កៅ ថាច ចង់ឱ្យមានពិព័រណ៍កសិផលខ្មែរកាន់តែច្រើន
× ភ្នំពេញ៖ នាពិព័រណ៍ផលិតផលកសិកម្មនៅថ្ងៃនៃក្ដីស្រឡាញ់ នាថ្ងៃទី១៤ កុម្ភៈកន្លងទៅ លោក កៅ ថាច អគ្គនាយកធនាគារអភិវឌ្ឍន៍ជនបទ និងកសិកម្ម បានដើរទស្សនា និងទិញផលិតផលខ្មែរ។ លោក កៅ ថាច បានប្រាប់អ្នកសារព័ត៌មានThmey Thmey 25 ពិព័រណ៍ផលិតផលកសិកម្មនេះ ជាកម្មវិធីល្អមួយ ដែលបង្ហាញប្រាប់ដល់ប្រជាពលរដ្ឋខ្មែរអំពីផលិតផលខ្មែរធ្វើបាន។
បើតាមអគ្គនាយកARDBរូបនេះ ការធ្វើសកម្មភាពបែបនេះ អាចជួយលើកកម្ពស់ការផលិតរបស់កសិករខ្មែរផង និងជួយលើកកម្ពស់ផលិតផលដែលខ្មែរធ្វើបាន ទោះបីតម្លៃស្រដៀងគ្នា ក៏ពលរដ្ឋខ្មែរនៅតែគាំទ្រ។ ដើរបណ្ដើរ មើលផលិតផលកសិកម្មកែច្នៃបណ្ដើរ លោក កៅ ថាច បានចាប់អារម្មណ៍លើការវេចខ្ចប់ និងតុបតែងលម្អបន្ថែមលើផលិតផល។
សូមអញ្ជើញទស្សនាបទសម្ភាសខាងក្រោមដូចតទៅ៖
ក្រៅពីផលិតផលស្រស់ មានផលិតផលកែច្នៃពីកសិកម្មជាច្រើន បានដាក់តាំងលក់ក្នុងពិព័រណ៍នេះ។ ទាក់ទងនឹងការកែច្នៃផលិតផលកសិកម្ម លោក កៅ ថាច យល់ឃើញថា៖ «អ្វីទាំងអស់ គឺអាស្រ័យលើទីផ្សារ បើអ្នកផលិតប្រាកដថាផលិតផលនោះមានទីផ្សារអាចផលិតបាន គឺមិនខុសទេ។ ខ្ញុំជឿជាក់ថា ខ្មែរមិននៅត្រឹមហ្នឹងទេ»។
ទន្ទឹមនឹងនេះ លោក កៅ ថាច ចង់ឱ្យមានពិព័រណ៍កសិផលខ្មែរបែបនេះឱ្យកាន់តែច្រើន ជាពិសេសនៅតាមស្រុកនីមួយៗ។ សូមបញ្ជាក់ថា នេះជាឆ្នាំទី២ហើយ ដែលក្រសួងរៀបចំកម្មវិធីនេះឡើង ដោយមានស្តង់ចូលរួមចំនួន ២១ស្តង់។ ចំនួននេះកើនឡើងជាងឆ្នាំមុន បន្ទាប់ពីទទួលបានការគាំទ្រពីប្រជាពលរដ្ឋទូទៅ និងសំណូមពរពីសហគ្រាស កសិដ្ឋាន ដែលដាំដុះ និងផលិតកែច្នៃផលិតផលកសិកម្ម។
បើតាមក្រសួងកសិកម្ម ការដាក់តាំងលក់នេះ ដើម្បីឱ្យប្រជាពលរដ្ឋទូទៅងាកមកចាប់អារម្មណ៍ផលិតផលកសិកម្មរបស់ខ្មែរ ដែលមានគុណភាព និងសុវត្ថិភាព ជាពិសេសផ្តល់ជាជម្រើសសម្រាប់ប្រជាពលរដ្ឋទិញបន្លែសុវត្ថិភាព ជូនចំពោះមនុស្សជាទីស្រឡាញ់៕
© រក្សាសិទ្ធិដោយ thmeythmey.com