កញ្ញា រិទ្ធី លំអរពេជ្រ សហស្ថាបនិកបុណ្យភូមិ ប្រាប់សារព័ត៌មានថ្មីៗថា បុណ្យភូមិឆ្នាំនេះ​ រៀបចំឡើងផ្ដោតសំខាន់លើការលេងល្បែងប្រជាប្រិយខ្មែរ និងបង្ហាញទម្រង់សិល្បៈបុរាណ ជាជាងតន្រ្តីសម័យ ដើម្បីបំផុសចលនាយុវជនឱ្យចូលរួមលេងកម្សាន្ត និងបានស្គាល់កាន់​តែច្រើនពីទំនៀមទម្លាប់ប្រពៃណីខ្មែរ។ 
 

វាយក្អមប្រជាប្រិយចំនួន១១១ក្អម ការសម្ដែងសិល្បៈប្រពៃណី​របស់ជនជាតិដើម​​ភាគ​តិចមកពីខេត្តមណ្ឌលគិរី ទស្សនីយភាពការសម្ដែងល្ខោន យីកេ និងល្បែងប្រជាប្រិយ​ជាច្រើនប្រភេទទៀត នឹងមានវត្តមាននៅបុណ្យភូមិឆ្នាំ២០២៤ នៅវត្តព្រែកថ្លឹង។
 

«យើង​ឃើញថារយៈពេល១០ឆ្នាំមកនេះ ទាំងវត្តមានបុណ្យភូមិ និងអង្គរសង្រ្កាន្ត បានធ្វើឱ្យ​មានសង្រ្កាន្តនៅតាមទីតាំងផ្សេងៗច្រើន។ ដូចឆ្នាំនេះ យើងឃើញគ្រប់សាលា​ទាំងអស់​សុទ្ធ​តែមានសង្ក្រាន្តតាមកន្លែងផ្សេងៗ​ ដែលជាជោគជ័យមួយសម្រាប់កម្ពុជា​គឺយើងបានប្រារព្ធ​ពិធីអបអរសាទរចូលឆ្នាំខ្មែរគគ្រឹកគគ្រេង»។
 

​ទោះជាព្រឹត្តិការណ៍សង្ក្រាន្តនៅតាមបណ្តាគ្រឹះស្ថានសិក្សា ត្រូវបានប្រារព្ធឡើងកាន់តែច្រើនក៏ដោយ ប៉ុន្តែ កញ្ញា រិទ្ធី លំអរពេជ្រ សង្កេតឃើញថា សកម្មភាព​​លេងល្បែងប្រជាប្រិយខ្មែរ នៅមិនទាន់មានច្រើនឡើយ។ ដូច្នេះទើប ឆ្នាំនេះ​បុណ្យភូមិ ផ្តោតការបង្ហាញខ្លាំងលើការលេងល្បែង​ប្រជាប្រិយខ្មែរ៕