កីឡាអន្តរជាតិ
អន្តរជាតិ
អ៊ីតាលីបំបាក់អង់គ្លេស ខណៈកូស្តារីកា និងកូឡុំប៊ី សុទ្ធតែបានជោគជ័យផងដែរ Mario Balotelli របស់អ៊ីតាលីអបអរគ្រាប់បាល់បញ្ចូលទីជាមួយ Marco Verratti។ រូបថត fifa.com
× ក្រុមជម្រើសជាតិកូស្តារីកា បានបំបាក់អ៊ុយរូហ្គាយ ៣-១ មុនពេល អ៊ីតាលីយកឈ្នះអង់គ្លេស ២-១ នាការប្រកួតបើកឆាកពូល D នៃព្រឹត្តិការណ៍ World Cup ឆ្នាំ២០១៤ ក្នុងប្រទេសប្រេស៊ីល នៅថ្ងៃអាទិត្យ ទី១៥ ខែមិថុនា នេះ។ ដោយឡែកការប្រកួតនៅក្នុងពូល C កូឡុំប៊ីបានទទួលជោគជ័យយ៉ាងធំធេងជាមួយនឹងជ័យជម្នះ ៣-០ លើក្រិក។
Mario Balotelli នាំអ៊ីតាលីផ្តួលអង់គ្លេស
ខ្សែប្រយុទ្ធ Mario Balotelli បានធ្វើឲ្យអង់គ្លេសខកចិត្តជាមួយនឹងគ្រាប់បាល់ឈ្នះរបស់គេ ខណៈដែលក្រុមបាល់ទាត់ជម្រើសជាតិអ៊ីតាលីបានចាប់ផ្តើមយុទ្ធនាការ World Cup របស់ពួកគេជាមួយនឹងជ័យជម្នះ ២-១ លើក្រុមជម្រើសជាតិអង់គេ្លសក្នុងទីក្រុង Manaus នៅព្រឹកថ្ងៃអាទិត្យនេះ។
ខ្សែការពារស្លាបឆ្វេងអន្តរជាតិអង់គ្លេស Leighton Baines ដែលហាក់ដូចជាមិនស្ថិតក្នុងទម្រង់លេងដ៏ល្អនោះ បានបណ្តោយឲ្យកីឡាករ Antonio Candreva បញ្ជូនបាល់ឆ្លងពីខាងស្តាំទៅឲ្យ Balotelli ដើម្បីតែតបាល់បញ្ចូលទីនៅនាទី ទី៥០ ។
ខ្សែបម្រើ Andrea Pirlo ស្ទើរតែធ្វើឲ្យក្រុមខ្លួននាំមុខ ៣-១ ទៅហើយនៅជិតបញ្ចប់ការប្រកួត ប៉ុន្តែ ការទាត់បាល់ពិន័យពីចម្ងាយរបស់គេបានហោះប៉ះនឹងរបារទី។ ខ្សែបម្រើ Claudio Marchisio បានជួយឲ្យអ៊ីតាលីនាំមុខមុនពីការស៊ុតពីចម្ងាយ២៥ម៉ែត្រចូលទីយ៉ាងល្អ ខណៈដែលអង់គ្លេសបានវាយបកដើម្បីតាមស្មើវិញក្នុងរយៈពេល២នាទីក្រោយមកតាមរយៈការស៊ុតបាល់របស់ខ្សែប្រយុទ្ធ Daniel Sturridge ក្រោយពីការបញ្ជូនបាល់របស់ Wayne Rooney។
កូស្តារីកាយកឈ្នះអ៊ុយរូហ្គាយ ៣-១
សម្រាប់ការប្រកួតនៅលើទីលាន Estádio Castelão, Fortaleza ក្រុមមកពីតំបន់អាមេរិកកណ្តាលកូស្តារីកា បានបង្ហាញការភ្ញាក់ផ្អើលតាមរយៈការវាយបក៣គ្រាប់នៅតង់ទីពីរ បន្ទាប់ពី Edinson Cavani បានស៊ុតបាល់ប៉េណាល់ទីនាំមុខសម្រាប់អ៊ុយរូហ្គាយនៅពាក់កណ្តាលតង់ទីមួយ។
ខ្សែប្រយុទ្ធ Joel Campbell រកបានគ្រាប់បាល់តាមស្មើនៅនាទី ទី៥៤ ហើយបីនាទីក្រោយមក Oscar Duartre បន្ថែមគ្រាប់ទីពីរ ខណៈគ្រាប់ទីបីរកបានដោយ Marcos Urena នៅក្នុងនាទី ទី៨៤ ។ ខ្សែការពារ Maximiliano Pereira របស់អ៊ុយរូហ្គាយ បានទទួលកាតក្រហមនៅចុងតង់ផងដែរ។
នេះជាជ័យជម្នះលើកដំបូងរបស់កូស្តារីកា នៅក្នុង World Cup ដែលមានការស៊ុតបាល់បញ្ចូលទីលើសពីពីរគ្រាប់ ស្របពេលដែលអតីតម្ចាស់ជើងឯក World Cup ២ជំនាន់ អ៊ុយរូហ្គាយជាមួយនឹងអវត្តមានខ្សែប្រយុទ្ធ Luis Suarez ទទួលរងនូវការខកចិត្តដោយមិននឹងស្មានដល់។
សម្រាប់ពូល D កូស្តារីកា មានឱកាសឡើងឈរលើកំពូលតារាងជាបណ្តោះអាសន្ន ដោយមានគ្រាប់បាល់បញ្ចូលលើសអ៊ីតាលី មួយគ្រាប់ ខណៈអង់គ្លេស និងអ៊ុយរូហ្គាយ ត្រូវតែមានការប្រឹងប្រែងខ្ពស់សម្រាប់ការប្រកួតជាបន្តបន្ទាប់ទៀត។
កូឡុំប៊ីបំបាក់ក្រិក ៣-០ នៅក្នុងពូល C
ក្រុមបាល់ទាត់ជម្រើសជាតិកូឡុំប៊ីបានផ្តួលក្រិក ៣-០ ក្នុងការប្រកួតបើកឆាកនៃពូល C។ នៅក្នុងការប្រកួតដ៏គួរឲ្យចាប់អារម្មណ៍ និងមានគ្រាប់បាល់ស៊ុតបញ្ចូលទីដ៏ច្រើនមួយផ្សេងទៀត ក្រុមជម្រើសជាតិកូស្តារីកា បានវាយបកពីការដេញតាមពីក្រោយគ្រាប់បាល់ស៊ុតប៉េណាល់ទីដើម្បីទទួលជ័យជម្នះដ៏មិននឹកស្មានដល់នៅកីឡដ្ឋាន Castelao ក្នុងរដ្ឋ Fortaleza។ លទ្ធផលនេះបានកើតឡើងត្រឹមតែរយៈពេល២៤ម៉ោង ក្រោយពីក្រុមបាល់ទាត់ជម្រើសជាតិហូឡង់បានបំបាក់ក្រុមម្ចាស់ការពារតំណែងជើងឯកអេស្ប៉ាញ យ៉ាងចាស់ដៃក្នុងលទ្ធផល ៥-១ ក្នុងទីក្រុង Salvador។
ក្រុមជើងខ្លាំងអាហ្វ្រិក កូតឌីវ័រ និងក្រុមជើងខ្លាំងអាស៊ី កំពុងស្វែងរកឱកាសដើម្បីទទួលបានពិន្ទុរៀងៗខ្លួននៅក្នុងពូល C ផងដែរ៕
ប្រែសម្រួលដោយ ផេង សំណាង
© រក្សាសិទ្ធិដោយ thmeythmey.com