ឧបនាយករដ្ឋមន្ត្រីកូរ៉េខាងជើង លោក Ri Chol Man បានចាកចេញទៅកាន់រុស្ស៊ីនៅថ្ងៃទី២០ ខែមេសា និងដឹកនាំគណៈប្រតិភូគណៈកម្មការកសិកម្ម។ ទន្ទឹមនេះ អគ្គរដ្ឋទូតរុស្ស៊ីប្រចាំនៅកូរ៉េខាងជើង លោក Alexander Matsegora បានសរសេរសារបង្ហោះលើបណ្ដាញសង្គមហ្វេសប៊ុកថា កាលវិភាគរបស់លោក Ri នឹង មានការមមាញឹកយ៉ាងខ្លាំង។   យ៉ាងណាមិញ មន្រ្តីទូតរុស្ស៊ីមិនបានលម្អិតពីដំណើរទស្សនកិច្ចរបស់មន្រ្តីកូរ៉េខាងជើងឡើយ។ 

 

រដ្ឋាភិបាលកូរ៉េខាងត្បូង បានចាត់ទុកលោកRi ជាអ្នកបច្ចេកទេសក្នុងវិស័យកសិកម្មរបស់កូរ៉េខាងជើងដ៏សំខាន់មួយរូប។ លោកត្រូវបានតែងតាំងជាប្រធានគណៈកម្មការកសិកម្មនៅឯកិច្ចប្រជុំបក្សពលករកូរ៉េខាងជើងនៅពេលកន្លងមក។ 

 

ចាប់តាំងពីដំណើរទស្សនកិច្ចរបស់លោកគីម ជុងអ៊ុន មេដឹកនាំកូរ៉េខាងជើង នៅរុស្ស៊ីកាលពីខែកញ្ញា ឆ្នាំ២០២៣ ទំនាក់ទំនង​រវាង​ប្រទេស​ជិតខាងទាំងពីរបាន​ពង្រឹង​យ៉ាង​ខ្លាំង​។

 

នៅក្នុងកិច្ចប្រជុំកំណត់គោលនយោបាយដ៏សំខាន់របស់គណបក្សពលករក្នុងខែធ្នូ លោក គីម បានថ្លែងអំពីតម្រូវ ការក្នុងការជំរុញផលិតភាពកសិកម្ម ដោយអំពាវនាវឱ្យមានទំនើបកម្មឧបករណ៍កសិកម្ម និង ការកែលម្អប្រព័ន្ធធារាសាស្រ្ត។ កូរ៉េខាងជើងបានជួបបញ្ហាកង្វះស្បៀងអាហារជាយូរមក ហើយដែលមួយផ្នែកបង្កឡើងដោយសារតែការដាក់ទណ្ឌកម្មរបស់អង្គការសហប្រជាជាតិ (UN) លើកម្មវិធីអាវុធ និងគ្រោះមហន្តរាយធម្មជាតិតាមរដូវកាល។

 

ការខិតចូលគ្នារវាងក្រុងព្យុងយ៉ាង បានធ្វើឱ្យអាម៉េរិក និងកូរ៉េខាងត្បូងបានព្រួយបារម្ភថា ចំណុចស្នូលនៃកិច្ចសហ ប្រតិបត្តិការកាន់តែជិតស្និត គឺផ្នែកយោធា ដោយប្រទេសទាំងពីរ ចោទកូរ៉េខាងជើងថាបានដឹកជញ្ជូនសព្វាវុធទៅឱ្យរុស្ស៊ីសម្រាប់ប្រើប្រាស់ក្នុងសង្គ្រាមនៅអ៊ុយក្រែនថែមទៀត។

 

ទាំងក្រុងមូស្កូ និងទីក្រុងព្យុងយ៉ាង បានបដិសេធការចោទប្រកាន់នេះ បើទោះបីជាមេដឹកនាំរបស់ពួកគេបានប្តេជ្ញាពង្រឹងកិច្ចសហប្រតិបត្តិការយោធាឱ្យកាន់តែស៊ីជម្រៅក៏ដោយ៕