ការប្រកួត FIFA World Cup ឆ្នាំ២០១៤ បានឈានចូលដល់ថ្ងៃទីកាលពីយប់ថ្ងៃសុក្រ ឈានចូលថ្ងៃសៅរ៍ ដោយក្រុមជម្រើសជាតិម៉ិកស៊ិក ហូឡង់ និងឈីលី សុទ្ធតែបានកត់ត្រានៅជ័យជម្នះរបស់ខ្លួនទៅតាមលំដាប់លំដោយលើក្រុមជម្រើសជាតិ កាមេរូន អេស្ប៉ាញ និងអូស្ត្រាលី។
Peralta នាំម៉ិកស៊ិក ទទួលជ័យជម្នះ ១-០ លើកាមេរូន
ខ្សែប្រយុទ្ធ Oribe Peralta ក្លាយបានជាវីរបុរសរបស់ក្រុមជម្រើសជាតិម៉ិកស៊ិក តាមរយៈការស៊ុតបាល់បញ្ចូលទីតែមួយគ្រាប់ ដែលជាគ្រាប់បាល់ជ័យជម្នះលើកាមេរូន នាការប្រកួតលើកដំបូងរបស់ពួកគេនៅក្នុងពូល A នៅកីឡដ្ឋាន Arena das Dunas ក្រុង Natal។
Peralta បានស៊ុតបាល់បញ្ចូលទីនៅក្នុងនាទី ទី៦១ ខណៈតង់ទីមួយ គ្រាប់បញ្ចូលទីរហូតដល់ទៅ៣គ្រាប់ស្ថិតក្នុងតំបន់អកហ្សឺ។ ថ្វីត្បិត Peralta ជាអ្នកនាំជ័យជម្នះដល់ម៉ិកស៊ិកជាលើកដំបូងលើក្រុមមកពីតំបន់អាហ្វ្រិក ក៏ដោយ ប៉ុន្តែពានរង្វាន់កីឡាករឆ្នើមប្រចាំការប្រកួត (Man of the Match) ត្រូវបានទៅលើខ្សែប្រយុទ្ធ Giovani Dos Santos។ ជោគជ័យនេះ បាននាំឲ្យម៉ិកស៊ិកស្ថិតនៅលំដាប់លេខពីរនៅក្នុងពូល A បន្ទាប់ពីម្ចាស់ផ្ទះប្រេស៊ីល ដែលបានយកឈ្នះក្រូអាស៊ី ៣-១ ។
ជើងឯករងហូឡង់ បំបាក់ម្ចាស់ការពារជើងឯកអេស្ប៉ាញក្នុងលទ្ធផល ៥-១
ជំនួបបើកឆាកក្នុងពូល B នៅកីឡដ្ឋាន Arena Fonte Nova ក្រុង Salvador ធ្វើឲ្យក្រុមម្ចាស់ការពារតំណែងជើងឯកអេស្ប៉ាញទទួលបានកំណត់ត្រាបរាជ័យដ៏បំផុតក្នុងប្រវត្តិសាស្ត្ររបស់ខ្លួន ដោយហូឡង់តាមវាយបកពីក្រោយចំនួន៤គ្រាប់ដើម្បីទទួលបានជ័យជម្នះ ៥-១ ។ នៅនាទី ទី២៧ ខ្សែបម្រើ Xabi Alonso បានស៊ុតបាល់ប៉េណាល់ទីនាំមុខមួយគ្រាប់មុនសម្រាប់អេស្ប៉ាញ ប៉ុន្តែនៅចុងតង់ទីមួយ ខ្សែប្រយុទ្ធ Robin van Persie បានវាយបកតាមស្មើ ១-១ ។ ឈានចូលដល់តង់ទីពីរ ហូឡង់ដែលបានខកខានទទួលពានកាលពីឆ្នាំ២០១០ នោះ បានបន្តដាក់សម្ពាធលើអេស្ប៉ាញ តាមរយៈការបន្ថែមគ្រាប់បាល់ បញ្ចូលទីចំនួន៤គ្រាប់ទៀត ដែលសម្រេចបានដោយ Arjen Robben (នាទី៥៣ និង៨០) Robin van Persie (នាទី៧២ ) និង Stefan de Vrij (នាទី៦៤ )។
ការធ្លាយសំណាញ់ទីចាប់ពីបួនគ្រាប់ឡើងទៅ គឺជាបរាជ័យដ៏ធំធេងរបស់ក្រុមមួយដែលជាម្ចាស់ការពារតំណែងជើងឯក ហើយអេស្ប៉ាញរងភាពចុកចាប់នេះជាលើកដំបូងក្នុងការប្រកួតជាអន្តរជាតិបើគិតចាប់តាំងពីពួកគេចាញ់ស្កុតឡែន ៦-២ កាលពីឆ្នាំ១៩៦៣ ។ Robin van Persie ដែលរកគ្រាប់បាល់បញ្ចូលទីចំនួនពីរគ្រាប់បានឈ្នះរង្វាន់ Man of the Match។
ឈីលីឡើងចំណាត់ថ្នាក់លេខពីរក្នុងពូល B បន្ទាប់ពីបំបាក់អូស្ត្រាលី ៣-១
សម្រាប់ជំនួបគូទីពីរនៃពូល B ដែលប្រព្រឹត្តទៅនៅលើទីលាន Arena Pantanal ក្រុង Cuiabá ក្រុមជម្រើសជាតិឈីលី បានរីករាយជាមួយនឹងជ័យជម្នះ ៣-១ របស់ខ្លួនលើអូស្ត្រាលី។ ខ្សែប្រយុទ្ធ Alexis Sanchez បានរកគ្រាប់បាល់បើកឆាកនៅក្នុងនាទី ទី១២ ហើយពីរនាទីក្រោយមក Jorge Valdivia បន្ថែមបានមួយគ្រាប់ទៀត។ Tim Cahill វាយបកបានមួយគ្រាប់ឲ្យអូស្ត្រាលីនៅនាទី ទី៣៥ ប៉ុន្តែមុននឹងបញ្ចប់ការប្រកួត Jean Beausejour រកបានគ្រាប់ទីបីឲ្យឈីលី។
ជ័យជម្នះរបស់ឈីលីដែលមានការស៊ុតបាល់បញ្ចូលទីរហូតដល់ទៅ៣គ្រាប់ គឺជាកំណត់ត្រានៅក្នុង World Cup ជាលើកដំបូងរបស់ក្រុមជម្រើសជាតិអាមេរិកខាងត្បូងមួយនេះក្នុងចំណោម២៣ប្រកួតរបស់ខ្លួន បន្ទាប់ពីជ័យជម្នះ ៣-១ របស់ពួកគេលើស្វ៊ីសកាលពីឆ្នាំ១៩៦២ ។ Sanchez ទទួលបានពាន Man of the Match ខណៈឈីលីឡើងទៅឈរលេខពីរពូល B បន្ទាប់ពីហូឡង់៕