ក្នុងជំនួបពិភាក្សាការងារ​នៅវិមានព្រឹទ្ធសភា នាថ្ងៃទី២៩មេសា  លោកស្រី ÜLKÜ KOCAEFE ឯកអគ្គរដ្ឋទូតនៃសាធារណៈរដ្ឋតួកគីប្រចាំកម្ពុជា​ បានបង្ហាញមោទកភាពនៅចំពោះមុខសម្តេច ហ៊ុន សែន ប្រធានព្រឹទ្ធសភា ដែលឃើញទំនាក់ទំនងរវាងកម្ពុជា និងតួកគី មានភាពរីកចម្រើនជាលំដាប់។ ក្នុងនោះ ក៏មានការបើកការិយាល័យពាណិជ្ជកម្ម ផងដែរ។ 

 

លោកស្រី KOCAEFE បានលើកឡើងថា បច្ចុប្បន្នថ្វីត្បិតទំហំពាណិជ្ជកម្មមានទំហំតូច ក៏ប៉ុន្តែប្រទេសទាំងពីរបានឯកភាពគ្នា ក្នុងការជំរុញទំហំពាណិជ្ជកម្មនេះ ឱ្យកើនដល់១០០០លានដុល្លារ ជាមួយនឹងការបង្កើនទំនាក់ទំនងរវាងប្រជាជននិងប្រជាជនឱ្យកាន់តែច្រើនឡើង។

 

 « ក្រុមហ៊ុនអាកាសចរណ៍តួកគី នឹងពង្រីកការហោះហើរមកកម្ពុជានាពេលខាងមុខ»។ លោក KOCAEFE បាននិយាយបែបនេះ នៅចំពោះមុខប្រធានព្រឹទ្ធសភាកម្ពុជា ដែលសង្ឃឹមថា ការភ្ជាប់ជើងហោះហើរនេះ នឹងធ្វើឱ្យទំនាក់ទំនងរវាងប្រជាជន និងប្រជាជន ក្នុងវិស័យទេសចរណ៍មានការកើនឡើងបន្ថែមទៀត។

 

សម្តេច ហ៊ុន សែន បានសាទរនូវការលើកឡើងរបស់លោកស្រីឯកអគ្គរដ្ឋទូតនៃសាធារណៈរដ្ឋតួកគីប្រចាំកម្ពុជា​។ ជុំវិញនៃទំនាក់ទំនងទ្វេភាគីអតីតនាយករដ្ឋមន្ត្រីកម្ពុជាបាននិយាយដូច្នេះ៖ «  ទំហំពាណិជ្ជកម្មរបស់យើង គឺនៅតូចនៅឡើយ ដែលពុំទាន់សក្តិសមទៅនឹងសក្តានុពលដែលប្រទេសទាំងពីរមាន។ ខ្ញុំជឿជាក់ថាគោលដៅ១០០០លានដុល្លារ នៃការផ្លាស់ប្តូរពាណិជ្ជកម្មរវាងទាំងពីរអាចសម្រេចបាន នាពេលខាងមុខ» ។ 

 

គួរជម្រាបថា ក្នុងត្រីមាសទី១ កម្ពុជាសម្រេចទំហំពាណិជ្ជកម្ម​ជាមួយប្រទេស/តំបន់ដៃគូក្នុងពិភពលោក បានជិត១២,៥ពាន់លានដុល្លារ កើន ១១,៩ភាគរយ បើធៀបនឹងរយៈពេលដូចគ្នាកាលឆ្នាំ២០២៣។ ក្នុងនោះ ប្រទេសដែលជាដៃគូពាណិជ្ជកម្មធំជាងគេជាមួយកម្ពុជា​ គឺប្រទេសចិន មានក្នុងទំហំប្រមាណ ៣ ២០០លានដុល្លារ, វៀតណាមមានជាង២ ៣០០លានដុល្លារ, សហរដ្ឋអាម៉េរិក ក្នុងទំហំប្រមាណ២០០០លានដុល្លារ, ថៃមានជាង ១ ១០០លានដុល្លារ និងប្រទេសជប៉ុន​សម្រេចទំហំពាណិជ្ជកម្មជាមួយកម្ពុជាក្នុងរយៈពេល៣ខែមកនេះ បានជាង៥០០លានដុល្លារ ផងដែរ៕