កីឡាជាតិ
កីឡាអន្តរជាតិ
អន្តរជាតិ
កូស្តារីកាឈានទៅកាន់វគ្គបន្ត ខណៈអង់គ្លេសត្រូវហាលអាវដោយស្វ័យប្រវត្តិ
× កូស្តារីកា បានបង្ហាញសមត្ថភាពដ៏គួរឲ្យភ្ញាក់ផ្អើលតាមរយៈការបំបាក់អ៊ីតាលី ១-០ នៅលើទីលាន Arena Pernambuco ដើម្បីទទួលបានកៅអីឈានទៅកាន់វគ្គ១៦ក្រុមចុងក្រោយនៃព្រឹត្តិការណ៍ World Cup ឆ្នាំ២០១៤ ហើយលទ្ធផលនេះមិនត្រឹមតែធ្វើឲ្យអ៊ីតាលី ខកចិត្តតែប៉ុណ្ណោះទេ វាក៏ជាការបញ្ចប់ក្តីសង្ឃឹមរបស់អង់គ្លេសផងដែរ។
កូស្តារីកាដែលជាក្រុមមួយមកពីតំបន់អាមេរិកកណ្តាល ត្រូវបានគេចាត់ទុកថា ជាក្រុមមួយដែលមិនអាចមានសមត្ថភាពឡើងទៅកាន់វគ្គបន្តបានឡើយ ដោយសារតែពួកគេស្ថិតនៅក្នុងពូល D ជាពូលមរណៈដែលប្រជុំទៅក្រុមជម្រើសជាតិធ្លាប់មានប្រវត្តិលើកពាន World Cup កន្លងមក។ សមត្ថភាពរបស់កូស្តារីកា បានធ្វើឲ្យការវិភាគនានាខុសស្រឡះទាំងស្រុង ដោយក្រុមដែលស្ថិតក្រោមការដឹកនាំបង្វឹករបស់លោក Jorge Luis Pinto ជនជាតិកូឡុំប៊ី បានបើកឆាកជាមួយនឹងជ័យជម្នះ ៣-១ លើអ៊ុយរូហ្គាយ។
អង់គ្លេសដែលត្រូវបានគេចាត់ទុកថា ជាក្រុមដែលមានឥទ្ធិពលក្នុងពូល បានធ្លាក់ចេញយ៉ាងសោកសៅ ដោយនៅសល់មួយប្រកួតបង្គ្រប់កិច្ចជាមួយកូស្តារីកា ខណៈអ៊ីតាលី និងអ៊ុយរូហ្គាយត្រូវប្រជែងគ្នាយ៉ាងខ្លាំងក្លាដើម្បីឡើងទៅកាន់វគ្គ១៦ក្រុមចុងក្រោយ។
ពេលនេះ ក្រុមដែលបានឡើងទៅកាន់វគ្គបន្តរួមមាន ហូឡង់ ឈីលី កូឡុំប៊ី និងកូស្តារីកា រីឯក្រុមដែលហាលអាវមាន អេស្ប៉ាញ អូស្ត្រាលី កាមេរូន និងអង់គ្លេស៕
© រក្សាសិទ្ធិដោយ thmeythmey.com