ម្ចាស់ការពារតំណែងជើងឯកអេស្ប៉ាញ អូស្ត្រាលី និងកាមេរូន សុទ្ធតែហាលអាវ

កីឡាអន្តរជាតិ

អន្តរជាតិ

ម្ចាស់ការពារតំណែងជើងឯកអេស្ប៉ាញ អូស្ត្រាលី និងកាមេរូន សុទ្ធតែហាលអាវ

19, Jun 2014 , 7:33 am

រូបភាព

ដោយ: ថ្មីៗ

ម្ចាស់ការពារតំណែងជើងឯកអេស្ប៉ាញ បានទទួលរងនូវការខកចិត្តយ៉ាងខ្លាំងដោយត្រូវអស់សិទ្ធិទៅប្រកួតវគ្គបន្តក្រោយបរាជ័យពីរលើកជាប់ៗគ្នា។ នាការប្រកួតកាលយប់ថ្ងៃពុធ ឈានចូលថ្ងៃព្រហស្បតិ៍នេះ ពួកគេបានចាញ់ឈីលី ២-០ បន្ទាប់ពីរងគ្រោះ ៥-១ ដោយសារហូឡង់។ អូស្ត្រាលីក៏ជាក្រុមដែលត្រូវហាលអាវផងដែរ បន្ទាប់ពីពួកគេចាញ់ហូឡង់ ៣-២ ។ ដូច្នេះការប្រកួតបន្ទាប់ ហូឡង់ និងឈីលី ត្រូវដណ្តើមគ្នាយកលេខមួយក្នុងពូល ខណៈអេស្ប៉ាញ និងអូស្ត្រាលី ត្រូវប្រកួតបង្គ្រប់កិច្ច។ ខណៈអេស្ប៉ាញជាក្រុមពីតំបន់អឺរ៉ុប និងអូស្ត្រាលី តំណាងឲ្យតំបន់អាស៊ី ដែលអស់ឱកាសទៅវគ្គបន្តនោះ ក្រុមកាមេរូនគឺជាក្រុមមកពីតំបន់អាហ្វ្រិកដែលត្រូវមានវាសនាដូចគ្នា។ សម្រាប់ការប្រកួតក្នុងពូល A កាមេរូនចាញ់ពីរលើកជាប់ៗគ្នា កាលពីព្រឹកមិញ ពួកគេចាញ់ ក្រូអាស៊ី ៤-០ ដែលនាំឲ្យពូល A មានតែម្ចាស់ផ្ទះប្រេស៊ីល ម៉ិកស៊ិក និងក្រូអាស៊ីតែប៉ុណ្ណោះដែលត្រូវប្រជែងពិន្ទុគ្នាឆ្ពោះទៅវគ្គ១៦ក្រុមចុងក្រោយ។

ក្រុមម្ចាស់ជើងឯកអេស្ប៉ាញ បានរងបរាជ័យ ២-០ ក្រោមថ្វីជើងរបស់ក្រុមឈីលី និងបានធ្លាក់ចេញពីព្រឹត្តិការណ៍ World Cup កាលពីថ្ងៃពុធ ក្រោយពីការរងបរាជ័យជាលើកទី២របស់ពួកគេក្នុងរយៈពេល៥ថ្ងៃ។

ការទទួលជ័យជម្នះរបស់ស៊ីលី ដែលបានកើតឡើងតាមរយៈគ្រាប់បាល់បញ្ចូលទីរបស់កីឡាករ Eduardo Vargas និង Charles Arranguiz នោះ បានធ្វើឲ្យក្រុមស្ថិតក្នុងតំបន់អាមេរិកខាងត្បូងមួយនេះ និងក្រុមជម្រើសជាតិហូឡង់ក្លាយជាក្រុមដំបូងគេក្នុងការឈានទៅប្រកួតជុំទី២។

ក្រោយពីយុគសម័យកាលមាសដែលបានធ្វើឲ្យពួកគេឈ្នះពានរង្វាន់ Euro ឆ្នាំក្នុងឆ្នាំ២០០៨ និង២០១២ និងពានរង្វាន់ World Cup ឆ្នាំ២០១០ ក្រុមអេស្ប៉ាញបានរងនូវការធ្លាក់ចេញដ៏អាម៉ាស។ ពួកតាមស្មើកំណត់ត្រារបស់អ៊ីតាលីកាលពីឆ្នាំ១៩៥០នៃការធ្លាក់ចេញពី World Cup ត្រឹមការប្រកួតទី២។ វាជាការទទួលជ័យជម្នះជាលើកទី១របស់ស៊ីលីលើក្រុមជម្រើសជាតិអេស្ប៉ាញក្នុងចំណោមការជួបគ្នា១១លើក។

ការជឿជាក់របស់អេស្ប៉ាញហាក់ដូចជាធ្លាក់ចុះក្រោយពីការបរាជ័យក្នុងលទ្ធផល ៥-១ របស់ពួកគេក្រោមថ្វៃជើងរបស់ហូឡង់ក្នុងការប្រកួតបើកឆាកនៃពូល B របស់ពួកគេកាលពីថ្ងៃសុក្រ។

លោកគ្រូបង្វឹក Vicente del Bosque បានលុបឈ្មោះតាឆ្នើម Gerard Pique និង Xavi Hernandez ចេញពីជម្រើសដំបូង ប៉ុន្តែ វាមិនមានឥទ្ធិពលអ្វីដែលបានកើតក្នុងកីឡដ្ឋាន Maracana ក្នុងទីក្រុង Rio de Janeiro ឡើយ។

ស្របពេលជាមួយគ្នានេះ ហូឡង់ បានឈានទៅប្រកួតវគ្គ១៦ក្រុមចុងក្រោយក្នុងព្រឹត្តិការណ៍ FIFA World Cup ឆ្នាំ២០១៤ ខណៈដែលកីឡាករ Memphis Depay បានជួយឲ្យពួកគេទទួលជ័យជម្នះ ៣-២ លើក្រុមអូស្ត្រាលី ដែលបានធ្លាក់ចេញពីយុទ្ធនាការនេះ។ ក្រុមបាល់ទាត់ជម្រើសជាតិកាមេរូន បានបរាជ័យក្នុងការឆ្លងឲ្យផុតការប្រកួតជម្រុះតាមពូលនៃយុទ្ធនាការ World Cup ម្តងទៀត ខណៈដែលពួកគេបានរងបរាជ័យយ៉ាងចាស់ដៃក្រោមស្នាដៃក្រុមក្រូអាស៊ី ក្នុងលទ្ធផល ៤-០ កាលពីថ្ងៃពុធ៕