កីឡាអន្តរជាតិ
អន្តរជាតិ
World Cup៖ ពូលA ចាប់ផ្តើមជុំទីពីរ ខណៈH ចាប់ដំណើរការ
× ម្ចាស់ផ្ទះប្រេស៊ីល ត្រូវប៉ះជាមួយម៉ិកស៊ិក ដោយក្រុមទាំងពីរត្រូវការជ័យជម្នះរៀងៗសម្រាប់ជំនួបជុំទីពីរនៅក្នុងពូល A នារាត្រីថ្ងៃអង្គារ ឈានចូលរាត្រីថ្ងៃពុធនេះ។ រីឯពូល H ចាប់ផ្តើមដំណើរការរបស់ខ្លួន ដោយបែលហ្ស៊ិក ត្រូវជួបជាមួយអាល់ហ្សេរី មុនពេលដែល រុស្ស៊ី ត្រូវតទល់ជាមួយកូរ៉េខាងត្បូង។
ប្រេស៊ីល និងម៉ិកស៊ិក ត្រូវការជ័យជម្នះពីរលើកជាប់ៗគ្នា
ការទទួលជ័យជម្នះក្នុងការប្រកួតពូល A ក្នុងទីក្រុង Fortaleza នៅវេលាម៉ោង២ទៀបភ្លឺ (ម៉ោងនៅកម្ពុជា) នៅរាត្រីនេះ ក៏នឹងក្លាយជាការសងសឹកមួយរបស់ប្រេស៊ីល សម្រាប់ការរងបរាជ័យក្នុងលទ្ធផល ២-១ ក្រោមថ្វីជើងរបស់ក្រុមម៉ិកស៊ិកក្នុងព្រឹត្តិការណ៍កីឡាអូឡាំពិកវគ្គផ្តាច់ព្រ័ត្រ ក្នុងទីក្រុងឡុងដ៍ កាលពីឆ្នាំ២០០២ ផងដែរ។
ប្រេស៊ីលបានផ្តួលក្រុមក្រូអាស៊ីក្នុងលទ្ធផល ៣-១ ក្នុងការប្រកួតបើកឆាកពូល A ខណៈលោកគ្រូបង្វឹក Scolari នឹងសម្លឹងរកការបង្ហាញពីទម្រង់លេងប្រកបដោយភាពជឿជាក់បន្ថែមទៀតពីសំណាក់ក្រុមជើងខ្លាំងមួយនេះ។ ប្រសិនបើប្រេស៊ីលទទួលជ័យជម្នះ ហើយការប្រកួតរវាងក្រុមជម្រើសជាតិកាមេរូន និងក្រូអាស៊ីនៅថ្ងៃពុធស្អែកនេះ បញ្ចប់ក្នុងលទ្ធផលស្មើ ឬក៏ការទទួលជ័យជម្នះសម្រាប់ក្រូអាស៊ី នោះក្រុមម្ចាស់ផ្ទះមួយនេះ នឹងឈ្នះកៅអីដើម្បីទៅលេងក្នុងវគ្គបន្ត។ ម៉ិកស៊ិកបានផ្តួលកាមេរូន ១-០ ក្នុងការប្រកួតទី១របស់ពួកគេដែលមានភាពចម្រូងចម្រាស់លើការកាត់សេចក្តីរបស់លោកអាជ្ញាកណ្តាលផងដែរ។ គ្រាប់បាល់បញ្ចូលទីពីរគ្រាប់ពីសំណាក់ Giovani dos Santos មិនបានត្រូវបានអនុញ្ញាតឲ្យចូលទីជាផ្លូវការដោយលោកអាជ្ញាកណ្តាល។
ប្រេស៊ីល និងម៉ិកស៊ិកមានប្រវត្តិសាស្ត្រមួយក្នុងទីក្រុង Fortaleza។ នៅពេលដែលពួកគេជួបគ្នាក្នុងការប្រកួត Confederations Cup នៅទីនោះកាលពីពីរឆ្នាំកន្លងទៅ ការគោរពភ្លេងជាតិត្រូវបានផ្អាកក្រោយពីរយៈពេល៩០វិនាទី ហើយអ្នកគាំទ្ររបស់ប្រេស៊ីលបានបន្តច្រៀងរហូតដល់បញ្ចប់បទដែលធ្វើឲ្យប្រធានក្រុម Thiago Silva បាននិយាយថា វាបានជួយឲ្យពួកគេទទួលជ័យជម្នះ ២-០ ។
លោក Hong រំពឹងថា នាំកូរ៉េខាងឲ្យទទួលជោគជ័យ
