កីឡាអន្តរជាតិ
អន្តរជាតិ
ប្រធាន FIFA លោក Blatter ត្រូវបានជំរុញឲ្យចុះចេញ
× មន្ត្រីកីឡាបាល់ទាត់ជាន់ខ្ពស់ប្រចាំទ្វីបអឺរ៉ុបកាលពីថ្ងៃអង្គារបានអំពាវនាវជាសាធារណៈឲ្យលោក Sepp Blatter បញ្ចប់រជ្ជកាលរបស់លោកក្នុងនាមជាប្រធានរបស់សហព័ន្ធកីឡាបាល់ទាត់អន្តរជាតិហៅកាត់ថា FIFA ក្នុងចំណោមមានការចោទប្រកាន់ផ្សេងៗទាក់ទងនឹងអំពើពុករលួយប្រឆាំងនឹងការដេញថ្លៃរៀបចំព្រឹត្តិការណ៍ World Cup ឆ្នាំ២០២២ របស់ប្រទេសកាតា។
លោក Michael van Praag ប្រធានសហព័ន្ធកីឡាបាល់ទាត់ហូឡង់ បាននិយាយថា លោក Blatter គួរតែចុះចេញពីតំណែងនៅពេលដែលអាណត្តិរបស់លោកបញ្ចប់នៅឆ្នាំក្រោយ។ ការទាមទារស្រដៀងគ្នាមួយត្រូវបានធ្វើឡើងដោយលោក David Gill អនុប្រធានសមាគមកីឡាបាល់ទាត់អង់គ្លេស។ លោក Blatter អាយុ៧៨ឆ្នាំ បានបើកកិច្ចប្រជុំប្រចាំឆ្នាំរបស់ FIFA ជាផ្លូវការក្នុងកម្មវិធីកម្សាន្តនាពេលល្ងាចមួយនៅក្នុងទីក្រុង Sao Paulo ដោយលោកមិនបានកត់សម្គាល់ទៅលើការវាយប្រហារ ឬក៏រឿងចម្រូងចម្រាស់នៃអំពើពុករលួយឡើយ។ លោកត្រូវបានគេរំពឹងថា នឹងប្រើប្រាស់ការប្រជុំនេះដើម្បីប្រកាសនៅថ្ងៃនេះថា លោកនឹងព្យាយាមបន្តតំណែងក្នុងអាណត្តិរយៈពេល៤ឆ្នាំទៀត។
លោក Blatter បាននិយាយថា៖ «នៅរាត្រីនេះ យើងស្ថិតក្នុងអារម្មណ៍រីករាយ ពីព្រោះរាល់កិច្ចពិភាក្សាផ្សេងៗ និងរាល់អ្វីដែលមានការទាក់ទងជាមួយ FIFA ក៏ដូចជាអ្វីដែលសំខាន់នៅបច្ចុប្បន្ននេះ យើងនឹងលើកយកមកពិភាក្សានៅថ្ងៃស្អែក»។ ការចោទប្រកាន់ទាក់ទងនឹងអំពើពុករលួយ និងការរិះគន់លោក Blatter បានគំរាមដល់ការបារម្ភផ្សេងៗបន្ថែមទៀតនៅថ្ងៃបើកកម្មវិធីប្រកួត World Cup នៅក្នុងទីក្រុង Sao Paulo នៅរាត្រីថ្ងៃស្អែកនេះ។ ប្រេស៊ីលកំពុងតែជួបបញ្ហារួចជាស្រេចជាមួយនឹងការតវ៉ាផ្សេងៗលើការចំណាយប្រាក់ដ៏ច្រើនរៀបចំព្រឹត្តិការណ៍នេះ៕
ប្រែសម្រួលដោយ ផេង សំណាង
© រក្សាសិទ្ធិដោយ thmeythmey.com