ជាតិ
អន្តរជាតិ
អាមេរិកបើកអង្កេតរកហានិភ័យពាក់ព័ន្ធនឹងបច្ចេកវិទ្យាយានយន្តអគ្គិសនីចិន
អាមេរិកបើកអង្កេតរកហានិភ័យពាក់ព័ន្ធនឹងបច្ចេកវិទ្យាយានយន្តឌីជីថលចិន AP - Kin Cheung
×![]()
ដោយ៖អៀង សុខម៉ិញ/RFI
ជាសំណុំរឿងថ្មីមួយទៀត ដែលអាចមកបំពុលទំនាក់ទំនងចិននិងអាមេរិកឱ្យតានតឹងថែមទៀត។ នៅថ្ងៃព្រហស្បតិ៍ទី ២៩កុម្ភៈ២០២៤នេះ រដ្ឋាភិបាលអាមេរិកបានប្រកាសបើកអង្កេត ថាតើយានយន្តបំពាក់បច្ចេកវិទ្យាភ្ជាប់បណ្តាញ (រថយន្តអគ្គិសនី) និងគ្រឿងបន្លាស់នាំមកពីប្រទេសចិន ពិតជាអាចប្រមូលទិន្នន័យរសើបៗរបស់ប្រជាពលរដ្ឋអាមេរិក ហើយបញ្ជូនទៅឱ្យចិន ដោយផ្ទាល់មែនឬយ៉ាងណា?
នៅក្នុងសេចក្តីថ្លែងការណ៍ លោកប្រធានាធិបតីចូ បៃដិនបានពន្យល់ថា ប៉េកាំងបានដាក់កំហិតលើរថយន្តអាមេរិក និងប្រទេសផ្សេងទៀត ពេលចូលទៅចិន ហេតុអ្វីបានរថយន្តចិនអាចចូលមកក្នុងទីផ្សារអាមេរិកដោយគ្មានការតាមដាន? ហេតុដូច្នេះហើយបានជាអាមេរិកសម្រេចបើកអង្កេត។ បើតាមលោកចូបៃដិន រថយន្តបំពាក់បច្ចេកវិទ្យាទំនើបមានភ្ជាប់បណ្តាញទូរគមនាគមន៍ ព្រមទាំងគ្រឿងបន្លាស់ផ្សេងទៀត ដែលនាំមកពីចិន អាចប្រមូលទិន្នន័យរសើបៗពាក់ព័ន្ធនឹងប្រជាពលរដ្ឋ នឹងរចនាសម្ព័ន្ធអាមេរិក ហើយបញ្ជូនដោយត្រង់ផ្ទាល់ទៅប្រទេសចិនតែម្តង។
អាមេរិកចាំបាច់ត្រូវតែដឹងឱ្យប្រាកដអំពីហានិភ័យរបស់យានយន្តភ្ជាប់បណ្តាញដ៏ទំនើបរបស់ចិនគំរាមកំហែងសន្តិសុខជាតិអាមេរិកយ៉ាងណា ព្រោះនៅពេលគេកាន់តែសិក្សាមើលរថយន្តអគ្គិសនីចិនពេលណា ក្តីព្រួយបារម្ភរីកធំធាត់កាន់តែខ្លាំងពេលនោះ។ នេះបើតាមប្រសាសន៍របស់រដ្ឋមន្ត្រីក្រសួងពាណិជ្ជកម្មGina Raimondo ដោយលម្អិតថា ការអង្កេតសាធារណៈនឹងបើកធ្វើជាទូទៅ ដើម្បីកំណត់ថាតើបច្ចេកវិទ្យាបំពាក់ក្នុងយានយន្តសម្រាប់ចាប់ប្រមូលទិន្នន័យ ហើយបញ្ជាយានយន្តពីចម្ងាយ យ៉ាងដូចម្តេច? និងមានវិធានការចាំបាច់យ៉ាងណា? នៅពេលកំណត់ហានិភ័យបានទើបអាមេរិកសម្រេចជ្រើសរើសចំណាត់ការតាមក្រោយ។
ឥលូវទីផ្សារ រថយន្តចិនវិវឌ្ឍយ៉ាងលឿនរហ័ស ខាងនាំចេញនិងកំពុងជ្រៀតចូលយ៉ាងខ្លាំងទៅតាំងទីក្នុងប្រទេសជាច្រើន រាប់ទាំងអឺរ៉ុបផង ដូច្នេះអាមេរិកត្រូវតែរួសរាន់បញ្ចេញសកម្មភាពអង្កេតដែរ។ សម្រាប់ជាការចាប់ផ្តើមនេះ ការអង្កេតមានពាក់ព័ន្ធតែនឹងរថយន្តអគ្គិសនីផលិតដោយក្រុមហ៊ុនយានយន្តចិនទេ តែបន្តបន្ទាប់អាមេរិកនឹងពង្រីកការតាមដានសិក្សាដល់យានយន្តអគ្គិសនីគ្រប់ម៉ាកដែលមានប្រើគ្រឿងផ្សំ/បន្លាស់ផលិតនៅចិន។
សម្រាប់លោកប្រធានាធិបតីអាមេរិក ការអង្កេតនេះជាក៏មធ្យោបាយទប់ទល់នឹងឧស្សាហកម្មរថយន្តចិនដែលលូតលាស់ខ្លាំងដោយវិធីស៊ីខ្សែលើ។ បន្ទាប់ពីចាត់វិធានការមួយខ្សែធំដើម្បីកុំឱ្យចិនបានទទួលទិន្នន័យមនិងបច្ចេកវិទ្យាអាមេរិក សេតវិមានបានផ្តើមយុទ្ធនាការទប់ទល់នឹងការផ្ទេរទិន្នន័យរសើបៗ ដោយចេញក្រិត្យហាមមិនឱ្យផ្ទេរព័ត៌មានបុគ្គលរបស់ពលរដ្ឋអាមេរិកជាទ្រង់ទ្រាយធំទៅកាន់ប្រទេសដែលមិនគួរទុកចិត្តដូចយ៉ាងចិន។ បច្ចុប្បន្ននេះការប្រមូលនិងប្រើប្រាស់ទិន្នន័យបុគ្គលកំពុងរីកធំធាត់ខ្លាំង ដោយសារតែភាពរីកចម្រើននៃបច្ចេកវិទ្យាបញ្ញាសិប្បនិម្មិត ព្រមទាំងរថយន្តអគ្គីសនីឬយានយន្តឆ្លាត ដែលតែងមានបំពាក់ប្រដាប់ចាប់តានដានដំណើរយើង។ ឧបករណ៍ទាំងនោះច្រើនធ្វើនៅចិន៕
© រក្សាសិទ្ធិដោយ thmeythmey.com
«គូលី»មានន័យច្បាស់លាស់ដូចម្តេច?
1 សប្តាហ៍
