Alves អតីតខ្សែការពារឆ្នើម Barcelona និងជម្រើសជាតិប្រេស៊ីល ធ្លាប់បានអះអាងប្រាប់តុលាការកំពូលក្នុងតំបន់ស្វយ័ត Catalonia របស់អេស្ប៉ាញថា ការរួមភេទកើតឡើងដោយការព្រមព្រៀងគ្នាដោយបង់ប្រាក់ចំនួន ១៦៣,០០០ ដុល្លារ ដល់ភាគីរងគ្រោះ។
 

ប៉ុន្តែយ៉ាងណាក៏ដោយ តុលាការក្រុង Barcelona បានរៀបរាប់ក្នុងសក្ខីកម្មថា ជនរងគ្រោះមិនបានព្រមព្រៀងករណីនេះឡើយ ហើយថែមទាំងមានភស្តុតាងបន្ថែមពីលើសក្ខីកម្មរបស់ដើមបណ្តឹង ដែលបង្ហាញថានេះជាករណីរំលោភ។ 
 

អតីតខ្សែការពារវ័យ ៤០ ឆ្នាំរូបនេះ ត្រូវបានចាប់ខ្លួនកាលពីខែមករាឆ្នាំ២០២៣ ហើយត្រូវបានឃុំខ្លួនបណ្តោះអាសន្នតាំងពីពេលនោះមក។ ព្រះរាជអាជ្ញាអេស្ប៉ាញ បានពិចារណាការដាក់ទោស Alves ឱ្យជាប់ពន្ធនាគាររយៈពេល៩ឆ្នាំឯណោះលើករណីរំលោភនេះ ខណៈរូបគេបន្តប្តឹងឧទ្ធរណ៍ដល់ពេលនេះ រហូតសម្រេចចុងក្រោយត្រូវជាប់ទោសជាប់ពន្ធនាគារ ៤ ឆ្នាំកន្លះ។
 

ករណីរបស់ Alves បានទាក់ទាញការចាប់អារម្មណ៍យ៉ាងខ្លាំងនៅអេស្ប៉ាញ មិនត្រឹមតែដោយសារតែករណីរំលោភនោះទេ ប៉ុន្តែដោយសារតែមានអំពើហិង្សាលើយេនឌ័រ ដែលក្លាយជាប្រធានបទលេចធ្លោខ្លាំង។
 

នេះជាការកាត់ក្តីដ៏ល្បីបំផុតមួយនៅក្នុងប្រទេសអេស្ប៉ាញ ចាប់តាំងពីច្បាប់មួយត្រូវបានអនុម័តក្នុងឆ្នាំ ២០២២ ដែលបានធ្វើឱ្យមានការយល់ព្រមបង្កើនរយៈពេលជាប់ពន្ធនាគារ សម្រាប់ការរំលោភដែលពាក់ព័ន្ធនឹងអំពើហិង្សា។
 

Alves ដែលធ្លាប់ប្រកបជីពជាមួយ Barcelona, Sevilla, Juventus និង Paris St Germain និងជម្រើសជាតិប្រេស៊ីល ធ្លាប់ឈ្នះពានរង្វាន់ច្រើនជាង ៤០។ បន្ទាប់ពីការចាប់ខ្លួន ក្នុងករណីរំលោភ Alves ត្រូវបានបណ្តេញចេញពីក្លិប Pumas UNAM នៃលីគកំពូលម៉ិកស៊ិក៕