កីឡាអន្តរជាតិ
អន្តរជាតិ
អេស្ប៉ាញចាប់ផ្តើមការពារពាន World Cup ដោយប៉ះហូឡង់នៅរាត្រីនេះ
× ក្រុមបាល់ទាត់ជម្រើសជាតិអេស្ប៉ាញនៅតែស្ថិតក្នុងអារម្មណ៍រីករាយពីការទទួលជ័យជម្នះកាលពីបួនឆ្នាំកន្លងទៅ ខណៈដែលការការពារពានរង្វាន់ World Cup របស់ពួកគេនឹងចាប់ផ្តើមក្នុងពេលពួកគេប៉ះជាមួយនឹងក្រុមម្ចាស់ជើងឯករងឆ្នាំ២០១០ ហូឡង់ ក្នុងទីក្រុង Salvador នៅរាត្រីនេះ ក្នុងការប្រកួតបើកឆាកពូល B។
អេស្ប៉ាញ ដែលជាម្ចាស់ជើងឯកពានរង្វាន់ Euro ឆ្នាំ២០០៨ និងឆ្នាំ២០១២ ធ្វើដំណើរទៅដល់ប្រេស៊ីលជាមួយនឹងកីឡាករ១៦នាក់ដែលជាសមាជិកក្រុមដែលបានទទួលជ័យជម្នះនៅអាហ្វ្រិកខាងត្បូង ក្រោយពីទទួលជ័យជម្នះយ៉ាងលំបាកលើក្រុមហូឡង់កាលពីឆ្នាំ២០១០ នៅនាទីបន្ថែម។
ក្រុមជម្រើសជាតិអេស្ប៉ាញ បានធ្វើការគ្រប់គ្រងបាល់ជាច្រើនក្នុងទីក្រុង Johannesburg និងបានរងនូវការឈូសជើងខ្លាំងយ៉ាងខ្លាំងក្លាពីសំណាក់ខ្សែការពាររបស់ក្រុមជម្រើសជាតិហូឡង់ ប៉ុន្តែ អ្នកគាំទ្រនៅកីឡដ្ឋាន Fonte Nova រំពឹងថា នឹងមានការប្រជែងយ៉ាងខ្លាំងបន្ថែមទៀតនៅពេលនេះជុំវិញការបញ្ជូនបាល់របស់ខ្សែបម្រើ Xavi, Andres Iniestaនិង David Silva ប្រឆាំងនឹងការវាយសម្រុកយ៉ាងរហ័សរបស់ហូឡង់ពីសំណាក់កីឡាករ ArjenRobbenនិង Robin van Persie។
ក្រុមអេស្ប៉ាញរបស់លោក Vincent Del Bosque ដែលត្រូវបានផ្តល់ជំនួយបន្ថែមទៀតពីសំណាក់ខ្សែប្រយុទ្ធដើមដំណើតប្រេស៊ីល Diego Costa នឹងចាប់ផ្តើមស្ថិតក្នុងចំណោមក្រុមមានប្រៀបជាងគេសម្រាប់យុទ្ធនាការនេះក្នុងប្រទេសប្រេស៊ីល ខណៈដែលការទទួលជ័យជម្នះ នឹងធ្វើឲ្យពួកគេក្លាយជាក្រុមអឺរ៉ុបទី១ក្នុងការឈ្នះពាន World Cup នៅលើទឹកដីទ្វីបអាមេរិក។
ការជឿជាក់បន្ថែមទៀតនឹងកើតឡើងដោយសារតែ Costa ដែលនឹងទទួលការសាទរតាំងពីតំបន់ Lagarto នៅភាគឦសាននៃប្រទេសប្រេស៊ីល ហើយក្រុមគ្រួសាររបស់គេនឹងធ្វើដំណើរចម្ងាយ៣៥០គីឡូម៉ែត្រទៅកាន់ទីក្រុង Salvador ដើម្បីទស្សនាការប្រកួតរបស់គេជាមួយនឹងក្រុមហូឡង់។ វត្តមានរបស់គេក្នុងក្រុមជម្រើសទាំង១១នាក់ដំបូងរបស់អេស្ប៉ាញនឹងនាំការជឿជាក់បន្ថែមទៀតទៅដល់ក្រុមមួយដែលជារឿយៗលេងដោយមិនមានខ្សែប្រយុទ្ធកណ្តាល។ ការប្រកួតនៅរាត្រីនេះនឹងចាប់ផ្តើមនៅម៉ោង២ទៀបភ្លឺ៕
ជំនួបពីរលើកចុងក្រោយរវាងក្រុមទាំងពីរ
WORLD CUP 12/07/10 ហូឡង់ 0-0 អេស្ប៉ាញ
INTER-FRIENDLY 28/03/02 ហូឡង់ 1-0 អេស្ប៉ាញ
ការប្រកួតគូផ្សេងទៀតនៅរាត្រីនេះ
ពូល A
ម៉ិកស៊ិក v កាមេរូន -11 យប់
ពូល B
អេស្ប៉ាញ v ហូឡង់- 2 រំលងអាធ្រាត្រ
ឈីលី v អូស្ត្រាលី - 5 ព្រឹក
ប្រែសម្រួលដោយ ផេង សំណាង
© រក្សាសិទ្ធិដោយ thmeythmey.com