កីឡាជាតិ
×![]()
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បានលើកឡើងក្នុងសន្និសីទសារព័ត៌មានមួយស្ដីពីការបង្ហាញមុខកីឡាករ កីឡាការិនី របស់កម្ពុជា ទៅចូលរួមប្រកួតក្នុងកម្មវិធីទ្វីបអាស៊ី (Asian Game) ឆ្នាំ ២០១៤ ដែលរៀបចំនៅទីក្រុង Incheon ប្រទេសកូរ៉េខាងត្បូង នាព្រឹកថ្ងៃទី ៥ កញ្ញា នេះថា កម្ពុជា រំពឹងឈ្នះមេដាយយ៉ាងហោចមួយពីព្រឹត្តិការណ៍កីឡានេះ។
កម្ពុជាបានត្រៀមបញ្ជូនកីឡាចំនួន ៨ ប្រភេទទៅចូលរួមប្រកួតរួមមាន កីឡាតេក្វាន់ដូ (កីឡាករ ១ នាក់ -កីឡាការិនី២នាក់), ចំបាប់ (កីឡាករ ២នាក់-កីឡាការិនី ២នាក់), វាយកូនបាល់ (កីឡាករ ២នាក់ -កីឡាការិនីម្នាក់), យូដូ (កីឡាករម្នាក់), អត្តពលកម្ម (កីឡាករ៣នាក់), ហែលទឹក (កីឡាករម្នាក់-កីឡាការិនី ម្នាក់), Short Tennis (កីឡាករ២នាក់) និង កីឡាបាល់ទះលើឆ្នេរខ្សាច់ (កីឡាករ២នាក់)។
លោកអគ្គលេខាធិការបានបន្ថែមថា កីឡាដែលមានសក្ដានុពលរបស់កម្ពុជា នៅពេលនេះមាន អត្តពលកម្ម ដែលកំពុងហ្វឹកហាត់នៅជប៉ុន, តេក្វាន់ដូ ធ្លាប់ចេញទៅហ្វឹកហាត់នៅក្រៅប្រទេសចំនួន ២ លើកមកហើយ, ចំបាប់ ធ្លាប់ឈ្នះមេដាយមាសនៅស៊ីហ្គេម និង ធ្លាប់ចេញទៅសមសមត្ថភាពនៅប្រទេសថៃ និង យូដូ ដែលកីឡាករកំពុងតែរស់នៅ និង ហ្វឹកហាត់ នៅប្រទេសបារាំង។
លោក ញាណ សុវិសាល ជានាយបេសកម្មដឹកនាំក្រុមកម្ពុជា ទៅចូលរួមក្នុងកីឡាថ្នាក់ទ្វីបនេះ ដែលសមាជិកសរុបចំនួន ៣៦ នាក់ ខណៈកម្មវិធីនឹងចាប់ផ្ដើមពីថ្ងៃទី ១៩ ខែ កញ្ញា រហូតដល់ថ្ងៃទី០៤ ខែតុលា ឆ្នាំ២០១។
យោងតាមប្រាក់រង្វាន់លើកទឹកចិត្តរបស់រដ្ឋាភិបាលកម្ពុជាវិញ ករណីដែលកីឡាករណាម្នាក់ដណ្ដើមបានមេដាយត្រឡប់មកវិញ ក្នុងព្រឹត្តិការណ៍កីឡាថ្នាក់តំបន់នេះនឹងទទួលបានដូចជា មេដាយមាស១ គ្រឿង នឹងទទួលបានទឹកប្រាក់ចំនួន ៨០ លានរៀល ចំណែកមេដាយប្រាក់នឹងទទួលបាន ៤០ លានរៀន និង មេដាយសំរឹទ្ធ ទទួលបាន ២៤ លានរៀល៕
© រក្សាសិទ្ធិដោយ thmeythmey.com
