បើតាមអនុប្រធាននាយកដ្ឋានគ្រប់គ្រងទឹក ព្រៃឈើ និងហេដ្ឋារចនាសម្ព័ន្ធ នៃអាជ្ញាធរជាតិអប្សរា រូបនេះ បច្ចុប្បន្នក្រុមការងារកំពុងមមាញឹកខ្លាំងក្នុងការដាំរបងព័ទ្ធជុំវិញ សួនរុក្ខជាតិអង្គរ។ លោកបាននិយាយថា សួននេះកំពុងត្រូវបានពង្រីកពីទំហំ១៥ហិកតា ទៅ១៥០ហិកតា ដោយក្នុងនោះអាជ្ញាធរអប្ សរាមានបំណងព្រលែងសត្វព្រៃសម្បូរបែប ដែលបានផ្សុំា​ច្រើនខែមកហើយ ឱ្យមានជីវិតបែបធម្មជាតិនៃសត្វនីមួយៗ។ 

 

ក្រៅពីនេះ ការធ្វើរបងនេះ ក៏ដើម្បីការពារព្រៃឈើ និងរៀបចំផ្លូវដើរ ស្ពានថ្មើរជើងសម្រាប់ទេសចរដើរកម្សាន្តផងដែរ។ លោក ឡៃ ប៉ូទី បន្តនិយាយយ៉ាងដូច្នេះ៖ «   «នៅក្នុងគម្រោងពង្រីកផ្ទៃដីសួនរុក្ខជាតិអង្គរនេះ គឺអាជ្ញាធរជាតិអប្សរា បានដាំបង្គោលស៊ីម៉ង់ត៍ និងព័ទ្ធលួសសំណាញ់ប្រវែង៥៤៦៨ម៉ែត្រ ជុំវិញព្រៃចាប់ពីសួនរុក្ខជាតិអង្គរ រហូតទៅដល់​កសិន្ធុអង្គរ​​ភាគខាងត្បូង»។ 

 

ការលើកឡើងរបស់មន្រ្តីអាជ្ញាធរជាតិអប្សរានៅពេលនេះ ធ្វើឡើហបន្ទាប់ពីមានការបង្ហោះវីដេអូក្នុងបណ្ដាញសង្គមក្នុងអត្ថន័យថា​  មានបុគ្គលិកក្រុមហ៊ុនឯកជន កំពុងធ្វើរបងព័ទ្ធដីអភិវឌ្ឍន៍ជុំវិញសួនរុក្ខជាតិអង្គរ។ បើតាមលោក ប៉ូទី ការផ្សព្វផ្សាយនៅលើបណ្តាញសង្គមកន្លមក ទំនងអ្នកទាំងនោះឃើញបុគ្គលិកក្រុមហ៊ុនម៉ៅការធ្វើរបងសួន ទើបជាយល់ច្រឡំថា ដីទាំងនោះជាកម្មសិទ្ធិឯកជន។ 
 

លោក ប៉ូទី បានបញ្ជាក់សារជាថ្មី នារសៀលថ្ងៃទី២១មីនានេះ ថា ៖ «ដីក្នុងតំបន់អង្គរ ជាកម្មសិទ្ធិសាធារណៈរបស់រដ្ឋ មិនមានការជួលឱ្យនរណាឡើយ»។  

ជាមួយគ្នានេះ មន្រ្តីដដែលក៏បានសំណូមពរដល់សាធារណជន មុននឹងផ្សព្វផ្សាយព័ត៌មានអ្វីមួយ ត្រូវដឹងរឿងនោះឱ្យច្បាស់សិន ជៀសវាងការយល់ច្រឡំណាមួយ៕