ជាតិ
ពលករ និងកុមារខ្មែរ២៥នាក់ ជួបគ្រោះថ្នាក់ចរាចរណ៍នៅថៃ ,ថៅកែរ៉ាប់រងព្យាបាលទាំងអស់ រូបភាពពី សារព័ត៌មានថៃ Siameagle
× ភ្នំពេញ៖ ពលករ និងកុមារខ្មែរ២៥នាក់ ដែលជួបគ្រោះថ្នាក់ចរាចរណ៍ ក្នុងអំឡុងពេលធ្វើដំណើរពីកន្លែងស្នាក់ទៅធ្វើការនៅស្រុកណាឌី ខេត្តប្រាជីនបុរី ប្រទេសថៃ កាលពីថ្ងៃទី៣ ខែមីនា ត្រូវបានថៅកែជាជនជាតិថៃរ៉ាប់រងព្យាបាលទាំងអស់។
យោងតាមសេចក្ដីប្រកាសព័ត៌មានរបស់ ក្រសួងការបរទេស និងសហប្រតិបត្តិការអន្តរជាតិ នៅថ្ងៃទី៦ ខែមីនានេះ ករណីគ្រោះថ្នាក់ចរាចណ៍ បានបណ្ដាលឱ្យពលករខ្មែររងរបួសធ្ងន់ចំនួន២នាក់ និងស្រាលចំនួន២៣នាក់។ ពលករខ្មែរ២នាក់ ដែលរងរបួសធ្ងន់ ត្រូវបានរថយន្តសង្គ្រោះបន្ទាន់ បញ្ជូនទៅមន្ទីរពេទ្យស្រុកកាបិនបុរី ខេត្តប្រាជីនបុរី។ ចំណែក អ្នករងរបួសស្រាល ត្រូវបានសង្គ្រោះបឋមរួច ហើយថៅកែបានទទួលយកទៅកន្លែងស្នាក់នៅវិញ។
ក្រសួងបញ្ជាក់ថា រាល់ការចំណាយផ្សេងៗ ក្នុងការព្យាបាលរបួស ត្រូវបានថៅកែជនជាតិថៃ ទទួលបន្ទុកទាំងអស់៕
Tag:
គ្រោះថ្នាក់ចរាចរណ៍
ពលករខ្មែរនៅថៃ
កម្ពុជា
ថៃ
© រក្សាសិទ្ធិដោយ thmeythmey.com