កីឡាអន្តរជាតិ
អន្តរជាតិ
លោក Scolari ថា ប្រេស៊ីលធ្វើការកែសម្រួលនៅកន្លែងដ៏ត្រឹមត្រូវមុនជួបក្រូអាស៊ីនារាត្រីនេះ
× លោកគ្រូបង្វឹក Luiz Felipe Scolari កំពុងតែរីករាយជាមួយទម្រង់លេងរបស់ក្រុមជម្រើសជាតិប្រេស៊ីលនៅមុនពេលការប្រកួតបើកឆាកនៃយុទ្ធនាការ World Cup នៅរាត្រីនេះ។ ក្រោយពីទទួលជ័យជម្នះ ៤-០ លើក្រុមជម្រើសជាតិប៉ាណាម៉ា ក្នុងការប្រកួតកម្តៅសាច់ដុំ លោក Scolari បាននិយាយថា ការកែតម្រូវផ្សេងៗនៅតែចាំបាច់ត្រូវតែធ្វើ ប៉ុន្តែ លោកមានអារម្មណ៍ថា ក្រុមរបស់លោកកំពុងតែស្ថិតនៅលើផ្លូវដ៏ល្អក្នុងការត្រៀមលក្ខណៈឲ្យបានរួចរាល់សម្រាប់ការប្រកួតបើកឆាកជាមួយនឹងក្រុមក្រូអាស៊ីនៅរាត្រីនេះ។
លោក Scolari បាននិយាយថា លោកនៅតែបារម្ភ ប៉ុន្តែ មិនខ្លាំងណាស់ណាឡើយ ខណៈដែលលោកបាននាំយកក្រុមមកជាមួយគ្នាដើម្បីបញ្ចប់ការត្រៀមលក្ខណៈរបស់ពួកគេ។ លោកជឿជាក់ថា ប្រសិនបើក្រុមនេះបន្តធ្វើឲ្យល្អដូចនេះ ពួកគេនឹងធ្វើដំណើរទៅកាន់ការប្រកួតបើកឆាកក្នុងលក្ខខណ្ឌដ៏ល្អ។
លោកបាននិយាយថា៖ «យើងត្រូវតែបន្តការធ្វើឲ្យប្រសើរឡើងទៅលើល្បឿនរហូតដល់ការប្រកួតជាមួយនឹងក្រុមជម្រើសជាតិក្រូអាស៊ី។ ប្រេស៊ីលបានជួបភាពត្រដាបត្រដួសនៅពេលជួបក្រុមប៉ាណាម៉ា ដែលធ្វើឲ្យមានការចំអកយ៉ាងខ្លាំងពីសំណាក់អ្នកគាំទ្រនៅកីឡដ្ឋាន Serra Dourada។ ក្រុមនេះបានធ្វើឲ្យទម្រង់លេងមានភាពល្អប្រសើរ ក្រោយពី Neymar រកគ្រាប់បាល់បើកឆាកពីការស៊ុតបាល់ពិន័យ Free-kick នៅនាទី ទី២៦ ហើយបន្ទាប់មកបានទទួលជ័យជម្នះយ៉ាងងាយ។
ស្របពេលជាមួយគ្នានេះ ក្រុមបាល់ទាត់ជម្រើសជាតិក្រូអាស៊ី កំពុងតែត្រៀមលក្ខណៈរួចជាស្រេចក្នុងការបង្ខូចពិធីអបអររបស់ប្រេស៊ីលក្នុងការប្រកួត World Cup បើកឆាករបស់ពួកគេ និងដើម្បីបន្តនាំយកប្រពៃណីនៃការខកចិត្តក្នុងការប្រកួតទី១នៃយុទ្ធនាការនេះ។ ខណៈដែលសម្ពាធផ្សេងៗស្ថិតនៅលើក្រុមម្ចាស់ផ្ទះ លោកគ្រូបង្វឹក NikoKovac របស់ក្រូអាត បាននិយាយកាលពីថ្ងៃពុធថា ក្រុមរបស់លោកអាចផ្តល់នូវលទ្ធផលជាប្រវត្តិសាស្ត្រមួយក្នុងការប្រកួតនៅទីក្រុង Sao Paulo នៅរាត្រីនេះ។
លោក Kovac ដឹងច្បាស់ថា ក្រុមជម្រើសជាតិប្រេស៊ីលគឺជាក្រុមមានប្រៀបជាងគេក្នុងការប្រកួតពូល A ប៉ុន្តែ បានបន្ថែមថា ក្រុមតិចតួចប៉ុណ្ណោះមានការពេញចិត្តក្នុងការជួបក្រុមរបស់លោកនៅថ្ងៃបើកឆាក។ លោកបានឲ្យដឹងនៅកីឡដ្ឋាន Itaquerao ថា៖ «ពួកគេនឹងមិនជួបភាពងាយស្រួលឡើយនៅពេលប្រកួតជាមួយនឹងក្រូអាស៊ី។ យើងជាក្រុមដ៏ខ្លាំងមួយ ហើយខ្ញុំប្រាកដចិត្តថា យើងនឹងបង្ហាញឲ្យឃើញច្បាស់នៅរាត្រីនេះ»។
ក្រុមក្រូអាស៊ីកំពុងតែមានក្តីសង្ឃឹមឈានទៅវគ្គបន្តក្រោយពីត្រូវបានចាប់ឆ្នោតឲ្យស្ថិតនៅក្នុងពូល A រួមជាមួយនឹងម៉ិកស៊ិក និងកាមេរូន។ ការប្រកួតបើកឆាកនៅរាត្រីនេះ នឹងចាប់ផ្តើមនៅម៉ោង៣ទៀបភ្លឺ (ម៉ោងនៅកម្ពុជា) ៕
បីប្រកួតចុងក្រោយរបស់ប្រេស៊ីល
07/06/14 Brazil 1-0 Serbia
04/06/14 Brazil 4-0 Panama
06/03/14 South Africa 0-5 Brazil
បីប្រកួតចុងក្រោយរបស់ក្រុមក្រូអាស៊ី
07/06/14 Croatia 1-0 Australia
31/05/14 Croatia 2-1 Mali
06/03/14 Switzerland 2-2 Croatia
ជំនួបពីរលើកចុងក្រោយរវាងក្រុមទាំងពីរ
WORLD CUP 14/06/06 Brazil 1-0 Croatia
International Friendly 18/08/05 Croatia 1-1 Brazil
ប្រែសម្រួលដោយ ផេង សំណាង
© រក្សាសិទ្ធិដោយ thmeythmey.com