ខ្មែរក្រហម
ជាតិ
UN អនុម័តថវិកាបម្រុង ១៥,៥ លានដុល្លារដល់ភាគីអន្តរជាតិនៃសាលាក្ដីខ្មែក្រមហម
× មហាសន្និបាតអង្គការសហប្រជាជាតិ បានអនុម័តលើកញ្ចប់ថវិកា ឧបត្ថម្ភធនចំនួន ១៥,៥ លានដុល្លារអាមេរិក ដល់ភាគីអន្តរជាតិនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) ឬដែលគេស្គាល់ថាជាសាលាក្ដីខ្មែរក្រហម ដែលនេះជាថវិកាបម្រុងបន្ថែមទៅលើការផ្តល់វិភាគទានស្ម័គ្រចិត្ត សម្រាប់ ភាគីអន្តរជាតិ នៃសាលាក្តី សម្រាប់រយៈពេលពីថ្ងៃទី ១ ខែមករា ដល់ថ្ងៃទី ៣១ ខែធ្នូ ឆ្នាំ ២០១៤ ។
យោងតាមទីសេចក្ដីប្រកាសព័ត៌មាន របស់ អ.វ.ត.ក កាលពីថ្ងៃម្សិលមិញនេះបានឲ្យដឹងថា អគ្គលេខាធិការអង្គការសហប្រជាជាតិ លោក បាន គីមូន បានស្នើសុំទៅមហាសន្និបាតអនុញ្ញាត ឲ្យមានថវិកាឧបត្ថម្ភធននេះ ដើម្បីឆ្លើយតបទៅនឹងការកើនឡើងនៃបញ្ហាប្រឈមផ្នែកហិរញ្ញ វត្ថុ និងការខ្វះថវិកាដែល អ.វ.ត.ក ធ្លាប់មានបទពិសោធន៍ជួបប្រទះ នៅអំឡុងប៉ុន្មានឆ្នាំចុង ក្រោយនេះ ។
ថវិកាបម្រុងនេះអាចអនុញ្ញាតឲ្យអង្គការសហប្រជាជាតិ ធ្វើកិច្ចសន្យាការងារជាមួយមន្ត្រី ដែលជាបុគ្គលិកអន្តរជាតិ នៃសាលាក្ដីខ្មែរក្រហមសម្រាប់រយៈពេលមួយឆ្នាំ ។ ថវិកាឧបត្ថម្ភធនអាចនឹងត្រូវដក បានលុះត្រាតែមិនមានថវិកាគ្រប់គ្រាន់ពីការផ្តល់វិភាគទាន ស្ម័គ្រចិត្ត។
មហាសន្និបាតនៃអង្គការសហប្រជាជាតិ បានស្នើទៅកាន់ លោក បាន គីមូន ឲ្យរៀបចំរបាយការណ៍មួយ ដែលរួមមានការត្រួតពិនិត្យឲ្យបានច្បាស់លាស់នូវ គម្រោងចំណាយរបស់ អ.វ.ត.ក នាពេលអនាគត ដែលរបាយការណ៍នេះនឹងត្រូវដាក់បង្ហាញនៅក្នុងមហាសន្និបាត នាពេលខាងមុខ ហើយធានា ថា អ.វ.ត.ក ត្រៀមរៀបចំយុទ្ធសាស្ត្របញ្ចប់ដោយមានផែនការច្បាស់លាស់។
បើទោះបីជាថវិកាឧបត្ថម្ភធនបានធ្វើឲ្យស្ថានភាពហិរញ្ញវត្ថុសម្រាប់ភាគីអន្តរជាតិ នៃ អ.វ.ត.ក មានស្ថិរភាព ប៉ុន្តែនៅតែមានការខ្វះសាច់ប្រាក់សម្រាប់ភាគីជាតិនៃ អ.វ.ត.ក ៕
© រក្សាសិទ្ធិដោយ thmeythmey.com