បែលហ្ស៊ិកបានឈរលើតារាងជាបណ្តោះអាសន្នក្នុងពូល H បន្ទាប់ពីពួកគេបានវាយបកដើម្បីយកឈ្នះអាល់ហ្សេរី ២-១ មុនពេលដែលរុស្ស៊ី និងកូរ៉េខាងត្បូងបញ្ចប់ក្នុងលទ្ធផល ១-១ ។ ដោយឡែកនាយប់ថ្ងៃអង្គារ ឈានចូលថ្ងៃពុធ នេះផងដែរ ម្ចាស់ផ្ទះប្រេស៊ីល និងម៉ិចស៊ិក បានបញ្ចប់ការប្រកួតដោយគ្មានការស៊ុតបាល់បញ្ចូលទី នាការប្រកួតជុំទីពីរនៅក្នុងពូល A ។
ក្រុមបាល់ទាត់ជម្រើសជាតិបែលហ្ស៊ិកបានដាក់ចេញនូវការវាយបកយ៉ាងខ្លាំងក្លានៅជិតបញ្ចប់ការប្រកួតដើម្បីផ្តួលក្រុមជម្រើសជាតិអាល់ហ្សេរីក្នុងលទ្ធផល ២-១ និងដើម្បីរារាំងមិនឲ្យក្រុមមកតំបន់អាហ្វ្រិកមួយនេះកត់ត្រាជ័យជម្នះជាលើកទី១ក្នុងការប្រកួត World Cup ក្នុងរយៈពេល៣២ឆ្នាំកាលពីថ្ងៃអង្គារ។
គ្រាប់បាល់ស៊ុតបញ្ចូលទីនៅតង់ទី២ពីសំណាក់ខ្សែបម្រើ MarouaneFellainiនិង Dries Mertens បាននាំជ័យជម្នះក្នុងការប្រកួតបើកឆាកនៃពូល H សម្រាប់ក្រុមមានរហស្សនាមបិសាចក្រហមមួយនេះតែម្តង ក្រោយពីក្រុមអាល់ហ្សេរីបានធ្វើការនាំមុខមុននៅនាទី ទី២៥តាមរយៈការស៊ុតបាល់ប៉េណាល់ទីរបស់កីឡាករ SofianeFeghouli។
ខ្សែបម្រើ Fellaini របស់ក្លិប Manchester United បានតែតបាល់បំប៉ោងសំណាញ់ដើម្បីជួយឲ្យបែលហ្ស៊ិកតាមស្មើនៅនាទី ទី៧០ នៅមុនពេល Mertens បានបន្ថែមមួយគ្រាប់ទៀតក្នុងរយៈពេល១០នាទីចុងក្រោយ ក្រោយពីមានការបញ្ជូនបាល់យ៉ាងល្អពីសំណាក់ខ្សែបម្រើ Eden Hazard តាមរយៈការស៊ុតបាល់ផុតដៃអ្នកចាំទី RaisM'bolhi របស់អាល់ហ្សេរីចូលទីយ៉ាងល្អតែម្តង។
ក្នុងការប្រកួតមួយគូទៀតនៃពូល H កីឡាករ Alexander Kerzhakov បានសង្គ្រោះរុស្ស៊ីក្នុងការប្រកួត World Cup ជុំផ្តាច់ព្រ័ត្រជាលើកទី១របស់ពួកគេបើគិតចាប់តាំងពីឆ្នាំ២០០២ តាមរយៈការស៊ុតបញ្ចូលទីត្រឹមរយៈពេល២នាទីក្រោយពីរូបគេចូលលេងក្នុងនាមជាកីឡាករបម្រុងដើម្បីជួយឲ្យក្រុមខ្លួនបញ្ចប់ក្នុងលទ្ធផលស្មើ ១-១ នៅពេលប្រកួតជាមួយនឹងក្រុមកូរ៉េខាងត្បូង កាលពីថ្ងៃអង្គារ។
Kerzhakov ត្រូវបានដាក់ឲ្យចូលលេងនៅនាទី ទី៧២ ក្រោយពីខ្សែបម្រើស្លាប Lee Keun-Ho បានជួយឲ្យកូរ៉េខាងត្បូងនាំមុខតាមរយៈការស៊ុតបាល់ពីចម្ងាយ៣០ម៉ែត្រដែលបានធ្វើឲ្យអ្នកចាំទី Igor Akinfeev របស់រុស្ស៊ី ចាប់បាល់ក្រឡកចូលក្នុងសំណាញ់ទីតាំងម្តង។
ស្របពេលជាមួយគ្នានេះ ក្រុមម្ចាស់ផ្ទះប្រេស៊ីល បានបញ្ចប់ត្រឹមលទ្ធផលស្មើ ០-០ ក្នុងពេលជួបជាមួយនឹងក្រុមម៉ិកស៊ិក ក្នុងការប្រកួតជើងទី២នៃពូល A របស់ពួកគេ៕