កីឡាអន្តរជាតិ
អន្តរជាតិ
World Cup៖ អេស្ប៉ាញរំពឹងជះកំហឹងដាក់លើក្រុមឈីលី
× ក្រោយពីរងបរាជ័យយ៉ាងចាស់ដៃក្នុងការប្រកួតបើកឆាក ក្រុមបាល់ទាត់ជម្រើសជាតិអេស្ប៉ាញ នឹងមានបំណងគេចឲ្យផុតពីការក្លាយជាក្រុមទី៣ក្នុងព្រឹត្តិការណ៍World Cup នៅពេលជួបក្រុមជម្រើសជាតិឈីលីនៅរាត្រីនេះ។ ការរងបរាជ័យមួយផ្សេងទៀតក្រោយពីការរងបរាជ័យយ៉ាងចាស់ដៃក្នុងលទ្ធផល ៥-១ ក្រោមស្នាដៃក្រុមជម្រើសជាតិហូឡង់ នឹងស្ទើរតែកម្ទេចក្តីសុបិននៃការការពារពានរង្វាន់របស់ក្រុមអេស្ប៉ាញ។
ការធ្លាក់ចេញត្រឹមការប្រកួតជម្រុះតាមពូល នឹងធ្វើឲ្យអេស្ប៉ាញក្លាយជាម្ចាស់ជើងឯកអឺរ៉ុបទី៣នៃយុទ្ធនាការ World Cup ក្នុងការវិលទៅផ្ទះវិញត្រឹមតែការប្រកួតជម្រុះតាមពូលក្នុងនាមជាម្ចាស់ការពារតំណែងជើងឯក។ ខ្សែបម្រើ CescFabregas ដែលជាកីឡាករជើងចាស់ម្នាក់ក្នុងចំណោមកីឡាករទាំង៦នាក់របស់ក្រុមអេស្ប៉ាញ ដែលបានក្លាយជាក្រុមដ៏ខ្លាំងបំផុតរបស់ពិភពលោកក្នុងរយៈពេល៦ឆ្នាំជាប់ៗគ្នានោះ បាននិយាយថា៖ «ប្រសិនបើយើងមិនឈ្នះទេនោះ យើងនឹងទៅផ្ទះវិញ ហើយលទ្ធផលនៃតបស្នងនឹងផ្តល់នូវការឈឺចាប់យ៉ាងខ្លាំង»។
ក្រុមជម្រើសជាតិអេស្ប៉ាញ នឹងធ្វើការប្រកួតនៅកីឡដ្ឋាន Maracana ហើយគួរតែដឹងយ៉ាងច្បាស់ពីសារសំខាន់នៃការប្រកួតនេះ ប្រសិនបើពួកគេមានបំណងទៅប្រកួតវគ្គផ្តាច់ព្រ័ត្រនាថ្ងៃទី១៣ ខែកក្កដា។ នៅមុននេះបន្តិច ក្នុងទីក្រុង Porto Alegre ក្រុមជម្រើសជាតិហូឡង់ នឹងត្រូវជួបជាមួយនឹងក្រុមអូស្ត្រាលីដែលបានរងបរាជ័យ ៣-១ ក្រោមស្នាដៃក្រុមស៊ីលី។ ខ្សែបម្រើ Xabi Alonso បាននិយាយថា៖ «ក្រោយពីការជួបលទ្ធផលដ៏ខកចិត្តនៅពេលជួបហូឡង់ យើងដឹងថា នេះជាការប្រកួតវគ្គផ្តាច់ព្រ័ត្រសម្រាប់យើង។ យើងរំពឹងថា នឹងមានភាពស្វិតស្វាញជាមិនខាន»។
ស្របពេលជាមួយគ្នានេះ ខ្សែប្រយុទ្ធអន្តរជាតិអូស្ត្រាលី Mathew Leckie ជឿជាក់ថា ក្រុមរបស់គេអាចនឹងក្លាយជាក្រុមចុងក្រោយគេបំផុតក្នុងការផ្តល់នូវការខកចិត្តមួយក្នុងព្រឹត្តិការណ៍ World Cup នៅត្រីនេះ នៅពេលដែលពួកគេជួបជាមួយនឹងក្រុមហូឡង់ ដែលទើបតែផ្តួលក្រុមម្ចាស់ការពារតំណែងជើងឯកអេស្ប៉ាញ ៥-១ ។
ក្រុមមានរហស្សនាមថា Socceroos មួយនេះ ចាំបាច់ត្រូវតែដណ្តើមយកអ្វីមួយពីការប្រកួតនេះ ប្រសិនបើពួកគេចង់ធ្វើល្អដូចក្នុងពេលពួកគេឈានទៅប្រកួតវគ្គ១៦ក្រុមចុងក្រោយនៃព្រឹត្តិការណ៍ World Cup ឆ្នាំ២០០៦ ក្រោយពីរងបរាជ័យក្នុងលទ្ធផល ៣-១ ក្រោមថ្វីជើងរបស់ក្រុមស៊ីលីក្នុងការប្រកួតបើកឆាករបស់ពួកគេ៕
កម្មវិធីប្រកួតនៅរាត្រីនេះ
ហូឡង់ v អូស្ត្រាលី - ម៉ោង១១យប់
អេស្ប៉ាញ v ឈីលី - ម៉ោង២ទៀបភ្លឺ
កាមេរូន v ក្រូអាស៊ី- ម៉ោង៥ព្រឹក
ប្រែសម្រួលដោយ ផេង សំណាង
© រក្សាសិទ្ធិដោយ thmeythmey.com