ក្នុងការបង្ហាញខ្លួនជាលើកទី៤ និងជាលើកចុងក្រោយនៃយុទ្ធនាការ World Cup ជុំផ្តាច់ព្រ័ត្រក្នុងនាមជាកីឡាករម្នាក់ លោក Hong Myung-bo បានជួយឲ្យក្រុមបាល់ទាត់ជម្រើសជាតិកូរ៉េខាងត្បូងមានភាពល្បីល្បាញតាមរយៈការជួយឲ្យពួកគេឈានទៅប្រកួតវគ្គពាក់កណ្តាលផ្តាច់ព្រ័ត្រក្នុងឆ្នាំ២០០២ ។
រយៈពេល១២ឆ្នាំក្រោយមក ខណៈដែលបច្ចុប្បន្នស្ថិតក្នុងនាមជាគ្រូបង្វឹកនៃក្រុមជម្រើសជាតិ វានឹងក្លាយជាសមិទ្ធផលដ៏គួរឲ្យសម្គាល់មួយ ប្រសិនបើលោកជួយឲ្យក្រុមមួយនេះឆ្លងផុតការប្រកួតជម្រុះតាមពូល។ យុទ្ធនាការនៃការប្រកួតជម្រុះប្រចាំទ្វីបដ៏ខកចិត្តរបស់ពួកគេ អាចនឹងរំខានដល់ការជឿជាក់របស់កូរ៉េខាងត្បូង នៅមុនការប្រកួតបើកឆាកនៃពូល H របស់ពួកគេជាមួយនឹងក្រុមជម្រើសជាតិរុស្ស៊ីរបស់លោក Fabio Capello នៅរាត្រីនេះ ប៉ុន្តែ ពួកគេមាននូវបទពិសោធយ៉ាងច្រើនក្នុងការប្រកួត World Cup។
គ្រូបង្វឹករបស់រុស្ស៊ីលោក Capello បានជួបភាពវេទនាយ៉ាងខ្លាំងក្នុងការប្រកួត World Cup ជាលើកទី១របស់លោកក្នុងនាមជាគ្រូបង្វឹករបស់ក្រុមបាល់ទាត់ជម្រើសជាតិអង់គ្លេស កាលពីឆ្នាំ២០១០ តាមរយៈការដឹកនាំឲ្យក្រុមនេះឈានទៅវគ្គ១៦ក្រុមទាំងត្រដាបត្រដួស មុននឹងរងបរាជ័យយ៉ាងចាស់ដៃក្រោមថ្វីជើងអាល្លឺម៉ង់។
បិសាចក្រហមបែលហ្ស៊ិករំពឹងផ្តួលអាល់ហ្សេរីនៅរាត្រីនេះ
ក្រុមបាល់ទាត់ជម្រើសជាតិបែលហ្ស៊ិកនឹងវិលទៅកាន់ការប្រកួត World Cup ជាលើកទី១របស់ពួកគេក្នុងរយៈពេល១២ឆ្នាំជាមួយនឹងការមានពោរពេញដោយក្តីសង្ឃឹមនិងការប្តេជ្ញាចិត្តនៅមុនពេលការប្រកួតបើកឆាកក្នុងពូល H ជាមួយនឹងក្រុមបាល់ទាត់ជម្រើសជាតិអាល់ហ្សេរី។
ក្រុមកីឡាករឆ្នើមៗរបស់បែលហ្ស៊ិកក្នុងជំនាន់មួយនឹងត្រូវធ្វើការប្រជែងគ្នាយ៉ាងខ្លាំងក្លាដើម្បីដណ្តើមកៅអីក្នុងជម្រើសទាំង១១នាក់ដំបូងសម្រាប់ការប្រកួតកីឡដ្ឋាន EstadioMineiraoនារាត្រីនេះ។កីឡាករមួយចំនួនត្រូវបានប្រឈមមុខនឹងការឈូសជើងខ្លាំងក្នុងវគ្គហ្វឹកហាត់ដើម្បីបង្ហាញពីភាពរឹងមាំរបស់ខ្លួន៕
កម្មវិធីប្រកួតនៅរាត្រីនេះ៖
-ម៉ោង១១យប់៖ បែលហ្ស៊ិក ជួប អាល់ហ្សេរី
-ម៉ោង២រំលងអាធ្រាត្រ៖ ប្រេស៊ីល ជួប ម៉ិកស៊ិក
-ម៉ោង៥ទៀបភ្លឺ៖ រុស្ស៊ី ជួប កូរ៉េខាងត្បូង
ប្រែសម្រួលដោយផេងសំណាង
© រក្សាសិទ្ធិដោយ thmeythmey.com